Na Laate Uh Lak a Khat Hung Saksak Un.

By: Pastor Thangdoulal Suantak

 

Bible: Laate 137:1-3. Zion ka ngaihtuah khaak chiang un—Babylon lui pangte lak a tou in ka kap uh hi. Tualeh huasung a Muisum singkungte lak ah ka tumgingte uh ka khai uh hi. Aziak pen sal a hung kaite'n laate a hung ngen ua, kou hung bawlgentheite'n lungnopna laa a hung ngen ua, “Zion laate lak a khat hung saksak un” achi uh hi.

 

Babulon Gam Lungleenna.

Judah mite’n Pasian a kipan in hamphatna, lam tuamtuam a kipan in a ngah ua, tuachiin tua a hamphatnate uh kiletsakpih in hinkhua a hung zangta uh hi. Tualaitak in, ama’uhte thupha a pia Pasian lungsim naa mahmah a hi diing a, Pasian in Babulon mite zangh in, a mite soisa or thuhilhna pia hi.

Nidanglai a Pasian in a mite a thununna or thuhilhna a piak chiang in, gamtuam mite zangh taangpi hi. Tuachiin gamtuammite khut-nuai ah a kum a sim a sal a A mite a hung om chiang un, kisiikna leh zion ngaihna i chi diam, ahihke’h Jerusalem ngaihna in dimthei zeel uh hi. Tua hunlaitak pen, Judahte lungleen laitak ahi a, zion ngaihna in a lungsimte uh a luahdim laitak ahihziak in a tumgingte uh Muisum kung a khai in a om uh hi. Hibang dinmun a a dinlaitak un a omna gam mite, ama’uhte sal a man mite’n laa sa diing in a ngen uh hi.

Lungleen laitak a laa sa a kikou pen thubaih hilou a diam, ama’uh sal a mante’n laa sa diing a a genlai un, Judahte lungsim naatak in hung kichiam ua, ‘zion aw, k’ung mangngilh leh ka lei ka dangtawng ah kibet hen,’ chihte in hung kichiam uh hi.

Judahte pen ama’uh gam leh ama’uh mite tawh omkhawm a, ama’uh kivaihawmna nuai a omthei nawnlou uh ahihman un, mite leh nam dangte lak ah lungleng mahmah ua, a omna gam ua mite inlah, simmawh bawlna leh eenghouna in ‘Na laa uh, Judah a na omlai ua na laa sakte uh lak a khat hung sa un,’ chihbeh nalai uh hi.

Hih Judah mite bang a na omna mun na bawldik mengmeng kei leh, nang tung ah zong hibang silte hung tungthei ahi chih mangngilh ken.

 

Loital a Gam Haat Mawng Ahi.

Judahte’n ama’uh gam ah gualzou le-uh zong mi gam ah guallel uh hi. A Pasian phatna diing ua a neih uh tumgingte na-ngawn uh zong tumtheilou in Muisum in pua hi. Judahte’n Babulon gam a a guallelna uh naa sa mahmah uh ahi diing a, a gualzawhna gam uh zion ngai leh mangngilh lou diing in hung kichiam uh hi.

Judahte a diing in Babulon pen Loitalte bang a gamkhuat theihna diing hilou ahihbang in, mi dangte leh nam dangte kawm ah, Loital bang a gamkhuat diing pen eite a diing in zong lemthei taktak lou hi.

Babulonte kivaihawmna ah Judahte pen bangmahlou, thulaklouhte ahi ua, tuachiin deihteelna vote chihte, zaleentak a omtheihna chihte, duhduh gen ngamna chihte, ut hunhun leh ut bangbang a ihmutna chihte, leh hamphatna diing tamtak Judahte’n Babulon gam ah neilou uh hi. Babulon gam a om hamphat theihna diing zousiah pen Babulonte hamphatna vive ahi a, Judahte a diing khat zong omlou hi. Aziak pen a Pasian uh thununna thuak a, a omna diing uh mun diktak a omloute ahi uh hi. Nidang in gaalte zou in, a kiim-le-kiang ua mite huphulh leh laau pente hile-uh zong, tun mi simmawh-huai pente a suakta uh hi. Aziak pen a omna uh ama’uh gam hilou hi.

Sanggam aw, nang zong tu-a i gen Judahte a bangthei na hihman in na omna mun bawldik mengmeng in, mi dangte gam ah hamphat theihna diing om zousiah pen mi dangte a ahi. Loital bang in mi dangte gamsung ah gam vakikhuat theilou hi. Loital a gam a a haat bang a eite zong eima gam a haat diing, thunei diing, leh hampha diingte hi hang.

Toupa Pasian in theihsiamna thupha hung peta hen.