Siamchiilbu/ Genesis Hilhchetna (E-18)

 

SIMMUN

18

 

Text                : Siamc 6:1-7

Thupi              : Mihing Giitlouhna

Taangvom      : Toupa'n leitung a mihingte giitlouhna a

                           saandaan leh, mihing lung sim   

                           ngaihsutna a sia tawntung hi chih a mu hi.

                                                        Siamc 6:5

Thupatna

Siamchiil bung 3na khit a kipan in Satan min pen tangtak a gelh in a om nawnkei a, hilezong tanpa khat piang diing a Pasian thuchiam pen langpan in, amah leh a pawlte’n theih-tawpsuah in nna a sem uh hi. Hih pen Thukhun Lui sung taangthu a Satan tup-le-ngim a na hi ahi. Ataktak in ama’n Tanpa (Siamc 3:15) a pian diing pen a deih kei hi! Tualeh Pasian in Satan tung a kidouna phuangta ahihziak in kheemtu in zong theihtawp suah a doukiik (fight back) sam diing in pan a la hi. Hih mihingte tungtawn a Satan nasepte i zillai uh simmun ahihna tawh kiton in, hoihtak in i ensuk diing uh hi.

Siamc 6:1-2. Pasian tapate leh Mihing tanute: Hih bung leh taang ah kinialna tampi leh muhdan kibanglou tampi a om a huate lak a tallang deuh 3te ahihleh hibang a gen in a om hi.

(1) Pasian tapate pen vaantungmite (angels) ahi uh, chih ngaihdan neite’n Job 1:6; 2:1 leh Siamc 6:4 nate pansik in anei ua, a tomlam a gen in, “Nefilim kichi min pen, ‘kesuk diing (to fall)’ chih ahihziak in vaantungmi (angel) puuksiate ahi ua, ama’un numeite (mihing tanute) a khelhpih ua, tuachiin tate a nei uh hi,” chih ngaihdan a nei uh hi.

(2) Hisung a kigen Pasian tapate ahihleh Seth suan-le-khaakte ahi ua, tualeh mihing tanute ahihleh Kain suan-le-khaak a numeite ahi uh hi; tuachiang in midaktat Seth suan-le-khaakte khelhna ahihleh siatna tapa Kain suan-le-khaak a numeite tawh a kiteenna uah a khial uh hi.Tualeh Seth suan-le-khaakte pen “Pasian tapate” ahihna uh kichiantak Luke 3:36-38 na ah muhtheih in a om hi.

(3) Hisung a kimu Pasian tapate ahihleh taanglai kumpite ahihkeileh vaihawmtute, ama’uh leenggam tungding a zi tampi neih diing phalna (polygamy) piate ahi ua, ama’uhte pen mihing tanute tawh a kiteeng uh hi.

Hisung a kigen ngaihdan 3te lak ah a nihna pen mi tamzawte’n a pomsiamzaw uh hi. Tualeh i theihsiam zawk na diing un Nefilim kichi i enlai diing uh hi.

Siamc 6:4. Nefilim: Laisiangthou Kis 13:33 ah, Kanaan gam enkhia a kuante’n thu a tutna uah, “Tua mun ah Nefilim mite ka mu uh hi,” a chi ua, a omdan pen, Kanaan gam ah Nefilim mite a na teeng uh chihna ahi. Ama’uh pen mihaat, gaal-haang a mi minthangte ahi uh.

Tualeh i theihbeh diing uah hoih khat ahihleh vaantung-mite in mihingte bang in ta-le-nau a neikei ua, ama’uhte lak ah kiteenna chihbang zong a omkei, chih pen i Toupa Jesu hung sinsakna (Mat 22:30; Mk 12:25) ahi.

