TUUMTEH LAPSAANNA NIPINI (PALM SUNDAY)

 

By: Pastor Thangdoulal Suantak.

Series 01 Topic: Tuumteh Lapsaanna Nipini (Hih pen, Jesu, a belaam huang a a luutna ni ahi)

 

LST Matt. 21:1-11 nate a i muhbang un, Jesu gualzou a Jerusalem a, a lut ni pen Palm Sunday i chi ua, Palm Sunday chih kammal pen ei ham in Tuumteh Lapsaanna Nipini chih mai diing in hoih pen leh kilawm i sa uh hi…

 

Bible a i muh uh Tuumteh i lakna uh Tuumsing ahihleh;

Ps. 92:12-na dungzui in Diktatna lim a hi.

 

Tualeh Lev. 23:40-na a, Toupa pawi ni sagih sung bawlna diing ah, a ni khat ni in tuumsing baate zong tawi in a na om a, hibang ahihziak in O.T hunlai in Biakbuuk pawi leh Tuumsing in kizopna hoihtak a na nei hi.

 

Jesu hunlai in zong, Jewish National Symbol a na hita hi.  Tualeh a khonung in ah zong hih tuumteh lim na kituangsak hi. Hih pen English a a kigelhna khat ah, ‘minted by the insurrectionist during the Jewish war against Rome in between A.D. 66-70, and 132-135,’ chiin a kigelh hi.

 

Tuachiang in, Jewish community sung ah, hih Tuum pen, Nampi in a kineppih uh sil theihsakna daan in zong a na kizangh hi.

 

A khonung in Rabbinic Sources in hibang in a gen hi, “It is the one who takes a palm branch in his hand, we know to be the victor,” a na chi hi.

 

Greco-Roman gam in, tuumteh pen gualzawhna lim lahna daan in a na thei uh hi. Tualeh Saptuam Pa (Church Father) Origen in zong, ‘Gualzawhna lim, sa tung a kha gualzawhna limlahna ahi,’ a na chi hi.

 

LST Deut. 16:16 in a gen bang in, Paikaan Pawi zangh diing in Judah mi honte, mun tuamtuam a kipan in Jerusalem ah a hung kikhawm uh hi. Hih hunlaitak in Jesu zong Jerusalem a luut diing in a kisa hi. Hih hun pen Jesu’n Judate tung a vaihawm Farisaite, Sadukaite, leh Laigelhmite muhdah a tanlaitak zong ahi. Hilezong a thu nung-le-ma theichian lou mipi honkhat in a nung a zui ua, Hosana chi in a kikou uh hi.

 

Hih Hosana chi a kikoute ahihleh;

1. A taangthu na za a, amah ngaisang, guamtuam, bial tuam a om mite ahi uh hi.

2. Judahte sahkhua a kipia mi, Paikaan Pawi masang a kisiansuah diing a hung kuan masate ahi uh hi.

3. Mi taangpi, lamkai a panglou, leh Amah hunlai a mi thupi hiloute ahi.

Bangteng hitaleh, TUUMTEH LAPSAANNA NIPINI tawh kisai a tutung a i gen ut pen uh, hih a nuai a bang in a gual diing uh hi.

 

1. Jesu Kipak Mahmahna Ni Ahi.

Bangziak a tuumteh lapsanna nipini pen, Jesu kipak mahmah ni hung hi ahia i chihleh, mawhna tawh kidim nang leh kei a hung tatkhiatna diing a a belaam huang a a luutna ni ahihziak ahi.

