SANGGAM MEELMA (E04)
Jesu
Khrist nung ka zuihkhawmpih saptuamte, i Pa Pasian, Tapa Pasian, Kha Siangthou
Pasian min in, kei leh ka innkuante’n lung kituaktak in chibai ka hung buk hi.
BIBLE: Tualeh apa`n a
kiang ah, Tapa, nang ka kiang a om gige nahi a, ka neih zousiah zong nang a
ahi. 32 Kipak tak leh noptak a i om ding hilou
maw? Aziak hih i naupa asi a ahung hingkikta hi; amang a i mukikta hi, achi hi
(Lk. 15:31-32).
Sanggam
Meelma chih kammal pen, ei mite gendan taangpi a
gen diing hilehang, khawmui hun chiang a, mi khat kua hiam hung pai a kimu,
hilezong a meel kimulouh hunlaitak pen Sanggam
Meelma hun a kichi hi. Hilezong tuni a i gen ut uh hih Sanggam Meelma (Khawmui) hun ahikei a, Uta or Unau or Sanggam
kimeelmakna or kituaklouhna or kibaklouhna thu ahizaw hi.
Tutung a i ngaihtuah diing uh ahihleh Tapa Taimang leh
a U-pa Kimeelmaakna thu ahi.
TAPA TAIMANG LEH A U-PA KIMEELMAAKNA
Hih Tapa
Taimang leh a U-pa taangthu ahihleh, Luke 15:11-32 ah a kimzaw in a
kimuthei hi. Ama’uh uta or unau pen, Bible ah kimu chetkei leh zong, a
omkhawmlai ua kipan a kilemlou zong himaithei diing uh hi’n ka gingta hi. Uta
ki-it ki-ngai leh kituaktak a omkhawmte’n pawtmang sawm ngailou uh ahihman in
hih uta or unau tegeel pen a kilemlou sim mawngmawng zong ahi maithei diing a,
hitalezong, ama’uh uta or unau kinialna or kihauna, or kituaklouhna, Bible in
tangtak a a genna a omkei hi. Hitalezong, ama’uh uta or unau kaal ah
kilemlouhna om hi.
Sanggam kaal a kilemlouhna or kituaklouhna
khat pouhpouh a om chiang in, a bawlkhial diing khat a om ngai a, hilezong a
bawlkhial diing a omkei leh hih kilemlouhna or kituaklouhna in bei hun nei
ngailou hi.
Tualeh sanggam kaal a kilemlouhna leh
kituaklouhna khat pouhpouh a om chiang in, nu-le-pate bawlkhial a na om masa
taangpi hi. Ahihke’h unau sanggam kaal a kilemlouhna bulpipen, or zungpipen in
nu-le-pa zong ahithei hi. Hitalezong, tutung in nu-le-pate’n tate lak a a
mawhpuaknate uh leh a panlaakna diingte uh gensawm i hihlouh ziak in, nu-le-pa
chitlahna or bawlkhialte i suutkei diing ua, hinanleh, hih unau sanggam kaal a
kilemloute kaal a kisam bang e? Kitheihsiam louhna bangbang om e? Kibawl dikna
diing bang a om a? chihte i ngaihsut zaw diing uh hi.
Tapa Taimangpa Bawlkhial Bang?
Hih tapa taimangpa sil bawlkhial ahihleh
Bible ah zong a kimuthei hi: Lk. 15:12-16 ah, “A
nauzawpa`n apa kiang ah, ‘Pa, ka goutan diing zousiah hung pia in,’ achi hi.
Tuachi`n apa`n a dangka ama’uh ahawmsakta hi. Ni sawtlou nung in a tapa
nauzawpa`n atan teng ala khawm a, khual gamlapi ah a hawh hi. Aman huamun ah
aneih teng paktat tak in a vazangbei hi. A neih teng a zakbei kiuhkeuh khit in,
hua gam ah kial nasatak a hungtung a, nek ding ahung tasam hi. Tuachîn
apai a, hua gammi khat avabel hi, huapa`n amah vok an pe ding in loulam ah a
nasawl hi. Tualeh vok nek be hawngte a a gil vahsak a ut mahmah a; kuaman lah
bangmah apekei hi,” a chi hi.
Hih
tapa taimangpa bawlkhialte ahihleh, a pa a kipan a vaakmang ut ahihna ah, a pa
tawndan khamta or chimtaakta chihna ahi a, hih pen a bawlkhialte lak ah a poi
or a khawk mahmah khat ahi hi. Ama’n a pa pawtmangsan diing bek a utkei a, ama
utdan leh deihdan bang a om diing a ut a, hih zong a sil bawlkhialte lak a a
poi or a khawk mahmah khat ahi.
