GENESIS/ SIAMCHIILBU HILHCHETNA (E00-6) 02MARCH2025

 

SIMMUN

6

 

Text                : Siamc 2:1-9

Thupi              : Thupha Piakna leh Siamchiilna Thu

                          Dangte

Taangvom      : Pasian in ani sagih ni in thupha a pia a, a

                          siansuah hi. Aziak pen, hua ni in Pasian in

                          a siam leh a bawl, a nna septe tengteng a

                          khawlsan hi.

                                                       Siamc 2:3

Thupatna

“Nang bek Toupa na hi; vaan na bawl a, vaante vaantung leh tua omte tengteng tawh na bawl hi. Leitung leh a sung a om zousiah, tuipi leh a sung a om zousiah zong na bawl hi. Ama'uhte tengteng kiang ah hinna na pia a, tuachiin vaan a omte tengteng in nang a hung bia uh hi.” (Neh 9:6)

Siamchiil bung nihna ah, Pasian in a sil siamsate thupha a piakna leh a siansuahna i muh ua, baan ah Sil siamte tanchin dang zong a om a, huate a baan baan in i ziltou diing uh hi.

 

Siamc 2:1-4. Ni sagihni Khawlna: Pasian in “Vaantung, leitung leh a sung a om zousiah zawh khitsiang,” nung in, Pasian in a silsiamsate siansuah in thupha ahi a, tualeh hih ni pen a ni sagih ni ahi, chih Bible ah kichiantak in i mu uh hi.

Sagih:  Pasian in a silsiamte siansuah a thupha a piak ni pen a ni sagihni ahi. Sagih chih kammal pen Bible ah 800vei vaal a kimu a, tualeh hih in a gen ut pen ahihleh, “Bukimna (perfection), Zawhsiangna (completion) bukimtak a bawlkhitna (fulfilment), chih ahih dungzui in, hih sagih pen Pasian ni sagihna ahi a, mihingte a ahikei. Tualeh a masang ni guk sung zong Pasian nna sepna nite ahi a, mihingte a ahikei hi.

Khawlna: Hih ni sagihni a Pasian khawlna pen sabbath ni hung kipatna bulpi a hi a, tualeh a khonung in hih khawlna ni (sabbath ni) pen Israelte tawh mekkhawm in a hung om hi (Pawt 16:29; 20:10-11; Daan 5:15). Tualeh hih khawlna pen Siamc 2:2 ah, “Tawlnga” zong i chi uh hi; aziak pen Jn. 5:17 a, “Ka Pa in tutan in nna a semzing a, tualeh ken zong nna ka sem zing,” Jesu’n a chihbang in, ni sagihni a khawlna kammal i muh ziak un, Pasian in sil zousiah a khawlsan chih ahikei a, ni sagihni in a tawlnga zaw hi.

Thupha: Ni sagih ni a Pasian in thupha a piakte ahihleh a silsiamsate ahi. Thupha chih kammal tawh kisai Simmun 5 na ah zong a om a, a et theih diing hi. Tualeh Thupha pia i chih chiang un, deihsakna, huamnate a langtang a kilatsakna ahi a, hoihna diing tupna ahi hi.

Siansuah: Pasian in a silsiamte thupha a piak bek ahikei a, a siansuah hi. Siansuah chih kammal in a gen ut pen ahihleh “A tuam a khenkhia/ tuamkoih, ni dangte tawh kibanglou a tuamkhen” chih hi (Pawt 20:11).

Siamc 2:4-9. Siamchiilna Taangthu Dang: Silsiamna pen zawhsiang ahihdante, siansuah leh thupha piak ahihdante muta lehang zong, khatvei genthak in a hung om kiik a, a baan baan in i enthak diing uh hi.

Siamc 2:4. Toupa Pasian: Mosi in Siamchiil bung khatna ah, Pasian min in Elohim a zang a, tu in a zakdan tuamdeuh in Toupa Pasian (Yahweh Elohim) a chi hi. Yahweh kammal in a taklat ut pen ahihleh, Pasian pen Toupa ahihna ahi.

Hebrew a Yahweh kichi kammal kizak chiang in, Pasian pen amite tawh a thukhun tungtawn a a kitanauna ua “Hehpihsiam Pasian, itna a dim Pasian, mi lungsiatna a dim Pasian,” ahihna taklatna dan in a na chiamteh uh hi.

Siamc 2:4-5. Pasian in vaan leh lei a siamlai in: Siamc 1:2 na a i muhbang un, Pasian in lei a siam chiillai in lei pen lim-le-meel neilou, a hawmpi ahi. Hichih hunlai in Pasian Kha in leitung a opkhum hi. Hih tungtaang thu pen, Simmun nihna, Siamc 1:2 na ah, kimtak in a om a, a ne enthak in.

Tua i muh uh “Pasian in vaan leh lei a siam,” i chih a, “Siam chih kammal pen, Bara (bangmahlou pan a banghiam siamna) hilou in, Asah chih ahizaw a, hih in a gen ut pen ahihleh, lemtuak hiam hoihtak a bawlpha or shapping a chihna ahizaw a, tualeh hisung a hoihtak a bawlphat a om pen Eden huan ahi chi a gen in a om hi.