Thukhunlui Laisiang Thou in, hih tuumteh lapsanna nipini pen, Paikaan Pawi a kizak chiang a mite mawhna tatna diing a, kithoihna diing belaamnou a kul or a buuk a hawlluutna ni ahi chih i mu uh hi. Jesu pen Pasian belaamnou ahi a, Paikaan Pawi chiang a mawhnei eite kitatna diing a zak diing ahihziak in Pasian in a belaamnou a kul or buuk ah a hawllut a, hih ni pen Thukhun Thak ah Tuumteh Lapsaanna Nipini suak hi. Pasian in eite hung it mahmah ahihziak in, Jesu’n mawhneite kitatna diing a gawh diing ahihna a kipakpih mahmah hi. Na theisiam in, na theisiam kei zong in, Khrist in nang a diing a a bawlte, a thuaknate, nang a diing a sih diing kipak-huai a sakdaante, leh a itna a mawk in beilou diing ahihziak in, Khrist kiang ah kileh ni hang in, Amah tawh mapangkhawm ni. (LST, Eksodas 12:-1-6, Matt. 21:1-11, nate a na sim in, Ginna leh Pasian itna nei a na simleh, Pasian in hung ompih in, hung hilhchian diing a, na hinna thaksuak diing hi).

 

2. Mite’n A Kumpipa Uh Theilou Uh Hi.

Leitung mi, Khristian hi in, hikeita leh, mi tamzaw in a hinkhua ua a kumpi uh theilou ua, eite lak ah zong, i hinkhua ua i kumpipa uh thei kitawm mahmah diing in ka gingta hi.

Zekariah 9:9 na ah kigensa hilezong Judahte’n a kumpipa uh theilou uh hi. Hih Judahte mah bang in ei Khristiante’n zong i hinkhua ua i kumpi uh kitheilou khathei zeel mawk hi.

Nang Jesu Khrist na lal, na kumpipa leh na hundampa in na saangta hiam? Hi, ka saangta hi, na chih leh na nisim hinkhua a na kizakdaante enthak inla, bawl dik a ngaihna mun bawldik mengmeng in. Jesu pen ka hinna kumpipa ahi a chite’n, ‘Na omdaan uh leh Khrist Taangthupha kituaksak un,’ (Phi. 1:27) chih thute a kipaakpih diing uh hi. Jesu Khrist ka LAL ahi chi napi a, A thu zuiloute i hih diing uh laau-huai hi.

 

3. Hosana!..... Hosanna!......

Judah lungsim a kipan a Hosana omzia ahihleh;

1. Rom leenggam thuneihna nuai a, ka saltanna ua  kipan in tun hung hundam in, chihna ahi.

2. Mipi kivaihawmna a muhsit a ka omna ua kipan in tun hung hundam in.

3. Ka khawtaang hinkhua uh haksatna nuai a kipan in tun hung hundam in.

4. Ka tawndaan uh zuitheilou a, net-ngiam a ka omna ua kipan in tun hung hundam in.

5. Ka ngiamkiatna zousiah uh, muhsit a ka omna zousiah ua kipan in tun hung hundam in, chihte ahi.

Ei Khristian Khrist nungzuite’n zong, Jesu pen a taaksapna awng-hu a, taaksapna a kipan a hung hundam diing bang in i deihbawl khathei zeel mawk un ka thei a, dah-huai ka sa hi. Khenkhatte’n a tate uh a siatlouhna diing bek un Pasian a awi or a bia ua, khenkhatte’n a tate uh zu-le-sa a kipan a a sianthouna diing bang un, khenkhatte’n neek-le-taak, sum-le-paai, silh-le-teen chihte kitaaksapna a kipan a a kibukna diing un Pasian a bia ua or Saptuam ah a kipeluut ua, khenkhatte’n lah, a sih chiang ua kivuina leh banghiamte a buaina a omlouhna diing bang in Pasian a bia or Saptuam ah a kipia uh hi, kichi leh kikhial lou maithei diing bang khop in, i hinkhua zakdaante uh om khathei zeel mawk hi.

Hosana chi-chi napi hang a, hutdam a i omlouh khaak diing uh laau-huai a dah zong huai mahmah hi. I Hosana sam uh i kiang chiat uah, a taktak in hung tungta hen!.....

Simtute tengteng Toupa’n thupha hung pia hen….