SUAMHAAT MI NIH KIKAAL AH JESU

 

By: Pastor Thangdoulal Suantak

 

Bible: Matt. 27:38, Jesu Khrist tawh suamhat nih zong akilhden ua, aziatlam ah khat aveilam ah khat. Pau. 12:10, … “Migiloute hehpihna omsun zong, a gilou nalai hi.”

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in  Advance Good Friday chibai ka hung buk hi.

 

Jesu Khrist tawh suamhat nih zong akilhden ua, aziatlam ah khat, aveilam ah khat, khailup diing in a om uh hi. Sih diing chihlouh mabaan bangmah a om nawnlouhna dinmun ah a dingta uh chih kitheichian kawm-kawm in hih Suamhaat tegeel a kituak kei nalai uh hi. Leitung ah kithah-kimatnate bek gaal or meelma ahikei a, deihdaan kibaklouhnate ziak in kimeelmaakna a om a, utna kibaklouhnate ziak in kimeelmaakna a om a, duhdaan kibaklouhnate ziak in kimeelmaakna a om a, leh lungsim kibaklouhnate ziak in zong, kimeelmaaknate a om hi.

 

Innsung khat, khawsung khat, Saptuam khat a awmkhawm or teengkhawm kawm-kawm a zong kidou-doutheih gige ahi. Suamhaat tegeel zong sih diing ngak a om hinapi’n kituaklou, kilemlou uh hi. A taktak a chih in, hih Suamhaat tegeel lungsim a kibak diing ahi. Aziak pen leitung ah a kibangte, duh kibang, sepdaan kibang, leh lungsim kibang i chihte a kilem or a kituak taang pi ahi. Hilezong hih mun a a kilemlou, a kituaklou tegeel kikaal ah Jesu va-omkha chiitchiat laizang hi. Hih Jesu pen a lungsim dikte a diing a hamphatna ahi hi. Tuaziak in hih Suamhaat tegeel kikaal a Jesu, chih tawh kisai in hih a nuai a thu poimawhte i enkhawmlai diing uh hi.

 

1. Akilemtheiloute Kikaal Ah Jesu Om Hen.

Kavary mual a Jesu leh Suamhaat mi nihte si diing a a kikhailai un, Jesu laita keileh, or a lai ah Jesu omkei leh, hih Suamhaat tegeel pen, a chil beek uh, or a khaksawh beek uh kiphih unteh chi a ngaihdaan nei zong ki-omtheita ahihna ah, Jesu pen Innsung, Saptuam sung, leh khawsung ah, Kilemna Bulpi ahi i chi masa ut uh hi.

Jesu pen Lei leh vaan kilemna, mi khialte leh mi dikte kilemna zong ahi. Taanglai ipu-le-pate hunlai peveng a kipan a i na theihsa uh Innsung kilemlouhnate, a diak in teekpi leh mou kilemlouhna i chihte pen Jesu a na belhlouh man uh hi diing in ka taksang or gingta hi. Hilezong ei tulai a Khristian kichite lak ah zong hibang kilemlouhnate om nalai hi. Hih kilemlouhnate pen Pianthaklouhna lim khat ahi a, khat pen piangthakta lezong, khat pen piangthaklou chihna ahi. Tuaziak in, mi zousiah in i theih ua i neih diing ua a deih-huai mahmah khat ahihleh, mi khat pouhpouh, meelmanu/pa hiam, ahihke’h i ngaihsaante hiam zong i et chiang un, Jesu mit tawh i entheih diing uh deih-huai ka sa mahmah hi.

Leitung ah a kilemthei taktak bangmah omlou a, kilemna, ki-itna, haksatna, nopsakna i chihte uh zong a paikawi-kawi, a kihei kawi-kawi leh omden diing bangmah omlou ahihman in, i kikaalte uah Jesu omsak ni. Tuni a ki-it i hi a, kimudah i hi zong in, a kikaal a Jesu i omsak kei leh, i ki-itna in khasiatna hiam hung tutthei hi. Jesu panglou in bangmah paitheilou or hitheilou hi chih a thak in theihsiam sawm ni.

 

 

2. Innkuan Kilemlouhna Tawh Kisai.

Matt. 10:34-36, “Leitung ah lemna tunding a hungpai hungsa kei un. Lemna lengsak ding a hungpai ka hikei a, namsau lengsak ding a hungpai ka hijaw hi. Tapa in apa, tanu in anu, mou in a inpinu dousak ding a hungpai ka hi hi; tualeh mihing melma pen ama innsung mite mah ahi ding hi.” Hih Bible taang pen, Innkuan khat a kikhenna ahi a, Innsung a a piangthak pawl, a piangthaklou pawl, leh Jesu nungzui pawl leh a zuilou pawlte kikhen diing genna a hi deuh hi. Bangteng hileh i kikaalte uah Jesu omsak ni, kimuhdah-et geelguul hiam, leh kihehsuahsa a om a, kikheem bawlte a pan a i kikepsiamna diing un, i lai uah Jesu dingsak zaw ni, nang leh kei a diing a gentheihna tampi thuak a singlamteh a hung si Jesu en in, i mawhna diing uh enkei ni, i chitlouhnate uh enlou in Jesu en zawta ni chi’n i kichial masa uh hi.

Nu-lepate’n ei leh i tate kaal a Jesu i omsak diing uh ahi. Tate’n zong eite leh i nu-le-pate kikaal a Jesu i omsak diing uh ahi. Tuabang a i omsak kei leh, tuni a i ki-itna uh leh i kikhenlahna un khasiatna ah hung zawhpihthei hi. Jesu panglou in bangmah paitheilou or hitheilou hi.