TUUMTEH LAPSAANNA NIPINI (PALM SUNDAY) thumna

 

By: Pastor Thangdoulal Suantak

Series 03 Topic: Jerusalem Khopi a Jesu a pua luut Sabiltung a Kipan a Theih Diingte

Bible taangteel, Matt. 21:1-11.

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in Palm Sunday chibai ka hung buk hi.

 

Tuumteh lapsaanna nipini a Hosana chi a kikou pen, nopsakna daan a ngaihsun, leh a ngaina or Saptuam paidaan khat a ngaihsun pawlkhat a ki-omta lezong, lungsim a Jesu en kawm-kawm a Hosana chi a kikou bangzah hiam i om diing uh ka taksan ziak in Toupa min ka phat hi.

 

Jesu Khrist eima liangkou a puakna pen, a taangthu theihna, a hinkhua theihna, leh a biography theihnate tawh a kibang kei hi. Aziak pen, hih theihna haute’n a theihna bekbek uh a gen ua, hilezong a hinkhua ua muh diing in Jesu meel a kilang kei hi. D.L. Moody in, ‘Lungnoute leh kauphete in a teenna uh singteh lim-le-meel a pawthei ua, hilezong Khristiante’n a kiphuhkhiatna uh Khrist meel a pawthei kei uh hi,’ a chih bang sim in, Jesu Khrist sisan a tatsa, Khrist tungtawn a kipawlkhawmte omna munte ah Jesu’n mun neilou dekdekta hileh kilawm mahmahta hi. Innsung leh kholai lak a kamtam, gen diing thei kichi mi tamzawte ahihleh, Jesu Khrist theihthohte, a pian a kipan a a sih dong hoihtak a suuttheite ahi ut deuh taangpi hi. Hilezong a hinna a Jesu Khrist lim-le-meel pua, a liangkou a Jesu a pua mite pen kilamdang deuh uh hi. Tualeh Palm Sunday ni chiang a thu ki-gen taangpi ahihleh, Jesu, Jerusalem, leh mipite thu ahi taangpi hi. Hilezong tuni’n a minthanglou, mi tamzawte lungsim a zong omkha khollou Sabiltung a kipan in ki-thuhilhna tamlou hih a nuai a bang in i nei diing uh hi.

 

1. Jesu Khrist Puakna.

 

Jerusalem khopi a Jesu a luut ni in a keeng in a pai kei a, Sabiltung tung ah a tuang hi. Hih Sabiltung pen vanhpuak leh nna sepnate tawh kisai a kizilna neilou ahi. A kizak hun zong chingnailou ahihman in nna sepnate leh vanhgik puakna kichite ah theihna bangmah a neikei hi. Hilezong hibang theihna leh kizilna neilou khat in, kg 60-90 tuampawl a gik diing Jesu a bangchipuak e? chih pen a lamdang khat ahi. Hih Sabiltung in Jesu a puakzawhna diing in bang a bawl a? Bangchibang in pan a la a? chihte limtak a i ngaihsut leh, a kimuthei khat bek a om a, tua pen Jesu Khrist lak a KI-NGIAMKHIATNA ahi.

 

Hih Jesu Khrist lak a Ki-ngiamkhiatna chih kammal in a gen ut pen ahihleh, Jesu thuneihna nuai a omna ahi a, ei ut bangbang a Jesu kaihna hilou in, Jesu chih bangbang a paina genna ahi. Lak-louh Sabiltung in Jesu a puakzawhna ziak pen a ki-ngiamkhiatna ahi. Jesu thunuai ah omta ahihman in pawzou hi.

 

Ki-ngiamkhiatna hinkhua na neihkei a, Jesu thunuai a na omkei leh, Jesu na pawthei kei diing a, kuamah in zong hung pahtaatlou diing hi.

 

Jesu Khrist thuneihna nuai a om kawm-kawm a Sabiltung in Jesu Khrist a puak chiang in, a paina diing lampi ah puante a kiphahsak a, ganta simmawh-huai penpen hinapi, ganta hampha pen suak hi. Nang zong na ut leh hih Sabiltung bang a hamphat saangthei, tangthei na hi. Jesu Khrist thuneihna nuai a om pen neuna hilou a, hamphatnate, letnate, leh mite ngaihsaannate ahizaw hi.

 

2. Jesu Khrist Puakna Diing in Jesu a Kipumpiakna Poimawh Hi.

 

Ei Khristian kichite pen, Jesu Khrist kiang a eimah leh eimah kipumpiak a, ‘Ka Lal (Kumpipa) leh ka Hundampa in k’ung saang hi,’ chi a Jesu a diing a kipekhiate i hi uh hi. Hilezong hibang a i kipiaknate uh mangngilh a, lungsim a Jesu Khrist kiheimangsan chihte bang zong a ki-omthei zeel mawk hi. Tuaziak in Jesu a diing a na kipia a, ‘Ka Lal (Kumpipa) leh ka Hundampa in k’ung saang hi,’ chite’n Jesu kiang a i thukhun bawl pen uh mangngilh lou diing in i ki-ngen ua, tualeh hibang a Jesu Khrist ‘Ka Lal (Kumpipa) leh ka Hundampa in ka saang hi,’ chinailoute’n zong Jesu tawh kilemna lampi, i Siate uh tungtawn a zong a, Pasian tawh kilem diing in i ki-ngen uh hi. Aziak pen Pasian saang a manpha gou dang bangmah omlou hi. Pasian neite gou manpha nei ahi a, a neiloute gou manpha neilou ahi uh hi. Pasian pen insurance zousiah kimna, taksa hinna leh kha hinna insurance hoihpen ahihna ah, Pasian tawh kilep a, a kiang a i kipumpiak diing uh poimawh mahmah hi. Khristian ka hi, Pasian ta ka hi, Saptuam ah zong ka min ka khumta hi, chi a, a hinkhua a Jesu lim-le-meel kilahna leh Pasian sut or bakna muh diing omloute pen, amah leh amah kikheem ahih baan uah, Pasian leh mipite kheem zong ahi uh hi. Bangteng hileh Jesu kianglam zuan mengmeng diing in i ki-ngen uh ahi.

 

3. Jesu Khrist Puakna Pen Ama Thupina Diing Ahi.

 

Sabiltung in ki-ngiamkhiatna leh ki-pumpiakna tawh Jesu Khrist tawisaan a a omna diing a a puak leh, tawisaan in a om taktak a, tualeh hibang a mite’n Jesu a tawisaang chiang un, Jesu omna Sabiltung zong, a liangzaang a a puak Jesu tawh tawisaan khawm in om hi. Jesu Khrist thupina diing in i hinkhua uah, Jesu lim-le-meel paw ni hang in, Jesu a diing a phatuam ngaihna leh punna a omtheihna diing in pan i la zaw diing uh hi.

Sabiltung in Jesu a puak sungteng, mite’n a paina diing lampite ah puante phah in, sawl phahthei in sawlte a phah ua, a keeng a leitangh a sik or a tot diing zong phallou uh hi. Nang zong Jesu na hinkhua a na puak a ahihleh, Sabiltung hamphatna bang hamphatna na mai ah om hi.

SIMTUTE TOUPA’N AMA MINTHANNA DIING IN THUPHA HUNG PE CHIATTA HEN…….