Siamchiilbu/ Genesis Hilhchetna (E-20)

 

SIMMUN

20

 

Text                : Siamc 7:1-24

Thupi              : Tuiziin Tunna

Taangvom      : Leitung ah tuiziin ni sawmli sung a tung

                          hi; tui a tam seem-seem a, tui in leitung

                          tunglam ah tembaw a laam toutou hi.

                                                     Siamc 7:17

Thupatna

“Theihsiamna neilou sakol ahihke'h sabiltung bang in omkei un,” chi a Laate 32:9 na a Pasian thumopna Noah in a hinkhua ah hoihtaknou in a zui hi.

Sakolte pen, a khonung guu diing ngaihtuah masa sese lou a ama’uh madon-don a thakhat a kidiang a moktai theite ahi ua, sabiltung zong ama’uh ut hunhun a kiphin a, painuamloute ahi uh hi; hilezong Noah Pasian tawh a zawkkhawm a, Pasian a diing in a sem a, a om diingdante Pasian a gualtuaksak hi.

 

Siamc 7:1-10. Tuiziin tungtaang a Pasian thuchiam ngak tawpna: Leitung a guahpi a zuk kipat ni pen, a kha nihna, a ni sawm-le-sagih ni (Siamc 7:11) ahi a, tualeh Noah leh a innkuante tembaw sung a, a lut ni uh pen, a kha nihna, a ni sawm ni ahi (t.1). Tuiziin tunkuan nipikaal tawpna pen ah, Noahte innkuan in gantate leh a an diing teng uh, kaikhawm in a koihta uh hi. Ama’un Toupa thuhilhna a zui ua, a thukhun a, a kichiamnate a taksang ua, tualeh bangmah patauhna diing a omkei chih zong hoihtak in a thei uh hi. 

Ni khat David in vaanpi kitum va-uan (thunderstorm) a en a, tualeh hualaitak a, a silmuhte tungtawn in laa khat a phuak a (Laate 29), hua vaanpi kitum va-uan lak a Pasian a muhdante a gelh hi. Tuachi a lamdangsa kawm a, a etlai in Noah hunlai a vaanpi gingte mitkha a mu in “Toupa tuisanglet tung ah a tou a, ahi Toupa pen taangtawn kumpipa in a tou hi,” (Laate 29:10) chi in a gelhta hi. Guahpite, vaanpi gingte, tunphe phe-zolzolte tungtawn in David in Pasian vaangletnate a ngaihtuah khia hi. Mihing hinkhua ah khosiat huaisiat hun om lezong, Pasian a kumpipa ahi a, ama’n sil zousiah a hoihna diing in nna a semzaw hi, chih mangngilh kei ni. Hichibang ahihziak in David in a laa phuak a khumsitna ah, “Toupa’n a mite thahaatna a guan diing a, Toupa’n a mite khamuanna a pia diing hi,” (t.11) a chi hi.

Noah leh a innkuante’n a kisakkholhna zousiah uh a zohtak un, Pasian thupiak dungzui in tembaw sung ah a lut ua, tuachiin Pasian in a kot, bittak in a khaaksak hi (7:16). Ama’un bangtan-vei tembaw sung a hinkhua a zah diing uh e, chih a theikei ua, hilezong Toupa’n a thei hi. Laate 31:15, “Ka hunte na khut ah a om hi”. Tuachiin kum 1 leh ni 10 nung in Pasian in tembaw kotkhak a hong a, pawtkhia un, a chi hi (Siamc 8:16).

Siamc 7:4,12. Sawmli (40): Siamc 7:4,12 na a i muhbang un, sawmli tawh kisai a Bible in eite a hung sinsak ut pen bang hi diing ahia?, chih thu i ensuklai diing uh hi.

Internet: fathersofmercy.com in a gendan a, Bible a number 40 in a gennop pen ahihleh, “Hinna thak, khantouhna thak, kilamdanna, sil thupi khat sepkhiatna a kipan a, sil thupi dangkhat semkhia diing a kikhelna,” chihte ahi.

Siamc 7:11-24. Tui naak thupitakte pokkekna: Tuiziin ahihleh siatna a pumdim leitung gawtna ahi. Pasian in tui thuktak naak thupitakte a hong a (t.11), tuachiin suun 40 leh zaan 40 sung (t.12) vingveng guahpi a zuu a, tua in mualsaang zousiah zong, tong sawm-le-nga a saang in (t.20) a khum-mang hi. Hih pen, Pasian in mikhialte a kissik diing uh, kum tampi sung a na ngakta a, tu in kisiikna diing hun a om nawn-kei a, khelhna tha-man ngah diing ahita hi; “Muh baihlam a a omlai in Toupa zong un, a nailai in sam un” (Is 55:6).