Siamc 2:5. Singkung leh lou-hingte om masang a leitung omdan (condition): “Leitung a singnou a om masang leh, anteh lou-hingte leitung a a pou masang in, Toupa Pasian in leitung ah guah a zusak nai kei a, tualeh kuamah leitang khou diing a omkei hi,” chih thu ahihleh, Pasian silsiam ni nihni leh ni thumni kikaal a leitung omdan (condition) ahi chih kichetna pen Siamc 1:11-12 na ahi. Tualeh hichih hunlai in Pasian in mihing a bawl naikei a, tualeh Eden huan zong

bawl nailou ahihziak in, leitang khou diing mi a omkei hi.

Tualeh Siamc 2:5 na a i muh uh, “Toupa” chih kammal pen Hebrew ah Yahweh ahi a, Thukhun Lui Bible ah 6823 veitak, Pasian min leh Pasian genna in a kizangh hi (Siamc 2:2 hilhchetna ah zong en in). Tualeh “Pasian” chih zong a Hebrew ah “Elohim” chih ahi a, hih tawh kisai pen Simmun nihna, Siamc 1:1 hilhchetna ah i na genta ua, huasung ah muhtheih in a om hi.

(Siamc 2:5, Hilhchetdan Tuam Khat: “Toupa Pasian in leitung ah guah a zusak nai kei a, tualeh kuamah leitang khou diing a omkei hi.” Hisung a Leitung chih pen, leitung pumpi genna ahikei a, Eden Huan genna ahi. Toupa Pasian in Eden Huan ah guah a zusak naikei, chihna ahi a, tualeh “Leitang khou diing a omkei,” chih pen, Eden huan khou diing mi om nailou chihna ahi chi a hilhchian pawl zong a om hi.)

Siamc 2:6. Lui hung pawtkhia: “Hilezong leitung a kipan in lui a hung pawtkhia a, leitangh pumpi a tapnom hi,” chih Bible a i muhdan uh ahi a, hisung a kigen lui pen Sap haam ah “Stream” chih ahi a, hih lui pen lei nuai a hung kipan a gen in a om hi. Tualeh, hichibang ahihlai in, mi khenkhat in, hih lui pen lui hilou zaw diing in, tualmei, tui-hu tawh kibang, tuipua meei leitang pan a hung pawt in leitung a tapnom ahi, a chi ua, hichibang ngaihdan neite’n Siamc 2:6 a “Stream-lui” chih pen “Mist-Tuihu” chi in a na let (translate) uh hi.

Siamc 2:7. Hinna nei mihing: Simmun Nga-na, Siamc 1:26-27 na a i muhbang un, Adam mihing hinna pen Pasian in bangmahlou a kipan in na bawlta lezong, a lei taksa pen yatsar (bawl) tungman a kipan a bawlkhiak ahi a, hilezong a huu a khakkhum masang in a hingkei chih i mu uh hi. A omdan pen, Pasian in tungman a kipan in mihingte leitaksa a

chiil a kipan a, a si diing a, a siam ahikei a, hilezong khelhna ziak a, a sih ngei diing uh a theihsa ahihziak a hinna singkung zong a siam ahi,” chih ahi a, hih Hinna Singkung tawh kisai a ngaihdan nihte lak ah, a nihna pen dikzaw in kipom hi.

TBC (ABA) Kilakna Hilchianbu Part-2 ah, “Hinna sing- Hih in taangtawn hinna a genna mah ahi a, tatlou a agual zawlna genna ahi. A tomlam a gen in taangtawn hinna leh tatlou a agualzawlna omzing diing a genna ahi (Ezekiel 47:7,12),” chi in a na kigelh hi.

Sia leh Pha theihna singkung: Sia leh Pha pen singkung khat pan a gah ahihziak in a tuamtuam in a kikhen theikei hi. Sia a tuam a koih a, pha (hoih) zong a tuam a i koih diing ua ahihleh a singkung pen phelnih i suah uh ngai diing ahi a, tualeh hih singkung a kiphelsuah a ahihleh si diing ahihman kiphelsuah theilou suak hi.

Hibang a singkung khat sia leh pha a hin khawm bang in, mihingte hinna ah zong sia leh pha a hing khawm a, tualeh a sia (hoihlou) pen eimah mah in i dou uh a ngai a, i sung ua i hinsaklouh uh a ngai ziak in, Jesu’n nouma cross pua in hung zui un, (Mt. 16:24) a na chi hi.

Tualeh Norman Geisler in a genna ah, “Pha (Hoih) in amah ah hinna a nei a, hilezong Sia (hoihlou) in amah ah hinna a neikei a, tuachiin hoih sung ah amah pen a va-hingzaw hi; hichibang ahihziak in hoih omna zousiah ah hoihlou zong a kimuthei hi,” chi in a laibu ah a na gelh hi.