Siamchiilbu/ Genesis Hilhchetna (E-16)

 

 

SIMMUN

16

 

Text                : Siamc 4:17-26

Thupi              : Masawnna leh Khantouhna Kipatna

Taangvom      : Kain in a zi a luppih a, amah a gai a, Enok

                          a nei hi; tualeh ama'n kho pi khat a saat a,

                          tua khopi min diing, ama tapa min tap in

                          Enok a phuak hi.

                                                     Siamc 4:17

Thupatna

Pasian, a thugen a muanhuaipa in Kain paina lam zousiah ah a kembit tawntung hi. Ni khat Kain in ama teenna diing a hoih hileh kilawmtak mun khat a mu a, tuachiin hua mun ah khopi khat a lam sawmta hi. Leitang in amah a diing a gah a suanlouh ziak in, lou bawlna lam ah Kain a lohsam mahmah hi; hitalezong lou bawl lou a lohchinna diing zong in khopi a lamkhia a, tuachiin leitung a mi lohching hi a muhtheih in a hung om hi. Hitalezong, mi thaapvaakpa ahihna a beituankei hi; aziak pen a teenna gam min khiatna ahihleh “vakvaihna” ahi hi. Tuachiang in ama khua-le-tui hihna pen vaangam a hikei a (Phi 3:20-21), vaantung khopi tun diing kinepna zong a nei tuamkei hi (Heb. 11:9–16). Kain khopi theih omsun ahihleh leitung a, a lamsa a khopi pen bek mah ahi hi.

Siamc 4:17. Kain zi khoi a hung kipan e?

Option #1: Pasian in Nam khat a siam a, ama’uhte Nod gam ah a teengsak a, huate lak a kipan in Kain in zi a nei hi.

Hih Option khatna pen Biblical Answer ahi hiam? Hih thudik ahihna Bible ah i muthei uh hiam? Siamc 3:20 ah, Evi pen “Mi zousiah Nu” ahihna gen ahihman in, Adam leh Evi a kipan hilou mihing tuam kuamah Nod gam ah, Pasian in a tuam in a teengsak kei, chih a kichian hi. Tuaziak in hih Option khatna pen dawnna ahihleh a dikkei hi.

Option #2: Kain in a sanggamnu zi in a nei hi. Siamc 5:1, 3-4na a i muhbang un, Adam in kum 130 ahihlai a Ama kisuthpih tapa a neih pen Seth ahi a, hilezong Amah tawh a kisunlou Kain leh Abel a neihlai a Adam kum phazah pen kigen lou hi. Hibang ahihziak in, Adam leh Evi in kum 130 ahih masang uh, tapa Seth a neih masang un, tapate leh tanute a nei ua, tualeh kum 130 ahih nung un zong tapate leh tanute a neilai uh chih a kichian hi. Bangzah chet a neih uh e? chih pen kichianlou hi.

Siamc 1:28 na a Pasian in Adam leh Evi thupha a piakna ah, “Chii tampi suang in pung unla, leitung luahdim in thuneih khum un,” a chih nung in Eden huan ah Pasian in Adam leh Evi a koih a, a nung in Eden huan a kipan a nawhkhiat ahi uh hi. Tualeh Eden huan a Pasian in Adam leh Evi a koih ni a kipan a Ta-le-nau neihtheihna neisate ahihziak un, ama’un hua Eden huan ah ta bangzah a nei ua? Neilou uh maw? Ahihleh Adam leh Evi kum bangzah sung Eden huan ah a om ua? Kum 10 maw? Kum 3 maw ahihkeileh ni 3? Kitheilou hi. Adam kum bangzah ahihlai a Eden huan pan a nawtkhiat a om ahia? Chih zong kitheilou hi.

A kichian mahmah khat ahihleh Adam hi in Evi hitaleh, ni khat (day-1) ahih ua kipan a pichingsa ahi ua, ta-le-nau neithei ahi uh hi. Hichibang ahihziak in Kain in a Pa Adam ta masa, Nod gam a na teengte lak a kipan in numei khat zi in a nei hi. Aziak pen:

1.     Hua hunlai pen tulai a ei hun tawh kibanglou, innkuan khat kiteen khaam hilou ahi.

2.     Innkuan kiteenna a kikhaamna kipatna ahihleh Mosi hunlai ahi a, Biblical Dispensation et in a 5na ahi. Hih Mosiac period leh Creation kikal pen, kum tampi bang hi diing a tuat ahi.

