KA NU MUHDAH KA PA NUUTSIAT

 

By: Pastor Thangdoulal Suantak

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in chibai ka hung buk hi.

 

BIBLE: “Ka nu leh ka pa'n hung nuse le-uh zong, Toupa'n kei a hung keem diing hi,” (Laa 27:10).

 

Leitung a chiammuih bawlsiam a minthang, Charlie Chaplin in, “Leitung ah bangmah a omden diing a omkei a, i haksatnate uh zong a omden diing hilou hi,” a chihbang in, leitung pen a hunsial leh a nisial a kikheel-kheel leh, a hun a kibaklouh dungzui a nna leh silte zong kibang denlou, hampa in dawn hun a neihbang in, gaw hun zong nei a, tuachibang in leitung ah nnate a hunbi dungzui in kikheel ahihna ah bangmah a omden diing a omkei Charlie Chaplin in a na chi hi.

I teenna leitangh kikheel kei lezong, leitung pen kikheelna gam ahi a, nu-le-pate itna zong kilamdangthei, lawm-le-gualte lungsiatna i tanbang uh zong kitangden lou thei, i haksatnate leh thuakgimnate uh zong nopna suakthei, kahna zong kipakna suakthei ahihna mun leitung a teeng i hihna uah, Kumpi David in zong, a hinkhua a a phuukkhaakte leh tuakkhaak haksatnate tungtawn in zilkhiat manphatak khat a nei a, tua pen amah nuse ngailou Pasian ama Pasian ahihlam ahi. Tuaziak in eite’n zong Kumpi David bang a innsung kimatmawhna leh haksatna i na thuakkhaak leh, lungkia a ki-thabeisak mailou a, Pasian kiang i zot chiat theihna diing un hih a nuai a thute ngaihsut khawm ni.

 

1. Muantheih Diing Hilou Leitung Thuphate Na Muangkha Hiam?

Leitung thupha i chih uh dangka (sum-le-paai), khamh leh nguunte bek ahikei chih i ngaihsutna uah omsak masa lehang deih-huai i sa uh hi. Hinanleh leitung thuphate pen, damnate, hinnate, neih-le-lamte, pilnate, leh innkuan ki-ngaihnate ahi taangpi hi.

Hih a tung a i gen uh leitung thuphate a omden a, a beilouhna diing in bawltheih i nei uh hiam? Hih leitung thuphate a bitna diing in bangchi kep diing i hi ua? Bangmahloutak a mangthang a, vaangsiatna a beimangthei ahihdan na ngaihsun ngai hiam? Damna pen natna in thakhatpi in kheekthei a, hinna zong sihna in kheekthei hi. Neih-le-lamte thakhat in beimangthei a, pilna zong mawtna in suanmangthei hi. Innkuan ki-ngaihna zong thakhat a kisiatna in kheekthei a, ki-itna leh ki-ngaihte zong kimuhdahna in suanmangthei hi. Tuaziak in Kumpi David in, “Ka nu leh ka pa'n hung nuse le-uh zong, Toupa'n kei a hung keem diing hi,” (Laa 27:10) a na chi hi.

Kumpi khat in, a leitung neih-le-lamte, innkuan ki-ngaihnate, a neih mi pilte, khamh leh nguun, sana-dangkate saang a Pasian a muanzawk leh, nang leh ke’n zong i lungsim uh Pasian pia in, Pasian ah i muanna uh koih lehang hoihzaw lou diing maw? Bible in, “Mihingte muan sang in Toupa belh a hoihzaw hi,” (Laa 118:8) na chi hi.

 

2. Leitung Thupha Bei Nung a, Christiante Tanvou Kichingtak

Bible: Laa 69:15 in, “Ka sanggamte lak ah zin ka suak a, ka nu tate lak a kipan in gamtuammi ka suak hi.” Kumpi David in Pasian a kipan a a ngah leitung thuphate nuse mun mahmah hi. A tapa Absalom a kipan a a gaaltaai hunlai, Saul ziak mimaw kineih zen a gaalte kiang a a taai hunlai, leh a tate a kithah hunlai ua, David lungsim diing i mitkha un musak chiat lehang, naa mahmah hi. Thukhun Thak ah mitto pasal khat a om a, tua mittopa zong a innkuante (Sinagog) a kipan a nawhkhiat in a omziak in, amah a diing in a leitung thupha a bei, ahihke’h a leitung thuphate lawhsamta hi. Bible simni: John. 9:34-38, “Ama'un a dawng ua akiang ah, “Nang khelhna pumlum a piang khat in, koute n'ung hilh sawm vial maw?” chi in Sinagog a pat a mah notkhia uhi. Ama'uhte'n tua mipa a notkhia uh chih Jesu`n ana za hi. Tualeh amah amuh kiik in (Jesu’n) a kiang ah, “Mihing Tapa na gingta ei?” achi hi. Aman a dawng a, akiang ah, “Pu aw, Amah kua e? Amah hung hilh in ka gintat theihna diing in!” achi hi. Jesu`n akiang ah, “Amah na muta hi. Tu-a nang hung houpihpa Amah ahi,” achi hi. Tuachi`n aman, “Toupa, ka gingta hi,” chi in amah abia hi.

Hih mittopa’n ama innkuan beh-le-phung omna leh leitung kivaihawmnate a suplawh hang, amuh thak a goutan ahihke’h a tanvou pen thupi hi. Tuaziak in a leitung thupha a bei nung a a ngahthak tanvou pen amah a diing in kiching mahmah hi.

Leitung a i kisaktheihpih uh kipawlkhawmnate hiam, nu-le-pate hiam, sanggam, u-le-naute hiam muhdahna leh huatnate tungtawn a, hih leitung pen eite khamuanna diing mun ahihlouh dan Pasian in a hung sinsak ziak a, David bang a innsung/innkuan buainate hung thuaksak ahi diam? Pasian in Amah lam a i pai diing uh a deihna ziak a innkuante muhdahna leh innkuan kilemlouhna tawh hung sam a hithei diam?

Rom. 8:28, “Sil bangkim ah Pasian in Amah itte, Ama deih lam bawl ding tupna nei-a a sapte, sil hoih a bawlsak chiat hi chih i thei uhi.” John. 14:18 “Tagah ding in k’ung nusia kei ding, na kiang uah k’ung pai ding hi.” Ka nu muhdah, ka pa nusiat, ka innkuante meelma hita ingh chi in, na lung a nuamkei ama? Lungsim zawngkhaal in na omkha maw? Na kiang ah Pasian om hi. Lungmuanna hung pe diing leh, khanate nuihna a suaksak ut in Toupa’n nang hung ngak hi.

Pasian sung a bukimna in nang hung nuse kei henla, Amah sung a om thuphate in hung taisakta hen…. Toupa Pasian in thupha hung peta hen….