Siamc 6:3. Kum za-le-sawmnih: Mihingte pen a si ngailou Pasian batpih, Pasian lim-le-meel pua ahihziak un, sihna tawh Pasian in a siamkhawm kei a, a damkum diing uh zong bikhiah louh ahi. Hilezong khelhna gah pen sihna (kha a sihna) ahi a, hih kha a sihna (Pasian tawh kikhenna) pen gah pen taksa a sihna in a hung kilangkhia hi. Tuachiin Pasian in mihingte damkum diing kum 120 a bikhiahsak a, tualeh hih pen tuiziin tun chiangtan hi diing a gintat ahi a, tualeh tuiziin a tun nung in mihing damkum pen 70-80 (Laate 90:10) a hung suak hi, chi in a kigen a, a dik diing in i gingta uh hi.

Tualeh Pasian in mihingte khelhna a dahpih mahmah hunlai in a lungsu mi khat a mu a, amah ahihleh Noah ahi. Tuachiang in Noah in leitung a Pasian thukhenna tung diing ahihna taangkoupih kawm in tembaw a bawl hi (2Pet 2:5), Noah thugen bangchet in Enok in zong ama hunlai in a na gen hi (Jude 14-15). Pasian in amah a om mite tungtawn in a thute gengen lezong, a ngaihsak diing mi kuamah a omkei hi.

Siamc 6:5. Mihing lungtang enchianpa Pasian: Laisiangthou a i muhbang un, Pasian in mihing lungtang a omte bangbangte e? chih a ngaikhawk mahmah hi. Aziak pen hih lungtang a kipan in deihteelna a hung kipan a, hua deihteelna in i omdan zousiah uh a thunun (control) hi. Hichibang ahihziak in Pasian in i lungtang uh kem siangthou diing in eite a hung deih hi (Pau 4:23; 6:18; 24:2; Laate 14:1-3; Mat 15:19; 5:8; Phil 4:8; etc.).

Tualeh Pasian in mihing lungtang a en in a zongkhia tawntung a, (1Sam 16:7; Jer 17:10); tuachiin Pasian in mihingte lungsim a sia tawntung hi chih a mu hi (Siamc 6:5).

Siamc 6:6. Toupa lungtang natna: Pasian in mihing lungsim siatna adim tawntung a mu a, tuachiin in “leitung a mi hing a na bawl pen khial a kisa a, a lungtang a nasak hi.” Hichibang ahihziak in khelhna in Pasian a dahsak mahmah a, tuachiin khial kisakna (Jer. 18:7-10; Jonah 3:10 nate a i muhbang ua, Pasian bawlsa mihingte’n ama’uh siampa tung a, a om diingdan ua a omlouh ziak ua Pasian in a siamsa mihingte tung a, a lungsim puakdan a kheelna) a nei a, tua in a lungtang a nasak mahmah hi.

Kisiikna i chih chiang un, lungsim kheelna ahi a, hih pen khelhna or banghiam silsia leh hoihlou bawlna pan a kisiikna genna ahi. Tuni a eite’n i theih diing ua poimawh ahihleh Pasian a khial ngaikei a, tuachiin mihingte a bawl pen silsia or hoihlou ahih ziak in a kisiik kei (Kis 23:19; 1Sam 15:29) a, hilezong mihingte lungtang a om siatna leh khelhna in a lungtang a naasak mahmah hi.

Siamc 6:7. Pasian in mihingte leh gantate phiatmang sawm: Mi khenkhatte’n “Pasian pen itna Pasian ahihziak in mikhialte a gawt diing pen a itna in a phalkei,” achi ua, hilezong Pasian pen itna a bukim ahihbang in dikna leh vaihawmna, thukhenna ah zong a bukim a, tuachiin mikhial pen a khelhna ziak a gawt a, tualeh leitung a om gantate tawh phiatmang mai diing utna a nei hi; hichibang ahihlai in tui a om gantate genkhaak in a omkei a, tualeh genkhaak a omte ahihleh tui lak a hintheilou diingte ahi uh hi.

Laisiangthou mun khenkhat ah tuiziin tunna pen, Pasian in mi gilou khang a gawtna (2 Peter 3:3-11; Matt. 24:37-39) dan a muhtheih in a om hi. Hichibang ahihziak in thukhenna hung tung diing thu a Laisiangthou in a hung taihilhna thute, ngaihkhok a Ama thu zuih mai diing ahi.