Option #3: Kain in Nod gam a zot masang in, a pa Adam tanute lak a khat zi in a nei hi.

Hih Option thumna toh kisai a gente pansiik ahihleh, Kain silpiak Maitaam a kipan ahi. Kain in maitaam a bawllai in Abel in zong maitaam a doh hi. Hih Maitaam pen a tuam tuak a a doh uh ahi a, tualeh a maitaam silpiakte uh zong a kibangkei hi. Kain in LOU a tuam in a nei a, a LOU a piangte maitaam a a aap ahihziak in, amah pen LOU tuam neita, Maitaam tuam zong neita ahihna ah, a ta neih thu kigen kei lezong, azi toh inntuansa chihna ahi, chih ahi. Hih Option thumna pen Dik-thei leh kilawmtak, ngaihsut tham ching khat ahi.

Final Remark: Kain zi tawh kisai a Option thumte lak ah, a khatna pen Biblical Answer ahih-theihlouh ziak in a dik theikei a, a nihna pen Biblical Answer deuh pen, leh kilawm pen in a kilang a, tualeh a thumna zong, dik leh kilawmtak bang in a kilang hi. Tualeh hua hunlai a Kum 900 damte’n ama’uh saang a kum 50-100 a ngekzawte zong, a kiteenpih theih uh ahi.

 

Siamc 4:18. Enok, Irak, Mahujael, Mathushael

Kain in tapa a nei a, amin Enok a phuak hi. Enok Hebrew meaning ahihleh “aapkhia or pekhia- consecrated” chihna ahi. Kain in a khopi lamkhiat pen, a tapa tap in Enok a chi a, hilezong kua kiang leh bang pen kiang a hih khopi ki-aapkhia or ki-pekhia (consecrated) chih hilh in i omkei uh hi. Irak: “Taimang kiik” chihna ahi a, hih pen Sabiltung a honlak pan a pialmang tawh kibang genna ahi. tualeh thupua a kamtaai hiam “Khopi a kileh”- Kain khopi a kileh chihlam genna ahi. Mehujael: “Pasian vuak-le-saat”- a gennop pen: ka puakgik mangbatna zousiah Pasian mawhna ahi. Methushael: “Kei zong pasal khat ka hi: Pasian kua e?”– himi sentiment pen: Pasian biaktaak ahikei hi, chih ahi.

Siamc 4:19-24. Meisiapu Lamek tanchin tomkim.

Lamek min pen, “Mi haatpa” or “Mi tatsiapa” chihna ahi. Tualeh Bible a meisia kimu masa pen Lamek ahi a, a zi tegeel min ahihleh Adah and Zillah ahi. Adah min pen, “Kizepna-Ornament” chihna ahi a, Zillah ahihleh, “Liim/ liimbelh-Shade” chihna ahi. 

Lamek meisiatna pen Siamc 2:18-24 na dungzui a Pasian thupiak kalh a gamtatna ahia, hitalezong amah nung a hung khangkhia mi dangte’n zong amahbang in meisiatna (polygamy) paidan pen a hung zuitou ua, Pasian in deihkei lezong a thuak teitei (tolerate) a ngai a, hih pen Matt 19:3-9 na a, kikhenna pen, Pasian deihlouh hilezong Pasian in a phalsak tawh kibang ahi. Hichibang gamtatna pen Thukhun Thak ah phal ahikei hi.

Lamek tapate: Lamek in tapa thum a nei a, ama’un siamna tuam chiat a nei uh hi. A taak pen Jabal ahi. Jabal min pen, “Luita or lui tuiluang or peengkul” chihna ahi. Amah pen puanbuuk a khawsa gan khawimite pubul ahi hi (t.20).

