Siamchiilbu/ Genesis Hilhchetna (E-22)

 

SIMMUN

22 

 

Text                : Siamc 8:15-22

Thupi              : Abul a kipat thakna Pasian

Taangvom      : Tembaw a pan pawtkhia inla, nang leh na

                          zi, na tapate leh na ta pate zite pawtkhiat-

                          pih in.

                                                     Siamc 8:16

Thupatna

Gingtu lungleng in a kikhamuanna diing a Bible taang a zon chiang in, Siamchiil bung 8 na saang in, Rome bung 8na ah a lutzaw zeel hi. Aziak pen, Rome 8na in lungsim a nuamsak a, Siamchiil 8na in, tuiziin tungtawn a Pasian in sil zousiah a “phiatmangna” thu muhbaihlam in a om a, hilezong Pasian pen Kibulpat Thakna Pasian ahihna a kimu siamkei hi. Siamchiil 8na a, Pasian in sil zousiah a thakpatna (renew) in eite zong, lam-etna thak tawh tha a hung guan a, hua zilkhiat i sawm diing uh hi.

Siamc 8:15-19. Pasian in Amah a Ginna neite kiang ah nuamman pia hi: Noah ahihleh ginna a hausa mi ahihna Heb 11:7 na ah muhtheih in a om hi. Ama hunlai a leitung mite’n Pasian a limsak louhlai ua zong, Pasian a taksan ziak a, Pasian tawh zawkkhawm a chiamteh mi khat ahi hi. Tu in tuiziin a kangta a, hilezong ginna neitak in Pasian a ngak a, ama utthu in tembaw a nusia kei hi.

Hun sawtkuamtak nung in, Noah leh a innkuante, leitang tuansuk thei diing dinmun ah a om kiikta ua, tualeh leitung omdante et in kumsuk theih diing hitaleh kilawm mahmahta a, hilezong hua pen, leitung a hinkhua thak a pat kiik na diing ua Pasian lemgel a na hilou ahikha diing a, Pasian aw a ngak phot uh hi. Aziak pen ginna ahihleh sia-le-pha theihna a kal-suanna ahikei a, zaakna a hung kipan ahizaw hi (Rom 10:17).

Pasian in Noah leh a innkuante ginna nuamman or thaman apiak kilatna ahihleh, a innkuan ua tembaw sung a hun sawt-tak, hoihtak a kepna leh leitangh zong, tembaw nusia a a inn-kuan ua a khosak theih na uh ahihna diing a, hoihtak a apuah-phatna ah kichiantak in a muhtheih hi. Tualeh Pasian thupiak na bang in Noahte innkuan leh ganhingte a pawtkhia uh hi.

Siamchiil hunlai in Pasian in tuipi nuai a kipan in leitangh a dawksak a, tuachiin Adam leh Evi khosak theih na hi diing in a bawl hi; tu in zong tuiziin a kipan in leitang a hung dawksak a, Noah leh a innkuante a diing a khosak theih na hi diing in a omsak hi. Toupa’n Noah leh a innkuante baan ah ganta tengteng zong, siamchiil hunlai a thupha a piak bang in thupha a pia a, “Chii tampi suang in pung un,” (Siamc 1:22, 28; 8:17) a chi a, hih pen Pasian a hung kipan ginna gah thupha hi. Noahte innkuan ginna gah thuphate i muta ua, tu in eite ginna gah thupha, bangbang hi diing ahia, chih ngaihtuah ni.

Siamc 8:20. Pasian in Biakna pom hi: Tembaw sung pan a pawtkhia a, leitangh siamthak (renewed earth) a, a dintak in, Noah a lungdam mahmah a, tua in amah leh a innkuante biakna ah a puilut hi. Tuachiin maitaam a bawl a, Toupa kiang ah kithoihna silpiak in sa siangte a aap hi.

Noah ahihleh gingtu hihna theisiam, Toupa tawh zawkkhawm a, Toupa ompihna a nuamsa mi ahihna ah, 2Pet 2:5 na in, “Diktatna thugenpa” a na chi hi.

Amah pen, amah thu a tembaw pan a kumkhia loupa ahi a, a kumkhiat a, leitangh a tot ngal lelah, Toupa kiang ah biakna a pia hi. Siamc 4:4 na a i muh uh, Abel mahbang in a neihsate lak a, a hoih penpente Toupa Pasian kiang ah a aap a, tualeh Siamc 4:26 a khaakte mahbang in Toupa min a lou hi. Tuachiin Amah tungtawn in leitung ah Pasian biakna diktak pen a hung hingthak hi.

Thukhunlui hunlai a, Toupa kiang a haaltum silpiak a ki-aap chiang in, haaltum silpiak a kipia ganta pen, siit (khentuam) omlou in a pumpi in (Lev 1), maitaam ah a kipia a (Lev 1:9), hua pen Laisiangthou daan ahi. Aziak pen kithoihna ahihleh Pasian kiang a kipumpiakna ahi hi. Hichibang in Noah leh a innkuante zong Toupa ah a ki-aap ua, Toupa deihlamte bawl diing in, mansa in a om uh hi.

