Siamchiilbu/ Genesis Hilhchetna (E-15)

 

SIMMUN

15

 

Text                : Siamc 4:11-16

Thupi              : Vaakvai leh thaapvaak hinkhua.

Taangvom      : Kain in Toupa kiang ah, “Ka gawtna tan,

                          ka thuakzawh diing saang in ana zaw hi!

                                                    Siamc 4:13

Thupatna

Mi vakvai in inn-le-lou a neikei a, mi thaapvaakte innlum a kipan in a taimang uh hi; hilezong biakna ziak a khualzin mite’n (pilgrim) inn lam a zuan uh hi. “Tuni in na mai uah hinna leh sihna, thupha leh vangsiatna ka koih hi chih hung theihpih diing in lei leh vaan ka koih hi. Hinna teel un, noumah leh na suan-le-khaakte uh na hin theihna diing un, (Daan 30:19). Kain in deihteelna dikloutak teel in, tomkhat a damsung a leitung a pilgrim (biakna ziak a khualzinmi) hih diing saang in, leitung a mi khual, vakvai leh thaapvaak, mi vaakmangpa hih diing a teelzaw hi.

 

 

Siamc 4:11-12. Pasian samsiatna: Siamc 3:14 ah Pasian in guul a samsia a, taang 17 na ah leitang a samsia a, hilezong Adam leh Evi samsiat in a omkei uh hi. Hitalezong tu in a tapa Kain, giloupa (guul) tapa a samsia hi. Kain in a sanggampa sisan tawh leitang a buahsak taak ziak in, tu in leitang in amah a diing in gah a suangtam kei diing hi. Adam in haksatak a nisial a sem-le-bawl a hinkhua a zaklai in agah lak un (pawltaak hun) a nei sam hi (t. 17-19); hilezong Kain a diing in, sepgimna in gah a suangkei diing hi. Hichibang ahihziak in Kain a diing in lou bawl a mun khat a teeng dentheih ahikei hi. Ama’n a bawl theih omsun ahihleh mun khat pan a mun dang khat a kisuan a, thaapvaak leh vakvai a, kialtaina tawh a hinkhua a zak diing asuakta hi. Hih pen Pasian in Kain a samsiatna ahi hi.

Siamc 4:13-14. Kain in poi asakna: Kain in a khelhna pen khawk asakna thu leh poi asakna thute a kam a kipan in kimuthei nanleh, a khelhna a kipan in a kissik tuntun khakei a, tuachiin “Ka khelhna pen ka puakzoh diing saang in a gikzaw hi,” chi lou in, “Ka gawtna tan, ka thuakzawh diing saang in ana zaw hi!” a chi hi. Ama’n a puaknat pen ahihleh a khelhna ziak a, a thuak diing gawtna pen ahizaw hi.

Tu in amah pen mun khat a, a omden a ahihleh kial a thuak diing a, amun-mun a kisuan a, a tai kawikawi diing lah a lauhuai hi; leitang in amah a langpanta a, Pasian in zong lang-panta hihziak in, amah mukhate’n Abel phuba lakna a, a na thah maitheih diing uh dinmun ah a omta hi. Abawltheih diing bang a om a? A sanggampa mudah a, a thah baan ah a kisiik utlouhna in, a hinkhua a apuakzoh louh diing puakgik a kiguan hi. Khoi mun a om in, bangbang bawlta lezong, Kain pen mi tawldam theilou ahi denta diing a, hichiang tan ah amah a diing in damna (remedy) a omkei hi.

The Reformation Study Bible in hih tungtaang thu a genna ah “Pasian in Kain tung a gawtna thu a phuanlai in, Kain in Pasian leh a sanggampa tung a, a khelhna pen kisiik in ngaihdam ngeen leh hoih diing hinapi’n a ngeenkei a, hilezong hua gawtna thuak diing ahihziak in amah leh amah a kihehpih (self-pity) mahmah hi. Tuachiin amah siampa Pasian saang in taksa leh vantaang muh ahih diing pen a laau mahmah hi,” a chi a, a dik mahmah hi.

Siamc 4:15. Kain talpaang a Pasian Chiamtehna: Sil siamna a Pasian sil siam lamdang taktakte baan ah, sil lamdang, theihkhiat zohlouh khat Pasian in a bawl kiik a, hua ahihleh Kain tung a chiamtehna a koih pen ahi. Tualeh Kain in a sanggampa sisan a leitang a buahsakna ziak a, a tung lungkimlou leh amah thah mai diing utna neite leh a tung a siatna tut sawmte a kipan a, a bitna diing leh amah kembittu hi diing in Pasian in Kain chiamtehna a bawl hi.

Hih chiamtehna pen bangchibang chiamtehna hi a, tualeh mite’n bangchibang a hih chiamtehna pen Pasian kepbit suai (seal) ahi chih abangchi theih uh e, chih tuni dong in kuamah in theikhia zoukei le’uh zong Kain tung ah zakh in a na om hi. Hih pen Pasian a kipan a hehpihna nasep lamdangtak ahi hi.

Bangziak a diabol nna semtu, a sanggam thatpa zaleentak a Pasian in a pai diing a phal e? Hehpih siam Pasian in, mikhialte a khotuah mahmah a, tuachiin i khansiatna uh tawh kituak in gawtna a hung pia kei a, a hehpihna a hung piazaw hi. Tualeh hua hehpihna pen phulouh hamphatna ahi hi. Hichibang in Pasian in Kain hinna a kepbitsak a, hilezong hih pen Kain tanchin tawpna ahikei a, amah zong a si sam hi; tualeh hih sihna baan ah thukhenna, Heb 9:27 na dungzui in a maituah sam diing ahi. Tualeh Kain in leitung a, a na

lamkhiat khantouhna (civilization) zousiah tuiziin ah a tawp mangsiangta a, a hinkhua tanchinte theihbeh diing a om nawnkei a, a kithei omsunte ahihleh biakna ngaihsak loute, khelhna a kimawlte leh kheemnate bangmah a thusimloute a diing a giikna (warning) ahita hi. Tuachiin Bible in “Kain lampi” (Jude 11) ahihleh lampi neu (narrow way) hinna a lutna pen ahikei (Mt 7:13-14) chih a kichiansak hi.

Siamc 4:16. Pasian a kipan a pawtmangna: Pasian tawh omkhawmte’n bawn, hinkhua a amaituah uh na leh silte haksa a sak ua, thuakhak a sak sam ua ahihleh Pasian a kipan a pawtmangpa hinkhua haksat diingdan pen a gentheih huai mahmah diing in a gintak huai hi.

Bible in “Toupa omna a kipan in Kain a pawtkhia a, Eden suahlam a om Nod gam ah a teengta hi,” a chi hi. KJV Study Bible in hih thu a genna ah, “Hutdam a omlou, mi puuksiate’n leitung ah kinepna a neikei ua, tup-le-ngim omlou in leitung ah a thaapvaak uh chih a hung kawkmuh hi,” a chi hi.

Greg Laurie in a genna ah, “Adam leh a innkuante’n Paradise (Eden huan) lam ki-nga in Pasian a na bia khamaithei ua, hilezong Kain in Eden gam a kipan a pawtkhia in, Pasian muhphak louhna hi diing a, a ngaihsutna mun Eden suahlam a om Nod kichi gam ah a vateeng hi,” a chi hi.