NA PASIAN NA KIANG AH OM HI

By: Pastor Thangdoulal Suantak

 

BIBLE: “Leitung leh a sung a sil zousiah bawlpa Pasian pen, vaan leh lei Toupa ahihziak in mihing khut a bawl inn ah a teeng kei hi.” (Nas. 17:24). Biak-inn a Pasian bia diing a mipi kikhawpna pen, kimuhkhawmna lemtaang ahih baan ah, kimeeltheihna leh kineelna hun hoihtak zong ahihziak in, mi tamtak in biak-inn kikhawpna ngai poimawh diak uh hileh kilawm a, tualeh Saptuam tawh kisai a mawhpuakna neite a diing in hih kikhawpna a poimawhzaw seem-seem hi chihtheih diing bang in i gam uah om hi.

 

Biak-Inn A Kikaikeileh Silpiak Kipia Hoihlou??

Eite Pasian pen Kha ahi a Amah a bia mi zousiah in Kha leh Thutak a i biak chiat diing uh ahi. John 1:14 “Pasian ahihleh kha ahi a, abia miten Kha leh thutak a abiak ding uh ahi,” chih muhtheih in om hi. Kha kichi pen ahihleh, i lungsim uh thuzawhtu, i taksa uh lungsim bangbang ua gamtaangsaktu zong ahi. Tuaziak in Pasian na neihleh, na ngaihsutna khenlam pek, na lungsunghiltak ah Pasian a teeng chihna ahi a, hih na lungsunggil a teeng na Pasian in sil diklou na bawl diing tangtak in hung khaamkei nanleh, siam kitanlouhna (guilty feeling) ngaihsutna hung pia diing a, hih in, na kikhawp theihlouh ziak in na silpiak diing daal/nang/kham zou lou diing hi.

 

Biak-Inn Kailouhna In Nang Leh Na Pasian Kaal Daal Maw??

Biak-inn a kikailouh ziak in hibang in omta, hua-chi, kha-chi chi a a kam kaaktheite pen Pasian tawh kizopna hing neiloute ahi. 1Kor. 3:16-17, “Pasian biak-inn na hi ua, na sung uah Pasian Kha a teeng chih theilou na hi uh ama! Mi kuapeuh in Pasian biak-inn a nitsak leh, amah Pasian in a sesak ding hi, hua biak-inn nou mah na hi uhi.” Pasian nei mi khat na hih taktak leh, Biak-inn kailouhna in nang leh na Pasian kaal hung buaisak lou diing ahihman in, na vaangsiatnate biak-in kailouh ziak in ngohkha kei in. Nang pen Pasian biak-inn na hi a, na lungsunggiltak a Pasian phatna leh biakna a om zing diing ahi. Na lungsung a kipan a Pasian biakna leh phatna omlou in Pasian tanu leh tapa hithei mawk diing na hi hiam? Theihlouh mi khat in, “Biak-inn kikailouh pen Pasian tawh hun hoih ka zakkhawm theihna diing a hamphatna ahi,” chi hi.

 

Na Pasian Na Kiang Ah Om Hi

Mi tamtakte’n Pasian pen mun tuam, khoilam hiam a om diing bang in a zong ua, khenkhat in lah, biak-inn sung ah Pasian  a zong nuam sese uh hi. Ka neulai a hutdamna chialpi bawlte’n gamlak a Pasian zong diing in hung sawl ua, tualeh ka mit a ka muh, ka mangngilh theihlouh khat ahihleh, inn-kam leh bang chihte lak a kiluai a Pasian zong pawl zong om hi. Pasian pen biak-inn sung a zon diing hilou a, gamlak a zon diing zong hilou hi. Innkam leh bang a kiluai a zong zon ngailou hi. Amah na kiang a om gige ahi a, biak-inn sung leh gamlak a Amah zong diing a na kuanlai a zong na kiang a ompa ahi. Pasian pen silpiak tawh zong zon a muhsawm diing hilou a, nna sep haatna tawh zong zonkhiat sawm diing hilou hi. Pasian pen pomsiamna tawh kimu ahizaw hi. Nangma aituam diing saanna/pomna kimu leh kinei ahizaw hi. Pasian pen nangma aituam a diing a na laak chiang in, Pasian nein a hi diing a, tuachiang in Pasian in zong nang hung nei diing hi. Pasian pen mi dang a diing hilou a, nang a diing a na kiang a om zingpa ahi. Amah saang in, Ama’n zong nang hung saang diing hi.

Hih thute na simna tungtawn in Toupa Pasian in thupha hung piata hen