Tualeh Siamc 8:21 na a, “Toupa'n tua haaltum silpiak gim namtui a zak tak in” chih pen, Pasian a tak a om ahihdan, mihing in a gensiamdan omsun ahi a, hih pen Noah kithoihna silpiak, Pasian in a lungdampih bek hilou in a na pom hi, chihna zong ahi. Hichibang in a mite leh a biakpiakna uh Pasian in lungdamtak in a pom hi (Lev. 1:9; 3:16).

Pasian in mihingte kithoihna silpiak gimnamtui a zaak utkei a ahihleh, Amah bia mihingte tung ah a lungdam kei chihna ahi

(Lev. 26:31; Isa. 1:11–15). Thukhunthak ah “Kithoihna” chih kammal in a gen nuam pen ahihleh Jesu Khrist, eite a diing a, i kithoihna uh leh i gimnamtui uh hi diing a, a hung kipiakna (Eph 5:2) ahi.

Noah leh a innkuante hutdamtu Tembaw mahbang in, Jesu Khrist in zong Pasian thukhenna khopi-guah, eite a diing in thuak hi. Jonah, Mat 12:38-40 na a i muhbang ua Jesu Khrist sihna, vui a omna leh a thohna limlahna a kizangpa zong, a thumanlouhna ziak in tuipi ki-nawngtuah laigil sung ah, Pasian thukhenna thuak in a om hi. Hichibang ahihlai in Jesu pen, thumanlouhna ziak a gimthuakna a kipan in Pasian deihna sung ah a lutzaw hi. Hichibang a kithoihna tungtawn a Pasian biakna pen Pasian kipahna ahi.

Siamc 8:21-22. Leitung pianken ngaina omsate Pasian in pomthak kiik (reaffirm) hi: Pasian in Noah kiang ah, “Leitung pianken ngaina hi diing a ka na bawlsate mah a thak in ka pom hi,” hilezong siamchiil hunlai a leitung pianken ngaina hi diing a Pasian in a na bawlsate a omsa bang a, a hung kizak kiik theihna ah, Pasian in a pomna, Ama lungtang ah a nei hi, chih pen mite ngaihdan leh ginna ahi.

Leitung samsiatna kibehlap nawnlou (t.21a): Adam khelhna ziak in leitung samsiat in a na om a (Siamc 3:17), tualeh Kain khelhna ziak in, leitang pen gahsuanglou  diing a samsiat ahihna a paisuak hi (Siamc 4:11-12). Hih samsiatsa pen, Jesu a hung pai kiik dong, leh gingtute zong khopi siangthou a, a teen masangsiah uh, a kiphel nawnkei diing hi (Kil 22:3). Hilezong A hehpihna ziak in Pasian in mihingte tunggikna diing a behlap nawnkei a, tualeh mihingte khelhna ziak in zong leitangh pen a kisamsiat beh nawnkei hi.

 

Tuiziin tung kiik nawnlou diing (t. 21b): “Toupa'n a lungtang in, “Mi hing a neu apan a gilou vive ngaihsun hinanleh, ama'uh ziak in leitung ka hamsiat nawn kei diing; tu-a hinna nei zousiah ka beimangsak bang in, ka bawl nawn kei diing hi” chih Bible a i muhbang un, Pasian in mihingte lungsim siat ziak a tuiziin a tunsak pen (Siamc 6:5) bangbang mailam ah a tungsak nawnkei diing hi.

Leitung pianken (nature) ngainate sukbuai hi nawnlou diing (t.22): Mi tamzawte’n i theihchiatsa mahbang un, nite, suun hun zaan hunte, nipikaal leh khate (months) leh kumte pen, ni (sun) kiimkolh a leitung in ama lampi a zuih kawm a, a kipei kiimkolhna tungtawn a kepbit ahi a, hibang diing mawng a Pasian in a siam ahi. Hichibang a Pasian in a gualtuak silte, mihing khelhna ziak in sukbuai ahi nawnkei diing chih Toupa Pasian in genchian thak (reaffirms) kiik hi. 

Tualeh Pasian in thupha a piak diing a, a teel diing in galaxies tampi om lezong, Ama’n a itna leh a hehpihna thupha pen leitung a teengte a piazaw hi; a ziak pen “Leitung leh a sung a om zousiah Toupa a ahi” (Laate 24:1).

Siamc 8:22 na a Pasian in a hung kamchiam (guarantee) in, muhlouh mailam hun diing ah, lam-etna leh hangsanna a hung guan hi. Pasian in a siamsa planet-te leh a sung a omte a limsak mahmah hi, chih mangngilh louh diing ahi.