Hih
tapa taimangpa’n a pa kiang a a tanvou a nget a, a pawtmang vingveng pen, sil
dik hitheilou ahi, hitalezong, hih tapa taimangpa bang in, eite zong, i pa uh
Pasian kiang a kipan a i ngah uh tanvoute (Pasian a kipan a i tanvou uh
ahihleh; hinna, damna, dangka or sum-le-paai, tanu, tapa, tunu, tupa leh a dang
tampite ahi) tawh vaakmang or pawtmang utte hilehang kilawmtak bang in, i Pa
Pasian uh mizia or zia-le-tong, or i Toupa uh miziate or zia-le-tongte i
gamtatnate uah kilang tamlou hi.
Tapa
taimangpa bang in i Pa Pasian uh tawndante or zia-le-tongte kham-huai or
chim-huai i chikha uh maw?
Tapa
taimangpa bang a i Pa Pasian uh vaakmangsan utte i hikha uh maw?
Tapa
taimangpa bang a hampha i kisaknate uh tawh pawtmang utte i hikha uh maw?
Tapa
taimangpa bang a, eima nopsakna bang a hinkhua zangh utte i hikha uh maw?
Limtak
in ki-ngaihsun in, i Pa Pasian kiang a i kileh uh hun hung tungta ahi. Kisa ni
hang in, i Pa Pasian lam zuanta ni. Nna leh silte kikheel zungzungta ahihman in
Pa Pasian kiang zotna diing a hunlem in zong nang leh kei hung kikheelsanthei
hi.
Tapa Taimang U-pa Bawlkhial Bang?
Hih tapa taimangpa sanggampa’n a bawlkhial
kigentam lou a, thakhat a mawhsakna diing zong omlou phial in kilang hi. A
taangthu uh Bible a i sim leh, a naupa mah kimawhsak chiat a, amah pen
ki-hehpih in ki-lungsiat chiat mawk hileh kilawm hi. Hilezong a bawlkhial
mahmah khat om a, tua pen kimawk muhlou ahihman in, a taangthu uh simkhate
hehpihna or khawtuahna tangdeuh hileh kilawm hi.
Tapa taimang U-pa bawlkhial ahihleh, Innsung a luut utlouhna ahi.
Tualeh hibang a innsung a a luut utlouhna pen, a kiletsakna khat zong ahi hi. Hih
tapa taimangpa leh a pa kihouna Bible ah i sim diing uh hi: “28 Tuachîn
amah aheh mahmah a, a lutnuam kei hi. Apa ahung pawt khia a, innsung a lut ding
in ahung jawl hi. 29 Hinanleh aman adawng a, apa
kiang ah, ‘Ngaiin kum hitanpi hungvak ing a, khatvei bêek zong na thupiak zui
khiallou ing a, hilezong ka lawite tawh gualnop ka bawlna dingin kelnou khat
zong nung pe-ngai kei! achi hi. 30 Hinanleh na
tapa kizuakte kiang a na dangka teng vazangbeipa a hungtun tak in amah a dingin
bawngnou thautak na gohsak pai hi!’ achi hi. 31 Tualeh
apa`n a kiang ah, ‘Tapa,’ ‘nang ka kiang a om gige nahi a, ka neih zousiah zong
nang a ahi. 32 Kipak tak leh noptak a i om ding
hilou maw? Aziak hih i naupa asi a ahung hingkikta hi; amang a i mukikta hi,’ ”
achi hi (Lk. 15:28-32).
Hih
Tapa taimang U-pa pen, a pa genbang a Innsung a luut ut hileh, a sanggampa tawh
a kilem diing a, a pa tawh a kilem diing a, a silate tawh zong a kilem diing
hi. Amah Innsung a luut nuamlou ahihman in Thupha tampi ngahlouh lawh hi or
hamphat diing tampi suplawh hi. Luut ta-pouhpouh leh, a pa amah a diing, a
sanggampa a silate lak a lamkai a a zakh-theih diing, a neih-le-lam zousiah uh
zong amah a hi diing a, amah saang a thupha ngahzaw chihbang omlou diing hi.
Hih
Tapa taimang U-pa bang a inn pua-lam a pangkha na hihleh mi kamsia or vaangsia
hi diing na hi. Innsung ah thupha a om a, innpua ah omlou hi.
Hih
a tung a thute na simna tungtawn in Toupa Pasian in Thupha Hung Peta Hen...
Comments
Post a Comment