Tualeh hichibang hinkhua pen a Abraham, Isaac leh Jacobte’n zong a na lasawn (adopt) uh hi, chi a gen in a om hi. Anihna Jubal ahi a (t.21), amin lehna ahihleh “Lui (Stream); chih ahi a, hih kammal tungtawn in Jubilee chih kammal a hung piangkhia hi, chi a gen in zong a om hi. A thumna pen Tubal-kain ahi a, “Leitung nate hamphatpih” chihna ahi a, hih pen Jesu’n buhtak leh a buhkheem a gen tawh tehkaak ahi. Tualeh amah pen khutsiam-silbawl a lunglutmi ahi a, tuachiin ama’n daan leh siik vanhzak zousiah bawlpa a nei hi (t.22). Tubal-kain sanggamnu Naamah min pen, “Hoih, maitai, nem, kipumpiak,” chih na ahi a, amah pen Bible a numei genphak a omte lak ah a lina ahi. 

Tuachiang in Lamek ahihleh tualthatpa leh mi kiliansak-tak zong ahi hi. Tualeh a tualthahna ziak pen, tangval khat in amah a sukliam ziak ahi a, hilezong hih tangval in bangziak a amah a sukliam e, chih i theikei uh hi. Hilezong taang 24na a, “Kain tung a phuba sagihvei lak diing hileh, Lamek tung ah sawmsagihvei a kila taktak diing hi,” a chihna tungtawn in, Lamek in Kain a kithahlouh na diing in a vengbit hi, chih a kilang a, tualeh Kain tanchin zong a hunlai a mite lak ah, a na kihah gen mahmah hi ngei diing in a kilang hi.

Enok khopi a teengte nekzonna: Enok khopi a teengte nekzonna pen a tuam chiat ahi. Khenkhatte’n Jabal nungzui in ganpu nna a sem ua, khenkhatte’n Jubal zui in tumging tawh kisai nnate a sem ua, khenkhatte’n Tubal-kain zui in a sep bangbangte a sem uh hi. Tuachiin ama’uh lam chiat a lamzang ahihman un, lou bawlna vanzakhte, suang-inn lamna vanzakhte leh gaaltuam dong in a nei ua, Pasian chihlou a kisap uh a omkei chih theihtheih diing in a om hi.

Siamc 4:25-26. Seth leh Enosh: Bible a i muhbang un, Adam in a zi a luppih a tuachiin tapa khat a hung nei ua, amin in Seth a phuak uh hi. Hih pen Kain suan-le-khaakte a khang sagihna tan (7^th Generation) a kigen nung a, Evi tapa neihna hung kitaklang thak ahi a, hih in a tup pen ahihleh, Seth a kipan a leitung mite’n Pasian lam a naihtaak diing ziak uh ahi. Tualeh Kain, Abel leh Seth kikal ah, Adam leh Evi in ta bangzah a neih uh e, or neilou uh maw?, chih thu pen taklat hilou hi. Hih a kitaklat louhna ziak hi diing a kigingmawh pen ahihleh, ama’un a unpi ua a U-pa uh Kain a zuihziak ua, a tanchin ua zil diing hiam, sil poimawh hiam a omlouh ziak ahi, chi a gen in a om hi. 

“Seth” i chih chiang un “sehsa- appointed” chihna ahi a, tualeh Seth in tapa Enosh a neihlai in amah kum 105 in a upata hi (Siamc 5:6). Enosh pen “Zawngkhal” chihna ahi a, hih pen Pasian lam a mihingte zawnkhalna gen nuamna ahi.

Laisiangthou khangthu ah, naungek pianna thu genkhak ahih chiang in, Pasian mite guallelna leh gualzawhna tawh a kizom hi. Judah hun haksa, Egipt saltan hunlai in Mosi a piang a, tuachiin Judahte a diing in zaleenna tuntu a suak hi (Pawt 2:1-10) Siampu hunlai a kamsaanna thu bangmah a omlouh hunlai in Samuel a piang a, tuachiin Israelte’n amah tungtawn in Pasian a naih uh hi (1Sam 1-3); tualeh hichibang in David pa Jesi chihte zong ahi uh hi (Ruth 4:18-22; 1Sam 16). Pasian mite suksiatna diing in Satan in theihtawp suah lezong, Pasian in a mite hunkhia diing a na koih veve hi, chih muhtheih ahih mahbang in, Seth khang a kipan in mite’n Pasian lam a naihta uh hi.