Na Nupa Kaal Itna Na Kham Hiam?
Jesu Khrist nung ka zuihkhawmpih
saptuamte, i Pa Pasian, Tapa Pasian, Kha Siangthou Pasian min in, kei leh ka
innkuante’n lung kituaktak in, Innmun pan in chibai ka hung buk hi.
Leitung ah a nu-le-pa itna khamloute, Tate
itna khamloute, Sanggamte itna khamloute, Innsung mite itna khamloute, Lawmta
kaal itna khamloute, Zi itna khamloute, Pasal itna khamloute a ki-omthei a,
hibang itna khamlouhna in khasiatna ah a hung kailuut a, khenkhatte bang
ki-ngaisia in, ama’uh hinna ah, siatna diing bek a ngaihsun uh hi. Khenkhatte’n
lah, an bang a ngawllawh ua, gentheitak in hinkhua a zangh uh hi.
Nu-le-pa khenkhat pen tate itna khamlou in
a nuaktaai ua, tate khenkhat zong nu-le-pa itna khamlou in ki-khasesak uh hi.
Hih tawh kibang in, nupa kaal itna khamloute zong a na buai uh hi. Pasal
khenkhatte bang, a zi itna khamlou maw, khamlua a nuamtat maw kithei zoulou in,
numei dangte lunggulhsan chihbang omthei mawk hi.
Zi leh Pasal kaal a itna khamlouhna in
eimah leh i tate tung ah siatna thupitak tunthei ahi chih theihlou leh ngaihsut
a zong neilou, i gam uah mihing kitam mahmahta a hi diing a, nupa kikhenna thu
gen-le-sak diing tamthei mahmah hi. Lamka khopi a tagah kepna inn, mun tuamtuam
a tagah omte, 2018 kumlai in mi 2000 ahi a, tualeh a luut ut a, a luut zoulou
zong tampi omlai hi. Hih tagahte lak ah a nu-le-pa si saang a nu hiam, a pa
hiam damlai a tamzaw ahi.
I gamsung ua tagah punna bulpi ahihleh “Itna khamching muhlahna,” ahi kichi
leh dik diing in ka gingta hi. Nupas kikhente zong “Itna khamlou a kikhen ahi uh hi,” kichi leh dik diing a gingta ka
hi. Tuaziak in tutung in “Na zi, na
pasal itna na kham hiam?” chih thupi a zangh in hih a nuai a bang in i
kikum diing uh hi.
BIBLE: 1Kor. 13:4 “Itna a thuak-haat a, a
hehpih a, itna in a thangsiat kei a, itna a kiliansak kei a; 5 itna
a kilawmlou in a gamta kei a, amah diing bek a khualkei a, a hehbaih kei a, sil
gilou a ngaihtuah kei a; 6 diktat louhna ah a
kipak kei a, hinanleh thutak ah a kipak hi. 7 Sil
zousiah puakdan a siam a, sil zousiah a gingta a, sil zousiah a lam-en a, sil
zousiah a thuak paisuak hi.”
BANGZIAK
A NA ZI OR NA PASAL ITNA NA KHAMLOUH MAN A NA TATE KHAVATAK A OMSAK DIING NA
HIA?
Nupa tamtak in a theihsiam sawmlouh uh, “Tate khamuanna leh lungkimna,” ahi.
Mihingte pen eima aangsung khual vive i hihziak un, midangte genlouh i tate
na-ngawn deihna leh lunggulhna khuallou a, ei hoihsakna bek paipihte i hi
taangpi uh hi. I tate zong i deihna bang a a om diing uh, i zi zong i deihna
bang a a om diing chihte paipihte i hihman un i it mahmah diing ua Pasian hung
piak i zi-le-tate itlou a, hinkhaw zangh tampi ki-om hileh kilawm mahmahta hi.
Tuachimahbang in nute zong, ama deihna bek paipih sawm teitei hawnkhat a om
hileh kilawm hi.
DEIHNA leh LUNGGULHNA pen ITNA tawh a
kigamla mahmah sil khat ahi hi. Pasian thupiak ki-it diing pen saang in i
deihnate uh leh i lunggulhnate uh poimawh zaw daan a ngaita i hihman un, i nupa
kaal uh ki-itna pen khamching diing om meellou hi.
Nupa kaal a kinialna, kilemlouhna, leh
kituaklouhnate pen Itna kisap ziak ahi. Hih itna a kisap chiang in nupa kaal a
kilunggulhna zong tawm hi. Ei nupa pen a ki-it diing a Pasian bawl or siam i hi
a, i ki-it diing, i ki-lunggulh diing ahi, chi a lungsim kibang neih diing
tupna saang in, i zi hiam i pasal hiam mawhna diing bekbek i zon chiang in
kilemna saang in kisiatna leh kikhenna piangthei a, hibang a kikhenna in eite
mahmah hung nasa hi. Tuni in ngaihsun in, na itna ah na pasal a lungkim in, na
itna kham in na pasal a om hiam? Na zi
pen na it diing a Pasian hungpiaksa ahi a, na mawhzawnna diing hilou hi. Na
itna ah na zi a lungkim hiam? Na itna kham in na zi a om hiam? Na nupa kaal uh
itna a bitkei leh na innsung pen a bitlou chihna ahi. Itna taaksapna ah Bangkim
a kitasamsa ahi a, Itna khamching omna ah sil bangkim khamching in om hi.
TOUPA’N THUPHA HUNG PIA HEN
Comments
Post a Comment