GENESIS/ SIAMCHIILBU HILHCHETNA (E-3 09/02/2025)

 

 

SIMMUN

3

 

 

Text                : Siamc 1:6-13

Thupi              : Ni Nihni leh Ni Thumni Silsiamte

Taangvom      : “Tualeh Pasian in, ‘Tuite laizang ah

  vaanthamzawl om henla, tua vaantham

  zawl in tui leh tui kikhensak hen,’ a chi

  hi.” 

                                                                        Siamc 1:6

Thupatna

Eimite’n taangthu a i na gen ngai uh Vaan tanchin ah thangvan, leengvan, alvaan chihte tawh kibang sim in, 2Kor 12:2 ah, Sawltaak Paul in, “Vaan thumna” thu a na gen a, hilezong i teenna uh leitung a kipan in vaan lam tanchin theihsiam a haksa mahmah a, vaan lam tanchin i theih sun uh leh mite genna i zaak sunte uh zong, Bible thu a theihna gil neizawte ngaihdan ahi a, a dik taktak ahi, a kichi ngam taktak kei hi.

Tualeh Vaan lam tanchin i theihsiamna diing ua vaantung mah a i om uh ngai diing hileh kilawm bangtak a kilatlai in, alou-theilou a vaan lam tanchin i zon uh a ngai hi. Aziak pen eite a diing a i Toupa Jesu’n inn nuam a lamna leh i taangtawn mun diing uh zong ahi hi.

Siamc 1:6-8. Vaanthamzawl:

Hih lim pen, Pasian in vaan a vaanthamzawl a bawl pen theihnopna diing a taklat ahi a, hibang chet a Pasian in lei leh vaan a bawl ahi, chihna a hikei hi.

Vaanthamzawl kammal pen “Dome” pan a i na lehkhiat uh ahi a, KJV leh version khenkhat ah Firmament a na chi a, a lehna ahihleh “Phalh” or “Zaakkhia” chih ahi. Tualeh Stephen Mendis in a a genna ah, “a Hebrew kammal pen asah chih ahi a, hih pen expanse- phalh or zaakkhia” chihna ahi, a chi hi.

Hih Vaanthamzawl pen, Paite Bible ah “Vansin” Mizo Bible ah “Boruak” Zou, Gangte, Vaithei, Biblete ah “Vanthamzawl” chih ahi a, Tedim Bible in “Van kuumpi” a chi a, Thadou Bible in “Vanlaijol” achi hi.

Siamc 1:9-13, Ni Thumni a Silsiamte: Pasian in ni thumni a, a silsiamte ahihleh Tuipi, Leitung leh Sing leh Loupate ahi.

Tuipi lei Leitung: Pasian in, “Vaan nuai a om tuite mun khat a kigawm uh henla, leitangh dawk hen,” a chi a, a chih bang in a hung om hi; chih pen Stephen Mendis in Genesis note a gelhna ah, “Pasian in tuipi khat bek a bawl hi, chihna a hikei, i theih diing ua poimawh pen ahihleh, Pasian in leitangh tung a mihingte a khosak theih na diing uh a bawlkholhna ahi,” a chi hi. Pasian in tua leitangh pen, Leitung a chi a, a kigawmkhawm tuite, tuipite a chi hi. Lei (Earth) pen 1:1-2 na a i muhbang ua, lim-le-meel neilou (formless) hilezong bawlsa ahi a, hilezong tui nuai a omlai ahihziak in, 1:9-10 nate ah dawkkhia diing a thupiak in a om a, tuachiang in, leitung a kichi hi (Simmun nihna zong en in). Tui nuai a kipan a leitang sapkhiat ahihtan in leitang pen a hing naikei hi.

Sing leh Loupate: Pasian leh a Thu (Bible) a ginna neilou, mi pil a ki-ngaihsun, leitung in zong mipil achih, thu-thei kisa mahmah mite’n, (evolutionists kichite’n) silsiamte tawh kisai leh sing leh loupate hung omdan, hinna hung piankhiatdante tungtaang ah bangteng gen le-uh zong, ei Pasian a ginna neite’n ama’uhte thumopna leh thuhilhnate bangmahlou a ngai in, Pasian leh a Thu in a chihte ahi bangbang in i pomzaw uh hi. Pasian in, tui nuai pan a dawkkhia diing a leitang thu a piak khit in leitung ahi a, tuachiin “Leitung in sing leh loupate pousak henla, chii nei singnou leh a gah sung a, a tangnei singkungte'n ama chii bang zeel in, leitung ah gah piangsak hen,” a chi a, a chih bang in a hung om hi. Leitung in sing leh loupate a pousak a, chii nei singnoute leh, a gah sung a a tangnei singkungte'n ama chii bang zeel in, leitung ah gah piangsak hi.

“Ginna in leitung pen, Pasian thu a suktuah khawm ahi chih i thei a, tua chiin sil kimute zong, sil muhtheihlouhte a pan in a siam hi,” Heb. 11:3 na in a na chihbang in, hih sil siamte tungtaang ah theihna giltak neikei lehang zong, i ginna un a omdante a hung theisak zaw hi.

(Cross References Laate 104:1-9; Laate 33:6-7; 78:13; Jer. 5:22; Job 38:8).

Siamc 1:13. Nitaak bei in, zingsang a hung hi a, a ni thum ni ahi hi. Ni khat sung in dakkal bangzah a om a? chih dokna Moody Handbook of Theology in a dawnna ah, “Silte a kisiamlai nite in ‘Nitaak bei in Zingsang a hung hi a,’ a chih in ni khat sung in dakkal sawmnih-le-li a om chih a hung hilh a, hibangmah in a ni dangte ah zong ahi,” a chi hi.

Tualeh Hebrew laimal a yom (day) chih in ni khat sung in dakkal sawmnih-le-li a om hi, chih a hung kawkmuh hi.