JESU SIHNA LEH MIHINGTE HAMPHATNA
BIBLE TAANGTEEL
“2Kor. 5: 21 Aziak amah ah Pasian diktatna i hung hih theihna
dingin, khelhna mawng mawng thei lou amah pen Pasian in eite ziak in khial in
abawlta hi. 1Pet. 2:24, Eite khialhna lam a si a, hinanleh diktatna lam a i
hintheihna dingin aman ama pumpi ah i khialhnate kross dawn ah apua a, amah
kivuakna hualte ah sukdam in na omta uhi. Rom.4:25, Hua Jesu pen i khelhnate uh
ziak in piakkhiat in a om a, tualeh i diktanna ding un kaihthoh in a om hi.”
CHIBAI BUKNA
Jesu
Khrist nung ka zuihkhawmpih saptuamte, i Pa Pasian, Tapa Pasian, Kha Siangthou
Pasian min in, kei leh ka innkuante’n lung kituaktak in, Innmun pan in, i Toupa’n eite a diing a a sil bawlte
theizing kawm in chibai ka hung
buk hi.
THUPATNA
Jesu
a sihlai in, kumzawn natna tawh si ahikei a, damlouhna leh chinatna kichite
ziak a si ahikei chih leh, a mawhna leh khelhnate ziak a si ahikei chih pen,
Khristiante a diing a theihsa ahi a, hilezong Jesu sihna mulkim-huai salou
pawl-khat ki-omthei hileh kilawmtak bang a hinkhua zangh i tam mahmah uh hi.
Tualeh
“Khrist Sihna Tung A A Mawh Kua E?”
chih thu i genna uah, Khrist sihna tawh kisai a thudiktak zong theikhinta diing
a k’ung taksan ziak in, tuni in Jesu
Sihna leh Mihingte Hamphatna chih thu, hih a nuai a bang in, poimawh i sak
diak teng bek i kikumkhawm diing uh hi.
1. TATNA LEH SIAMTANSAKNA
HAMPHATNA
Leitung
mihingte pen, dikna bukim nei a siamte i hi ua, hilezong eite’n i puksiatna (mawhna)
diing uh i kimuhkhiat uh hi. (Ekli. 7:29). Tuaziak in leitung ah kuamah a hoih,
a dik a omkei chih Bible a pan in muhtheih in om hi. 1Kum. 8:46… “kuamah sil bawl khiallou a omkei hi.” Laate. 14: 2 Toupa'n vaan a kipan in mihingte lak ah, theihsiamna
nei a Pasian zong a om na uai, chi'n a ensuk hi. 3 Hinanleh mihingte
a hilou lam a pai in, a unsiang un a na kilehngat mangsiang ua; sil hoih bawl
khat zong a omkei ua, khat beek a om kei hi.” Hih khelhna or kilehngat chih pen
Pasian lam a kipan a kiheimangna ahi. Tuaziak in mihingte pen Pasian lak ah i
khial ua, Amah a kipan in i vaakmang uh hi. Hih Pasian lak a i khelhna ua kipan
a i siamtanna diing bangmah a omkei hi. Hilezong Bible in, “Heb. 9: 12 Kelte leh
bawngnoute sisan a hilou in, Amah sisanmahmah tawh, eite a diing a tatkhiatna
mu in, mun siangthou ah ngamden diing in khatvei in a na lutta hi. 9:26 Huachilou hileh
leitung siamchil a pat tamvei a thuakkhinta diing hi. Hinanleh tu huntawp ah
Amah pen khialhna sukbeina diing a Amah ki-aapkhia diing in khatvei ahung
kilangta hi,” a chi hi. Hih pen Amah gingta, muang,
taksangte ginna tungtawn a siamtanna ahi. Bible, “Rom. 5:1 Tuaziak in, ginna ziak a
siamtansak a om in, I Toupa Jesu Khrist
ziak in Pasian tawh kilem in i om uhi,” chi in gelh hi. Pasian lak a siamtang
ngai mawngmawng lou
diinglai pen, Jesu sihna ziak a siamtansak i hi ua, hilezong a gingta a zuite a
diing ahi diak hi. Bible, “Jn. 3:16 Aziak Pasian in
leitung a it mahmah a, tuachi`n a Tapa tang neihsun apia hi, tuachia Amah
gingta zousiahte’n mangthang lou a tangtawn hinna a neih zawkna ding un,”a
chi hi.
Jesu
Khrist tatna ziak in Pasian in i mawhnate uh a hung phiatmangsak a or
ngaihdamna a hung pia a, tuachiin siamtansakna hamphatna lampi a hung honsak
hi. Hih pen Pasian hehpihna ziak a ginna tungtawn a siamtansak a i omna diing
uh ahi (Eph. 2:8-9). Jesu Khrist in nang leh kei a diing a A nna septe muang a,
Pasian lam a kileh thak diing in i ki-ngen un i kichial zaw uh hi.
2. PASIAN TAWH KILEMNA
HAMPHATNA
Jesu’n
eite Pasian thangpaihna a kipan a hung tankhia a, Pasian lak a i siamtanna
diing uh nna hung sepsakta ahihman in eite pen, Pasian tawh kilem in i omtheita
uh hi. Isai. 59:1, Ngai in, eite hung
hundam theilou diing in Toupa baan a tomkei a, za theilou diing in zong a bil a
bingkei hi. Hilezong na mawhnate un Pasian tawh hung tuamkhen a, na mawhnate un
A meel liah ahihman in za theilou hi. Kol. 1:21 Tualeh
noute, nidanglai in na lungsim uah A meelma na hi ua, na sil bawl uh siatnate
ziak a Pasian a kipan na uh hi; hilezong tu in Ama’n Amah tawh a hung
kilemsakta hi. 22
Tu in Aman a taksa pumpi ah a sihna ziak in, a hung kilemsakta hi. A mitmuh a
siangthou leh gensiatbei leh phawkna ding beia a hung dinsak theihna ding in.
Hih pen Jesu sihna pan a mihingte hamphatna ahi.
3. TAANGTAWN HINNA
HAMPHATNA
Bible, “Jn
6:47 Adiktak
in, adiktak in k’ung hilh ahi, kei hung gingtate’n tangtawn hinna aneita uhi.
1Jn. 5:13 Tangtawn hinna na neita uh chih na
theihna ding un nou Pasian Tapa min gingtate kiangah hih thute ka gelh ahi.
Pasian Tapa na gintat zing theihna diing un. Titus 1:2 Zuautheilou Pasian in
hun kipatma pek a achiamsa tangtawn hinna kinepna ah ahi.” Bible
leh Pasian gingta a Jesu nungzuite i hihna uah, hih taangtawn hinna pen
muanmawhna diing bangmah omlou hi. Tuaziak in, Jesu Khrist gingta inla, Amah
thu zui lechin, Ama sihna tungtawn in hih taangtawn hinna na ngah diing hi.
TOUPA’N
THUPHA HUNG PETA HEN
Comments
Post a Comment