Siamchiilbu/ Genesis Hilhchetna (E-13)

SIMMUN

13

Text                : Siamc 4:1 - 5

Thupi              : Kain leh Abel

Taangvom      : Adam in a zi Evi a luppih a, tuachiin

                          amah a gai a, Kain a nei hi. Amah nu'n,

                          “Toupa panpihna zaal in pasal khat ka

                           neita hi,” a chi hi.

                                                      Siamc 4:1

 

Thupatna

 

William Shakespeare kichipa in, “Mi khat in amah hunsung in sep diing leh bawl diing tuamtuam tampi a nei hi,” chi a, a na gelhbang in, mihingte’n eimah hunsung in sep diing leh bawl diing tuamtuam tampi a kinei hi. Hichibang ahihlai a eite theih diing a poimawh ahihleh, i gamtatzia diing, i om diingdan leh i pai diingdante uh pen Pasian deihna bang ahih diing ahi. Pasian deihdan zonlouhna hinkhua pen a tawpna ah mulkin huaipi suakthei ahi; chih theikawm in i simmun uh zil ni.

Siamc 4:1. Pasal in a zi luppih: Hilaitak a pasal in a zi luppih chih pen, sexual intimacy a genna ahi a, hih pen kiteenna a hung kipan numei leh pasal kikaal a kitheihchianna ahi; tualeh eite’n luppih chih kammal i zak chiang un pasal khat in numei khat, nupa (couple) ahihna uh tawngtawn a, a luppihna ahi, chih i thei chiat uh hi. Tualeh sex i chihte uh pen khat leh khat tung a ki-nga tuah ahih-mahbang in, numei leh pasal zong, anih ua Pasian tung a ngak ahi hi (1Kor 11:8-12).

Siamc 4:1-2a. Kain leh Abel: Pasian in i nu-le-pa (parent) masa pen uh thu a pia a, “Chii tampi suang in pung unla, leitung luahdim in thu neihkhum un,” (Siamc 1:28), a na chi a, tuachiin ama’un hih thupiak a zui uh hi (Siamc 5:4). Hichibang ahihlai in kiteenna pen innkuan bawlna chiang bek ahikei a, tualeh a kiteeng zousiah zong ta-le-nau a thupha piak ahikei uh hi. Ta-le-nau i chih uh pen Toupa a kipan a i goutan uh ahizaw a (33:5; 48:9; Ps. 127:3) kipaktak leh lungdamtak a innsung a i na vaidawn diing uh ahi.

“Kain” min khiatna ahihleh “acquired-Ngahna, neihna” ahi. Hih pen Evi in a tapa, Pasian piak ahihna a taklatna ahi.

“Abel” min khiatna ahihleh, English ah “Breath” ahi a, Pu Chinzam tombing dictionary in, “Nakna (Huih diklut a khah pawt zelna)” a chi hi. Tualeh hih kammal pen Thuhilhna laibu ah “Vanity-Bangmahlou” chi in a kiletkhia a, 38-vei saang a tawmzaw lou zakh in a om hi.

Thuhilhna laibu ah “Vanity” chih kammal pen “Bangmah lou” chi in na kiletkhia lezong, a gennop chii nih a om a, a khatna ahihleh, “Kisatheitak a omna or kilatna” ahi a, a nihna pen “Bangmahlou” ahi. Hih in a gennop pen ahihleh “Kisaktheihna in phattuamna a neikei,” chih ahi.

Kain min in hinna pen Pasian a hung kipan ahihna a hung hilh a, Abel min in hinna pen a tom mahmah hi, chih a hung hilh hi.

 Tapa taak pen ahih dungzui in Kain pen a manpha diak a, hilezong a khelhna ziak in a manphat zousiah a mansuah a, tuachiin Seth in ama mun diing a luah hi (Siamc 4:25). Hichibang sim in, Abraham tapa taak, Ismael zong nusiat ahi a, Isaac in deihsakna a ngahzaw hi. Isaac tapa taak Esau ahi a, hilezong Jakob ziak a nual ahi. Jakob tapa taak Reuben hilezong, Joseph tapa tegeel ziak a nual ahi (Siamc 49:3–4; 1 Chron. 5:1–2; Siamc 48:8–22).

Tualeh Siamchiilna laibu ah sanggam kimelmakna pen a paidan taangpi hileh kilawm bangtak in, Ismael in Isaac a dou a, Esau in Jakob, Joseph zong a sanggamte’n a dou uh hi. Mihinghte lak a khelhna a lut a kipan in innkuan sung ah kituahlouhna (dysfunctional) leh innkuan kisiatna a om a, hih pen Toupa Pasian bek in a lemtuak thei hi.

