Hehpihna Ziak A Sem-Le-Bawlte Hi Hangh!

By: Pastor Thangdoulal Suantak

 

“Hinanleh Pasian hehpihna ziak in ka hihna bangbang ka hita hi; (Pasian in) a hung piak hehpihna pen a mawkna a suakkei a, hilezong ama’uhte tengteng saang in ka semgim zaw hi. Hih pen kei bek nna sepna ahikei a, Pasian hehpihna ka kiang a om in a semzaw hi” (1Kor. 15:10).

 

Pasian Hehpihna

Pasian hehpihna pen a lamdang a, taksan diing a zong kilawmlou silte dong in huampha hi. Hinna leh damnate pen Pasian hehpihna ahi i chihlailai un, sihna zong Pasian hehpihna hi veve hi. Paul in, ‘Pasian hehpihna ziak in ka hihna bangbang ka hita hi,’ chi hi. Tualeh Paul i chih pen mi hoih, Pasian zahtaak hi masalou a, mi gilou mahmah a na hi masazaw hi. Tualeh Paul taangthu pen, a theilou kitamlou diing ahihman in i gentam kei diing ua, hinanleh a nna septe i mitkha un i musakzaw diing uh hi. Paul in nna tampi a sem chih i thei chiat ua, vuaknate a thuakdante, Pasian tup-le-ngimte gen a, Pasian a diing a a panlaknate zong i thei chiat diing un ka gingta hi. Hilezong a taktak a chih in, Paul nna sep dan a i na ngaihsut uh sil zousiah pen, Paul kiang a om Pasian hehpihna nna septe ahizaw hi.

 

Hehpihna Sep-le-bawlte

Hehpihna pen a thu bek ahi a, nna a semthei kei chiin na ngaihsunkha hiam? Hehpihna pen mihing leh hinna nei a, muhtheih lah hilou a, bang a bawl in, bang a sem diing a, chiin na ngaihsunkha hiam? Hehpihna in sum-le-paai lah lawhtheilou a, kei hung bangchi panpih diing a, chiin na ngaihsunkha hiam? Hibang a na ngaihsut leh a khial hi diing na hi. Hehpihna pen a thupi mahmah leh a thanei, Pasian leh mihingte nna sem a gamtaangsaktu ahi. Hehpihna ziak in Pasian in, nang leh kei a diing in tatna, Jesu Khrist tungtawn in a hung puak hi. Hehpihna ziak in Pasian in, nang leh kei tung ah, ‘Mit taang a mit, haa taang a haa,’ chihte zanghlou hi. Hehpihna ziak in Pasian in, nang leh kei a diing in Saptuamte kipawlkhawmna a hung bawlsak a, hua pen tuni dong in Saptuam mah i chi uh hi. Hehpihna ziak in Pasian in, nang leh kei a tuamtuamte pan in a thuphate hung ngahsak hi. Hehpihna ziak in tuni dong, hing leh dam in i om uh hi. Hehpihna ziak in nethei, dawnthei, thakhia-thei, ihmu-thei, kholai vaakthei, lungsim leh lunggel neithei, naakna hu ngahlai, chihte leh a dang genbeh diing tampite ahi. A taktak a chih in, Hehpihna nna septe ziak a i hihna bangbang uh hite i hizaw uh hi. Hehpihna in nang a diing a hihzahta a thupi nnate a sep ahihleh, nang, hih hehpihna ziak a na sep-le-bawlte bangbang e? chih ngaihsut tham ching kasa hi.

 

Hehpihna Sep-le-bawlte A Mawkna Suakkha In the, Pilvaang In

Paul in, ‘A nna sep zousiahte a ma nna sepna bek a hikei a, a kiang a om Pasian hehpihna nna septe ahizaw hi,’ a chi hi. Hehpihna in eite nna a hung semsak taktak na hiam? Ngaihsut taktak in ngaihsut ni. Saptuam tawh kisai a i silpiakte tengteng uh hehpihna ziak a i piak uh ahi taktak na hiam? Ahihke’h minthan utna ziak? Mite pahtawi utna ziak maw? Pasian hehpihna ziak a hibang a om ka hi, tuaziak in ken zong a hehpihna hung ngahsakpa a diing in hehpihna silpiak a hizah pia ning e, na chi ngaita hiam? Pasian hehpihna ziak a hibang dinmun a omta na hihleh, na ngahsa hehpihna bangchibang in na zaksawm a? A taktak a chih in, Pasian hehpihna ziak a sem-le-bawlte hi phet hang e! Pasian hehpihna ziak a a thawn a i ngah uh silte ngaihtuah kawmkawm in i hinkhua uh kheel ni hang in, Hehpihna kilamkaihsak ni aw! Hehpihna in a lamkaih mi khat hi diing in, Toupa Pasian in a thupha hung pia hen.