MI GENTHEIPA KAHNA

By: Pastor Thangdoulal Suantak

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in chibai ka hung buk hi.

 

BIBLE: Laate 34:6, Hih mi gentheipa a kap a, tuachii Toupa'n a aw a na zaa hi. Tuachiang in a lungkhamna zousiah a kipan in hutdam in a omta hi.

 

THUPATNA

Hih mi genthei, Toupa’n a kahna a zaakpa beidondaan pen don-chihtak a dongh ahi. Amin ahihleh David ahi a, a chihmawh daante hih a nuai a Bible taangte ah i simsuk diing uh hi.

1Sam. 21:1 Siampu Ahimelek kiang ah David a hung tai hi. Ahimelek in chituun zen in David a na vaidawn a, a kaing ah, “Bangchidaan a nang mahtang a hung pai a, kuamah in nang a hung zuihlouh uh e?” a chi hi. 2 David in saimpu Ahimelek kiang ah, “Kumpipa'n hung sawlna khat a nei a, ka kiang ah, ‘K'ung sawlna thu leh na bawl diing tawh kisai a k'ung thupiakte kuamah in a theihlouh diing uh ahi,’ a hung chi hi. Ka silate tawh ka kimuhna diing mun uh zong guatsa ahita hi. 3 Tuaziak in tu'n, na khut a na neih bang e? Tanghou pheeng nga ahihke'h tu a na neihneih hung pia in,” a chi hi. 4 Siampu in David a dawng a, “Vaantaang tanghou ka neikei a, tanghou siangthou bek a om hi—tangvaalte numei a kipan a kikeem siangthou ahih uh leh,” a chi hi. 5 David in siampu a dawng a, a kiang ah, “Vai ka kuankhit pouhpouh chiang un, numei lak a kipan in ka kikeem siangthou tawntung uh hi; khualhawh tangpi a ka pawtkhiat chiang un zong tangvaalte a tui-um belsuante a siangthou hi; tuni'n ama'uhte tui-um belsuante bangzah in a siangthou zawlai diai?” a chi hi. 6 Tuachiin siampu in tanghou siangthou a peta hi; aziak pen Ompihna Tanghou, Toupa mai a kikoih, a kilakkhiat pouhpouh chiang a tanghou sapiilpial tawh kheek diing pen chihlouh tanghou dang bangmah a omkei hi. 7 Tua ni in Saul silate lak a pasal kua hiamkhat, Toupa mai ah hentaang in a omkha hi; amah Edom mi, a min Doeg, Saul belaam chingte sappa ahi. 8 David in Ahimelek kiang ah, “Teipi ahihke'h Temsau khat beek neilou maw? Kumpipa thupiak a kinawh seng ziak in, ka temsau leh ka gaalvanhte bangmah k'ung pua mankei hi,” a chi hi. 9 Siampu in, “Elah phaizaang a na thah, Filistia mipa Goliath temsau siampu puansilh nung ah puan khat a kituam in a om hi; na lak ut leh, la in, tua chihlouh bangmah a omkei hi,” a chi hi. David in, “Tua kaan a om diing ama; hung pia in,” a chi hi.

10 Tua ni in David, Saul kiang a kipan in a tai a, Gath Kumpi Akish kiang ah a hung tung hi. 11 Akish silate'n a kiang ah, “Hihpa gam kumpi David hilou a maw le? Laam kawm a laa a sakpihna pa uh, “Saul in a tuul-tuul in a that a, David in a tuul sawm sawm in a that hi, chi a a kikoupih uh?” a chi hi.

12 David in hih thute a lungsim in a theizing a, Gath kumpi Akish a lau mahmah hi. 13 Tuachiin David in ama'uhte mai ah a omdan a khekta hi; ama'uhte muhna ah mi maw a kineih kheem hi. A khut tawh kelkongte a khuat a, a khamul ah a khatehtui a kaisak neinawi hi. 14 Akish in a silate kiang ah, “En un, hih mi mawpa, na mit mahmah uh tawh na mu uh hi; bang diing a ka kiang a n'ung zawhpih uh e? 15 Ka mai a hibang a om diing a mimaw n'ung zawhpih uh mimaw ka kisam ama? Ka innsung ah hibang mi a hung lut diing ama?” a chi hi.

Kumpi in thah diing a a hinna a zonpa chihmawh diingdaan tazen pen, haksa mahmah diing hi. Tulai in eite i hinna uh hung kilaaksak diing hilou in, hung ki-humbitsakna diing a inn a i kikhum uh leh bawn haksa i sak uh hi a, thah diing a kizongpa haksat diing daan tazenpi, a hinna huu a a taai leh Gath Kumpi Akish (a gaalpa) kiang a vatung zawmahlai ahih chiang a, a haksatna pen tulai a eite theihphaak or genphaak haksatnate saang in haksazaw tham-tham diing in ka gingta hi.

David in a thuak haksatnate thuak lehang pen, khau a gui-awk or kikhailum ngam diing pawl, leh guu ne a si ngam pawl a ki-om diing ka taksang hi. Hilezong ama’n haksatna a phukdaante chituam deuh ahihman in hih a nuai a bang in i kikum diing uh hi.