 Suun 40 leh zaan 40 khit in guahpi a theu a, hua pen a kha thumna a ni sawmnih-le-sagih ni (Siamc 7:12) ahi. Hitale-zong ni 110 sung tui a khangtou semsem a, tualeh ni 150 (t.24) a chin tan in, leitang tung ah tui a om hi. Tualeh tuiziin a kiamtak in Noah tembaw Ararat mualsaang dawn ah a ki-nga hi (Siamc 8:4). Tualeh hih tuiziin kiam a, leitang tung a tembaw a khawl theih na diing in ni 150 mah a ngai hi (Siamc 8:3). Tuachiin hih tuiziin diing ziak a Noah leh a innkuante, tembaw a alut ni ua kipan a a pawtkhiat tan uah, kha sawm-le-nih leh ni sawm-le-sagih sung a lut hi. Tualeh Noah leh a innkuante, tembaw sung a, a lut ni ua kipan a suut in, kha nih leh ni 10 khit in tembaw a nusia ua, tualeh gantate zong a khah uh hi (t.14). Pasian in a tembaw ua kot a khakkhum a kipan in, tembaw sung ah kum khat leh ni sawm sung a om uh hi.

Leitung pumpi tung a thukhenna: Pasian in mihing leh gamtate, “Leitung a kipan in ka phiatmang diing (6:7) a chi a, tualeh hih in leitung a omte khentuam a neihlouh ziak in, “Ka bawlsa hinna nei zousiah leitung a kipan in ka beimangsak diing,” chi in a na gen hi (7:4, 21–23; 8:21). Tuachiang in Siamc 7:18-20 na a i muhbang ua tui in mualsaangte a khum a, tembaw pen tui tung ah a kilaam toutou hi. Tuachiang in leitung a om nak theih na hu nei zousiah (hih tui a gawtna ziak in) a si uh hi (7:22-23). Hichibang ahihziak in hih tuiziin pen leitung pumpi thung a thukhenna ahi, a chihlouh theihkei hi.

Hih tuiziin pen leitung pumpi tung a thukhenna hilou hileh Pasian in sakhi-tuihup bawl in (Siamc 9:11-15), leitung pumpi tung a, a thukhun kilahna in a omsak kei diing hi.

Leitung pumpi tung a tuiziin tungtawn a Pasian thukhenna pen mulkin-huai mahmah a hihziak in, hichibang thukhenna  tungsak nawnlou diing in Pasian in kamchiam a nei hi (Siamc 9:11). Pasian in tuiziin tawh leitung pumpi gawt nawnkei lezong, tui mahmah zang in leitung ah gawtna a na tungsak veve a, huate lak a khenkhatte ahihleh hibang ahi; 1996 April kha in, Afghanistan tuilet ah mihing 3000 vaalte innbei a omsak a, tualeh July kha a Northern Bangladesh a toilet in mihing million nih vaalte inn-le-lou a suksiatsak hi. Tualeh July leh August kha mah in, China gam a bial 9te a tuilet in mihing hinna 2000 vaalte a la hi.

Noah hunlai a, Pasian silbawlte en a, eimah leh eimah in Pasian zahdan leh leudan i kizil thak kei ua ahihleh, Noah hunlai a tuiziin bang hikei lezong tuiziin pen eima mimal innsung, khua sung, gamsung ah tungthei hi. Leitung pumpi tung a, a tun a ngai nawn sese kei hi (Mat 24:37–39; Lk 17:26–27; 2Peter 3:3–7).

Mi dohzoute innkuan: Pulam a siatna huaisetak a tunlai in Noah leh a innkuante, a gantate uh tawh tembaw sung ah bittak in a om uh hi. Tuipi ki-nawngtuahte’n alang-alang ah nawk in, a tembaw uh bangzah in kisawi in, awn duaiduai lezong, Pasian in a nna sep diingte a zoh diing pen hua tembaw sung ah dohzoutak in a ngak ua, tembaw pulam a sil tungte ziak in a phunkei ua, Pasian in a sep diingteng a zoh masak diing pen, dohzoutak in a ngak uh hi. Hichibang ahihlai in, a kiim-le-kiang ua sil tungte, bangzahta in mul-kinhuaita lezong ama’uh pen Pasian deihteelna sung ah a bit uh hi.

Noah leh a innkuante’n tembaw sung ah kum khat leh ni sawm-le-sagih sung hun a zaklai un, nisial a, asep diing uh nna nei chiat le-uh zong, mun khat bek a bawl ahihziak in a chimtaak huai mahmah ngei diing hi.

Hilezong hih pen “Ginna leh thuakzohna ziak a thuchiam gouluahtute omdan,” (Heb. 6:12; 10:36) ahizawk ziak in Noah in Toupa a ngaakna ah, bangmah khoksakna a neikei hi. Peter in hih Noah sil na tuahsate pen ginna tungtawn a Jesu Khrist a hutdamna limlahna hi in a mu hi (1Peter 3:18–22).

Noah hunlai in leitung pen tui nuai a phum in a om a, hilezong tembaw tui tung ah a kilaam toutou a Noah leh a innkuante mun bit ah a tun hi. Hih pen Peter a diing in, baptisma tanna, sihna, vui a omna leh thohkikna limlahna ahi.

Noah pen a tembaw bawl hunlai a mi maw, a phangsim a mipi vantaang in a koihpa uh ahi. Hilezong amah pen Pasian a ginna ziak a mailam hun diing ngaihtuahna tawh hinkhua zang ahihziak in, mailam hun pen tuni a hung hih a, tuni pen hun paisa ahung suak chiang in, mipil penpenpa a suak hi.