JESU HAANKHUK SUNG AH

 

By: Pastor Thangdoulal Suantak

 

Bible, 1Pet. 3:18 … “Pasian kiang a a hung puitheihna diing in Khrist in zong khialhnate ziak in khatvei a thuakta hi. Midik in midiklou tang in, taksa a thah in a om a, hinanleh kha a hinsak in a om hi. 19 Hua kha in (Jesu) a vapai a, thongsung a om khate kiang ah thu a vagen hi.

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in, i Toupa’n mihing leh misite a diing a a sil bawlte theizing kawm in chibai ka hung buk hi.

 

Jesu, Pasian belaamnou pen, leitung mihingte mawhna zousiah pua in singlamteh tung ah khailup in a omta, chih pen Khristiante a diing in theihsa ot pomsa hilezong Jesu theilou or pomloute’n a taksantheih louh uh thu ahi a, a taksangte lah Jesu nungzui a suak zeel uh hi. Tutung pen, “Jesu Pasian tapa tangneih ahi a, Ama’n na mawhna zousiah pua in singlamteh tung ah, na mawhna zousiah sihpih in, khailup ahita chih na taksang ei? Na muang ngam ei? Na gingta ei? Na taksan leh Ama’n na mawhnate pawkhinta ahihman in A itna sung ah luut inla, na hinna kumpi leh hundampa diing in saang in, tua hileh Pasian tawh kilem in taangtawn hinna na nei diing hi,” chih tawh houlimna pan lehang deih-huai i sa uh hi.

Mawhna nei, Buahbaanna nei, leh Pasian tawh kilemlou ahihlam uh kitheilou leitung mite , i thaang-awkna uh mawhnate a pan a Pasian tawh kilem a i om diing uh pen Jesu tupna leh ngiimna ahihziak in, Jesu’n leinuai a a om sung in bang a bawl a? Misi lup a mawk-lup a maw? Ahihke’h bang e a bawl? Haankhuk sung a a om sung a nna sep bang e? chih thu ngaihsut khawm diing in i ki-ngen masa uh hi.

 

HAANKHUK A JESU HAWHNA

Jesu leinuai a vui ahihlai in, misi lup in a mawhlup kei a, hilezong misi khua or haan ah a vahawh hi chih ahi. Hih thu tawh kisai in Bible i kihilh chiansak diing uh hi. Bible taang teeltuamte simni.  1Pet. 3:18 … “Pasian kiang a a hung puitheihna diing in Khrist in zong khialhnate ziak in khatvei a thuakta hi. Midik in midiklou tang in, taksa a thah in a om a, hinanleh kha a hinsak in a om hi. 19 Hua kha in (Jesu) a vapai a, thongsung a om khate kiang ah thu a vagen hi. Nas. 2:27Aziak pen, nang ka kha Hankhuk ah na nuse kei ding a; Na misiangthou zong muatna na musak kei ding hi. 31 31 Hihthu theihkholhna ziak in David in, Khrist thohkik ding thu ana gen hi, ‘Amah Hankhuk ah nutsiat in aom kei a; Aluang zong amuat kei hi,’ achi hi. 13: 35 Tuaziak in aman Phatnala dang khat ah, ‘Na misiangthou muatmang na phal kei ding hi,’ a chihbeh lai hi. Eph. 4:9 Tuin hih ahi, “a kahtouh chih pen,” amasa in lei mun ngiampen ah a kumsuk chihlouh bangdang chihna ahi diai leh? 10 A kumsuk pen ahihleh sil zousiah a sukbukim theihna ding a vaan zousiah tunglam pek a kahtoupa mah ahi. Laate 16:10, 10 Aziak pen nang Misikhua ah na hung sawl kei a, na mi gin-om kawkhuuk na mu sakkei hi. Matt. 27:52 52 tualeh hante ahung kihong a; misiangthou sisate pumpi tampi kaithoh in a omta uhi.

Haankhuk sung a Jesu a vahawh a, hinna thupha a va gen a, tuachiin a thohni in misiangthou sisate pumpi (taksa) tampi tawh a kaihthoh in a om hi. Tualai chiang in, Jesu mite i sih chiang un, (1Sam. 2:6) Pasian kiang ah i tung uh hi. Phil. 1:23, Sil nih kalteh ah haksatak a phut in ka om hi. Paimang a Khrist kiang a om utna ka nei a, huapen ahoihjaw mahmah hi. Jesu Khrist pen Pa ziatlam a touta ahihna ah, Paul in Khrist kiang a om diing a lunggulhna tungtawn in Jesu mite a sih chiang in Khrist kiang ah a tung uh chih a kichian mahmah hi.

TOUPA’N THUPHA HUNG PETA HEN