Siamc 4:2b. Nasepna: Adam in a tapa tegeel a hung khanlet dungzui un, nna a semsak a, tuachiin ama’h tegeel in, lunglutna tuam tuak a hung nei uh hi. Hichibang a siamna tuam tuak nei ahihna uah, a u-zaw Kain pen lou-bawlmi a hung hi a, Abel ahihleh gan-khawimi a hung suak hi. Tualeh amah bang in Abraham, Isaac, Jakob leh a tapate baan ah Mosi leh David zong gan-khawimi ahi uh hi.

Adam in a tapa tegeel nasem in a chiil in, bangziak a nasep poimawh ahia chih a hilhna ah, “Nasep kichi pen Pasian tawh pankhawmna leh sepkhawmna ahi” (Siamc 1:26-31), a chih ngei diing a taksan-huai hi.

Nasep kichi pen, khelhna ziak a Pasian a kipan a gawtna ahikei hi; Adam leh Evi in, Eden huan a khelhna a, a puuk masanglai un nna a sem thamta uh hi. Nasep kichi pen Pasian tawh pangkhawm a, Ama sil siamte, Ama thupina diing leh mi dangte hoihna hi diing a zak na diing a, mihingte hamphatna ahi hi. (See Col. 3:22–23; 1 Thess. 4:11–12; Eccl. 9:10.

Bible ah mithadah, mi dang in ama poimawhte a piak diing uh ngak a omte kigenphatna a omkei hi (2 Thess. 3:6–15). Jesu’n a nna taktak pen a sep masanglai in carpenter nna asem hi (Mark 6:3). Paul in zong a khualzin kawmkawm in innbawlna nna a sem hi (Acts 18:1–3).

Tulai a ei Khristiante’n nna i sep ua ahihleh, nekzonna leh kilawhna chiang bek a bi-khiah in nna i semkei uh hi. Nna i sepna ziak uh ahihleh Pasian in i lamlian zuih diing ua a na bawl, Amah tawh pangkhawm a Ama nna i sepna uh leh midangte a diing a i sepna uh ahi a, hua pen Pasian tawisaan ahihna diing ahi hi (1 Cor. 10:31).

Siamc 4:3-5. Kain leh Abel Kithoihna Silpiak: Pasian in Adam leh Evi leh a tate uh, Kain leh Abel kiang a, kithoihna silpiak aap diingdan leh biakna piak diingdante a hilhna thu, Bible ah tangtak in kimu ei lezong, Siamc 3:21 na a, Pasian in Adam leh Evi a diing a ganta khat gou a, hua ganta tungtawn a, a puansilh diing uh a bawlsak hunlai a, kithoihna silpiakte tungtawn a Amah biak diing ahihdan a na hilh hi diing a gintat hi. Aziak ahihleh biakna diktak pen Amah a kipan a zil a ngai a, tualeh Amah kiang tunna diing lampi, Amah-mah in a hung hilh a ngai hi.

 Kain leh Abel in kithoihna silpiak maitaam, Pasian kiang ah a aap tuak uh hi. Pasian in Abel kithoihna silpiak maitaam pomsak in, Kain maitaam a pomsak kei hi. Kain kithoihna silpiak maitaam pen a silpiak ziak a kipomsaklou ahikei a, Kain ziak a kipomlou ahi; aziak pen “Pasian lam ah a

lungtang a dikkei hi,” chi a gen in a om hi.

Tualeh kum bangzah hiam nung in, Mosi daan ah an leh theigah silpiakte taklat in a om a (Siamp 2; Daan 26:1–11), tua in, a chiil a kipan in Kain kithoihna silpiak maitaam pen a maitaam a diklou ahikei a, pomtheihlouh chi-zong ahikei chih ginna a hung neisak hi. Hichibang ahihziak in Kain in Belaam gou henla, a sisan tawh kithoihna maitaam bawl henla hilezong, a lungtang a diklouh ziak in pom ahikei diing hi.

Abel ahihleh Pasian lam a, a lungtang a dik ziak in or ginna neitak a nna a sep ziak in, Pasian in a maitaam silpiak kithoihna maitaam a pomsak hi; tualeh Abel silpiak Pasian in a pomsakna kilatdan pen, Siamp 9:24; 1Kum 18:38; 1Khang 28:26 nate tungtawn in, vaan pan a meikuang in maitaam a kikoih kithoihna silpiak sa pen a haaltum or a kaaktum hi diing a gintat ahi. Tualeh Abel silpiak pen Heb 11:4 na tungtawn in “Ginna in” a chi a, hih ginna nasep pen Pasian in a pomsak hi.

Abel in a maitaam silpiak diing in a neihsate lak ah, a hoih penpen a hung tawi hi; hih pen ginna tungtawn a Pasian lungtang zonna mizia ahi a, hichibang mizia pen Kain ah a omkei hi.

Tua chiin Kain a heh mahmah a, a mai a mual dikdek hi.