 

1. Toupa’n Simmawh Thuakte Limsak Hi.

Laate 103:6 Toupa'n simmawhna thuakte a diing in, diktatna nna sep leh vaihawmna diktakte a bawl hi.

Etsakna:

1. Hagar: Hagar kichinu ahihleh a kiletsak nalam a simmawh thuak a chimawhtak a omnu ahi a, amahnu’n a chihmawhna Pasian kiang tun ahihman in Pasian in a haksatnate a kipan in hunkhia hi. Tuachiin Hagar in Pasian pen, ‘Muthei Pasian’ chi hi (Gen. 16:1-13).

2. Lazar in zong leitung ah thuakgim mahmah ahihman in ama a diing in Pasian in lampi a bawlsak a, tuachiin Abraham aangsung ah nuamtak in omthei hi (Lk.16:19-23).

 

Pasian In A Tate Thuakgimna Thei Hi

1. Mosi, kipan in –­ Ka mite thuakna ka mu hi.

2. Gideon, kisa in – ­Ka mite haksatna ka mu hi. Vahunkhia in (Vai. 6:11-2:25).

Pasian in a tate thuakgimnate thei a, mangngilh lou ahihman in, eite a diing in zong kisak hun hita hi. Na innsung in a thuakgimnate thei kawm in Pasian lam ah na innkuante kilehpih in. Na mite Pasian lam ah kilehta in. Tu’n nang hun hita hi.

 

Leitung A Kisimmawhte Pasian In Deihdeuh Sese Hi

1Kor. 1:26 Sanggamte aw, a hung sapna ngaihtuah un, taksa lam a mi pil tampite, mi haat tampite, mi lian tampite sap ahi kei uhi. 27 Hilezong Pasian in mi pilte a mualphousak theihna diing in, leitung a sil mot-huaite a teel zaw a, tualeh leitung a a haatte a mualphousak theihna diing in, leitung a a haatloute a teel zaw hi. 28 Tualeh leitung sil sia leh simmawh-huaite Pasian in a teel a, sil omte bangmahlou a suaksak theihna diing in, sil omlou tan in a teel hi. 29 Tuachi`n Pasian mai ah kuamah a kiliansak theikei ding hi. 30 Hinanleh nou pen amah vaang in Khrist Jesu ah na om uhi, amah pen Pasian a pat ei-a ding a pilna, diktatna, siangthouna leh tatkhiatna diing a bawl ahi. 31 Tuaziak in Laisiangthou a a kigelh bang in, “A kisial nuam zousiahte Toupa ah kisial uhen,” chi-in ana kigelh hi.

Pasian in sil thupi, mi thupi, leh a chingh a siamte saang in a simmawh-huaite a teelzaw chih a tung a Bible ah kichiantak in i mute uh hi. Hibang ahihziak in Pasian in leitung a missions nna a sepna ah mawhnei or mawhna a puuk leitung mihingte zangh hi.

Pasian in a mission nnate sem diing in angel puuksete beek zangh leh kilawm hi. Hilezong zangh lou hi. Pasian deihna leh a teelnate pen, eite a tawh kilehbulh hi.

Pasian in a kiang a om bukimnate a piaktheihna diing in mi simmawh-huai or tasamte a teel hi. Tuaziak in nang zong Pasian a diing a ching na hi a, na ut leh Pasian in nang tungtawn in nna sem nuam hi.

Mi Gentheipa Kahna

Hih mi gentheipa kahna ahihleh;

1. Beidonnate Pasian kiang a tutna ahi. Eite’n i beidonnate uh Pasian kiang kitut manlou phial-phialta hi.

2. Lungsim zousiah tawh Pasian kiang a kipiakna ahi. Eite pen, Pasian kiang a kipiak a, Amah tung a ki-ngak diing saang in, sil dang leh a tuam-tuamte ah ki-nga nuamzaw hilehang kilawm hi.

3. Hih mi gentheipa kahna ahihleh kahna sim ching ahi a, kineih-kheem khanate hilou hi. A kahna a sim ching a, tuachiin Pasian in zaa hi.

Mite muhsit leh huat in na kithei hiam? Mite’n a hung langpan ziak ua gaaltaai bang a om in na ki-ngaihsun maw? Mite it hilou a, mite muhdah leh huat daan in na ki-thei maw? Leitung ah ka hin saang in si leng hoihzaw in the chih lungsim na nei maw? Mite a diing a mi nawngkai daan in na ki-ngaihsun maw? Mi vaangse penpen daan in na ki-thei hiam? Nang thuak teng saang in tuni a i gen uh hih mi gentheipa thuakte thupi zaw maithei diing hi. Na haksatnate, na thuakgimnate, na lungkhamnate, na beidonnate, a unpi in Pasian kiang ah aap in hileh ama’n nang a diing a hoih leh kilawm in nna a hung sem diing hi.

Laate 37:5 Na lampi diing Toupa tung ah nga inla; amah muang in, ama'n a hung sem diing hi.

TOUPA’N THUPHA HUNG PETA HEN