GENESIS/ SIAMCHIILBU HILHCHETNA (E-010) 23-03-2015
SIMMUN
10
Text : Siamc 3:8-13
Thupi : Khelhna Kipiaktuahna
Taangvom : Adam in, “Ka kiang a om diing a n'ung piak numei in, tua singgah a hung pia a
ka nek ahi,” achi hi.
Siamc 3:12
Thupatna
Adam leh Evi a khial diing utlou a, Pasian
mai a, a ki-ngohna uh i muhbang un, leitung a mihingte lak ah, a khialzaw hih
diing utlouhna a lian mahmah a, Adam leh Evi mahbang in, khelhna i kipia tuah
ua, hua pen i innsung uh leh khotaang ua diing in zong, sil hoih ahikei a,
hilezong i pai theikei uh hi. Pat-taktak a kipat-thak ngai ahihna theizing kawm
in, i simmun ua zil diing a poimawhte zilkhiat sawm in, i en diing uh hi.
Siamc 3:8. Singkawm a kibukna:
Ama'un Toupa Pasian nitaaklam ni neem chiang a huan sung a a vakna thawmging a
za ua, tuachiin Adam leh a zi, Toupa Pasian muhlouh diing in huan sung a
singkawm lak ah a kibu uh hi.
Eden huan a Pasian vakna (walking):
Pasian vakna thawmging Adam leh Evi in a zaak pen uh, a bik-kha uh maw ahihke’h
a taktak? Chih mite’n a na genna uah, “Hih hunlai a Eden huan a Pasian vakna
(walking) chih in, Pasian pen keeng a vak (walk) thoh ahihna lam a gen hi,”
chih lam in a genzaw ua, tuachiin a tawp ah, “Hichih hunlai in, Pasian in
mihing lim-le-meel pua ahi ngei diing a, tuachi a mihing bang a vak (walk) ahi
diing hi,” a chi uh hi.
Kibukna: Adam leh Evi
ahihleh, a sia-le-pha theihna un ama’uh mah mawhsakta ahihman in, ni dang a,
Eden huan sung a Pasian tawh nuamtak a, a na kikhawl khawmna ua kipan in,
ama’uh leh ama’uh kihepkhiat sawm in a na kibu uh hi (Rom 2:12-16).
Siamc 3:9. Khoi a om na hia?: Pasian
in mihing a khialta chih a theilou ahikei a, tualeh Adam a omna a theihlouh
ziak a, khoi a om na hia chi a zong, a zon a hikei a, khial a hihdan Adam in a
theih na diing a, khoi a om na hia, chi a, a sap ahizaw hi; tualeh Pasian in
Adam a vasap teitei na ziak dangkhat ahihleh, Adam in a sil bawl diklou pen a
pom a, Ama (Pasian) lam a, a kileh a, huachiang a Pasian in a na ngaihdam diing
pen, Pasian deihna ahihziak ahi, zong a kichi hi.
KJV Bible in a genna ah, “Pasian in a
siamsa mihing, tu a khelhna ziak a kikhen hitale-uh zong, Ama khutsuak ahihziak
in, a manthat diing a deihkei a, tuachiin a zonkhiat sawm teitei hi. Huaziak in
Adam kiang ah dokna tawh a hung pai a, mawhsakna tawh a hung paikei hi,” a chi
hi.
Siamc
3:10. Laauna: Pasian in Adam kiang a, “Khoi a om na hia?” a vachihtak in
Adam in, “Na thawmgin laau in ka kibu hi,” chi in a na dawng hi.
Hih Laauna pen meelma ahihkeileh gaal
laauna bang ahikei a, hilezong mahni kisiamtan louhna, mawh kisakna hiam, khial
kisakna ziak a laauna ahi. A tomlam a gen in, khelhna, eimah leh eimah khial
kisakna in ei hung suangpa tung ah laauna a hung tun hi.
Siamc 3:11a. Guaktang a om na hih kuan
hung gen e? Pasian in hih dokna pen a theihlouh man a,
a dok ahikei a, a dawnna diing zong hoihtak a, a theihsa ahi. Hilezong ziak
neitak in a dong hi; hua pen ahihleh, Adam in Pasian thupiak zuilou a, a na
gamtatna pen a theihkhiat a, Ama (Pasian) kiang a, hua hunlaitak mah a,
ngaihdam a nget theih na diing a, Pasian in a dok teitei ahizaw a, hilezong
Adam a khelhna a theikhia theikei a, Pasian mai ah zong, a ngaihdamna a ngeen
kei hi.
Siamc 3:11b-13. Mawh Kipiaktuahna: Pasian
in Adam mawhmat sawm a, a kiang a, “Na nek louh diing a k'ung thupiak
singgah na nek maw?” chi a, a doklai in, Adam in, khial ahihna a kipomna
leh amah siampa thupiak a zuihlouhna pomdan siam kawm a, “Hi” ahihkeileh “Ka na
nekha mah hi,” chih kammal tawh a dawn diing hinapi’n, “Ka kiang a om diing a
n'ung piak numei in, tua singgah a hung pia a, Ka nek ahi,” (t.12) chi in,
ahilou lamtak ah a dawng hi.
Adam in a khelhna azi pesawn:
Adam in ama kam vateek tawh, Pasian mai a, a khelhna pen a phuankhiat na diing
in, Pasian in dokna dong a, hilezong ama’n hua khelhna pen ama khelhna a pomlou
in azi Evi tung ah a tun zawsawpta hi.
Adam in a khelhna a zi a piaksawn mahbang
in, tulai in zong, i khelhnate uh mi dangte kipia nuam mahmah hi.
Evi in amah khelhna pen Guul pesawn:
Adam in a khelhna pen ama khelhna a pomlou a, azi Evi kiang a, a piaktak in,
Pasian in Evi kiang ah, “Bang chi daan ahichi gamtat na hia?” a chi hi.
Tuachiang in Evi in zong, a pasal Adam mahbang in, ama sil bawlkhial pen mu lou
in, a khelhna Guul ziak ahi, chi in guul a ngawh hi.
1Tim 2:14 na in, “Adam kheem in a omkei a,
hinanleh numei kheem in a om a, bawh siatna ah a pukta hi,” a na chihbang in,
Evi kheem in a om hi.
Tualeh hih kheemna pen kikheemna dan
bangtak in a hung paikei a, kizolna, kichialna leh kiheelna (pasal in numei
lunglut tak a, a vaheelna) tawh kibang in a hung paizaw a, kheemna dan in kimu
masa khalou zeel hi.
Tepteh diing:
Pasian in Adam leh Evi khelhna kanchet sawm bang a, a kilatna ziak pen, Adam
leh Evi in, ama’uh kam vateek a, a khelhna uh a kiphuan ua, tuachi a Pasian in
a huntak a, a ngaihdam theih na diing ahi a, hilezong khelhna kipia sawn uh
ahihman un, a huntak ah Pasian in a ngaidam theikei a, tuachiin a khelhna man
uh a muh sam uh a ngaita hi.
Mi dangte khial a puuksakna pen khelhna
ahi. Satan in hih khelhna pen Eden huan ah na panta ahihman in, ama kiang ah
bangmah kidong lou a, thukhenna kipia zaw hi. (1 Timothy 4:12; Matthew 5:13-16;
18:6,7; Titus 2:7,8; 1 Peter 2:11,12; 2 Corinthians 6:3; 8:20,21; 1 Corinthians
8:9-13; 10:23-33).
Comments
Post a Comment