GENESIS/ SIAMCHIILBU HILHCHETNA (E-008) 16-03-2025

 

SIMMUN

8

 

Text                : Siamc 2:18-25

Thupi              : Adam leh Evi

Taangvom      : Tuachiin Toupa Pasian in, “Adam amah

                           bek a, a om a hoih kei; amah huh diing leh

                           kithuahpih diing khat ka bawl sak diing,”

                           a chi hi.

                                                      Siamc 2:18

Thupatna

Laisiangthou sung ah, Pasian in mihing a siamna thu bangzah hiam muhtheih in a om a, a siamdan diktak pen kichiantak a gelh in a omkei hi. Tualeh Pasian in mihing- numei leh pasal a siamna pen Siamc. 2:7, 21 na ah a kimu hi. Ama’uh tegeel pen, anih ua Pasian lim-le-meel sun a siamtuak hile-uh zong, a taksa uh pen a kibangkei a, a mohpuakna uh zong a taksa uh kibaklouh mahbang in a kibang kei hi.

Siamc 2:18. Pasian in banghiam hoihlou khat a mu hi: Amasa pen a diing in, Pasian in hoih a saklouh banghiam sil khat a mu a, hua pen ahihleh a siamsa pasal tangkhatna (the aloneness of man) ahi.

Pasian in a siamsa mipa pen kiteenna tawh kisai hiam ahihkeileh vaantaang tawh kisai in hitale-zong, tangkhat hi diing in deihlou hi. Tuachiin Pasian in Adam huh diing leh kithuahpih diing khat ka bawl sak diing a sawmta hi.

Huh, kithuahpih ahihkeileh panpih chih pen Hebrew ah “Ezer” chih ahi a, hih pen Pasian mizia kilatnate phuankhiatna ahi hi. Esakna, “Amah eite hung huhtu ahi; amah eite haatna ahi; amah eite hung tankhiatu, eite hung panpihtu chihte ahi. Tuachiin Ezer chih kammal pen Pasian in numei masa pen genna in a na zang hi. Atomlam a gen in, Nemei pen pasal panpihtu, pasal a diing a ahaatna hi diing a siam ahi a, a puukna diing a siam ahikei hi.

Numei masa pen genna a Pasian kammal zak “Ezer-Panpihtu” chih in gamgi a neikei a, tawndan ah eh khotaang ah zong, cultural restriction neilou leh gamgi neilou ahi.

Siamc 2:19-20. Minpuahna: Hih minphuahna tawh kisai pen, Simmun nihna ah zong i na muta uh hi. Pasian in a silsiamte min a phuakna pen a silsiamte tung a toupa (lordship) ahihna ahi a, tualeh Siamc 2:19-23 na a i muh uh, silsiam Adam in a min diing uh a phuaksakte lak a numei zong a pang a, hua in a gennop pen ahihleh, silsiamte leh numei tung a toupa (lordship) ahihna ahi. Simmun nihna, Siamc. 1:5 na ah, hih tawh kisai kichianzaw in a om hi.

Adam kithuahpih diing omnailou: Pasian in Adam kithuahpih diing khat piak a sawm lezong hichiangtan a, a piak nailouh ziak in, a kithuahpih diing a omkei, chih i mu uh hi.

Siamc 2:21. Adam ihmut kaal in: Pasian in ganta zousiah Adam kiang a, a paipihlai in, Adam in a min diing uh a phuaksak chiat a, hilezong hua gantate lak ah, ama’n a deihbang a, a kithuahpih diing a mukei hi. Tuachiin Pasian in Adam a ihmusak a, a ihmut kaal in a nakguh khat laksak hi. Hih pen Bible a Surgery kimu masa pen ahi. Tualeh Bible ah Pasian in mi a ihmutsakna leh a ihmutsakdante Siamc 15:12; 1Sam. 26:12; Is 29:10-nate ah muhtheih in a om a, hih pen “Divine anesthesia – Pasian khimh” chihna ahi. Tuachiin Toupa Pasian in Adam a ihmusak a; tualeh a ihmut kaal in ama'n a nakguh khat a la a, tua mun pen satel in a sukdimsak hi.

Siamc 2:22. Nakguh: Judahte’n numei tawh kisai a, a genthang uh, a tawndan ua thuchin khat a, a chiamteh khat uh ahihleh, “Pasian in numei a bawllai in, pasal keengnuai a kipan in a bawlkei, tuachi a pasal in a thunuai a, a pumkoih louhna diing in, tualeh a lu tung a kipan in zong a bawlkei hi; tuachi a numei in a thuneih khumlouhna diing in, hilezong, amahnu pen pasal baan (arm) nuai a kipan a bawl ahi; tuachi a pasal in hoihtak a, a kepna diing in; tualeh amahnu pen lungtang tawh kinaitak a kipan a bawl ahi; tuachi a, pasal in a it mahmah na diing in,” chih ahi.

1Kor. 11:3,8 nate a i muhbang un, numei pen pasal a kipan a siam ahi; tuachi a pasal in sil dangteng saang a, a zi a ngaihsak masak pen na diing in ahi. Hih pen Eph. 5:28 na a i muhbang ua, nupate kipumkhatna a kipna diing a, pasal in a zi pen amah taksa a it a, a kep a, a poimawh ngaih bang a, a it diing, a kep diing, a poimawh ngaih diing deihna ahi. Hibang kipumkhatna diing a mohpuakna pen pasal tung ah ki-ngazaw deuh hi. Aziak pen numei ahihleh pasal nakguh ahi hi.

Siamc 2:23. Kei bangbang: Adam in lamdang asak baan a sil siamte lak a zong muhnop asak pen hi diing a gintat-huai pen ahihleh numei ahi. Tuachiin, “Hih pen, kei guh bang guh nei, kei sapuak bang nei; mihing a kipan a lakkhiat ahih man in numei chih diing ahi,” a chi hi.

Hichibang a Adam in a minphuakna pen a thuneihna ahi chih a kichetna ahihleh Kis. 30:6-8 ahi. (Bible taang na etbeh utleh, Siamc 3:20; Kis. 30:6-8). Taanglai mite lak ah zong hihchibang minphuakna pen thuneihna dan in ki-ngaihtuah hi (Siamc 2:19-20 en in).

Siamc 2:24. Nusia (Leave): i Bible un, zi ziak a nu-le-pa (parent) nusia diing in a hung chi a, eite lak ah lah, nauzaw inntuan chihlouh nu-le-pa nusiat chih pen sil hithei ahikei hi. Tuaziak in NUSIA chih kammal hoihtak in i ngaihtuah thak diing uh hi.

Kiteenna in, pasal in deihsakna a piak masak zawkna diingte  (priorities) a kikhelsak hi. Hih pen kiteenna a pasal mawhpuakna in a phuut sil poimawhtak ahi. Tualeh Pasian in kiteenna a na ordained ahih mahbang in a guide zong a ngai a, tuachiin a guide nate lak ah, pasal in a nu-le-pa a nusiat diing a pangkha hi. Hih NUSIA chih kammal in a kawk or a gennop pipen ahihleh pasal in amah bangbang a zi pen, na zousiah leh sil zousiah, baan ah, mi zousiah saang a poimawhzaw a aneih diing, a khatna a akoih diing, chih ahi.

Siamc 2:25. Zumlou: Zumlou chih kammal in, guaktanna lam saang in, bang diing a mihing in puan a silh diing e? chihlam a genzaw a, hih pen puukna ziak a khophawklou a omna (innocency) a beitak in zumna a hung tung hi. Puansilhlouhna tawndan (culture) pen khelhna in puansilhna tawndan (cuture) ah kikheeksak chih diing ahi.