GENESIS / SIAMCHIILBU HILHCHETNA (E-2, FEBRUARY 02-2025)

 

By: Pastor Thangdoulal Suantak

SIMMUN

2

 

Text                : Siamc 1:1-5

Thupi              : Pasian leh A Silsiam Ni Khatna

Taangvom      : “A chiil in Pasian in vaan leh lei a bawl hi”

Siamc 1:1

Thupatna

Siamchiilbu 1:1 na a Pasian leh sil siamte kipat dan tawh kisai pen, tha-khatpi a muh tawh kibang sim a, a hung dawkkhiat ziak in gen-le-sak a tam a, tualeh theory tuamtuam zong, muhtheih diing in a om hi. Hilezong ei, tuni a Pasian a ginna neite’n huate buaipih lou in a Bible in a gen ut pen bang ahia? Chih zonkhiat i sawmzaw diing uh hi.

 

Siamc 1:1. A chiil in (Heb. Berēshīt): “Achiil in thu a om, tua Thu Pasian kiang ah a om, tua Thu Pasian ahi. A chiil in amah Pasian tawh a omkhawm hi. Sil zousiah ama siam ahi a, silsiam tengteng ama siamlouh bangmah a om kei,” chih Jn 1:1-3 na a, i muhbang un, a chiil in Thu a om a, hua pen Pasian ahi. A chiil in Pasian chihlouh bangmah a omkei hi. Amah ahihleh bangkim teng bulpi ahihna, Kil. 1:8, 11; 21:6; 22:13 nate a i muh uh “Alpha” chih thumal tungtawn in a kichian hi. Tuachiang in, sil siamte mahmah in zong, a chiil in Pasian chihlouh bangmah a omkei, chih a kichiansak hi.

Tuachiin Pasian in Vaan leh Lei, bangmahlou a kipan in a bawl a, hibang a bangmahlou a kipan a Pasian in vaan leh lei a bawllai in, lei pen lim-le-meel neilou, a sung a bangmah omlou, a hawmpi ahi, chih a Laisiangthou mahmah ah I muthei ua, tualeh hih thu pen taang nihna ah a kichianzaw in I entoulai diing uh hi.

Pasian (Heb. Elōhīm): Thukhun Lui Laisiangthou ah hih Pasian min pen 2570 vei bang muhtheih in a om hi. Tualeh hih Pasian min a im chih thumal ahihleh Hebrew grammar ah plural ending ahi a, hih in a gen ut pen ahihleh, Pasian vaangletna leh thupina (a zah chet ki-genchian theikei lezong) khat saang a tamzaw chihna ahi. Hih Pasian tungtaang thu a, Sunday School naupangte I na sinsakna uah, “Pasian kua ahia?” chih dokna pen, “Pa, Tapa leh Khasiangthou kigawm, lei leh vaan siampa ahi,” chi in a dawnna I bawlsak ua, a dik mahmah hi.

Pasian khat ah thum om ahihna Bible bung leh taang tallang diak pen ahihleh, Mt. 3:16-17 na ahi a, tualeh Pasian khat bek ahihna Deut. 6:4;1Tim. 2:5; Jakob 2:19 nate ah I mu ua, tualeh a dang tampi zong a omlai kha-diing hi.

 

 

Bawlkhia/ Siamkhia (Heb. Bara’): Hih kammal ahihleh bangmahlou pan a banghiam bawlkhiatna kammal ahihziak in, Thukhun Lui Laisiangthou sung ah hih kammal pen kimu-tamlou hi. Pasian in tha-khat-thu a lamdangtak a a sepkhiat, tuni a i teenna uh leitung pumpi, bangmahlou pan a hung bawlkhiat a, a hung omsakna thu mahmah genna ahi.

R.B. Thieme, JR. kichipa’n zong hih Hebrew kammal ‘Bara’ chih thu a na genna laibu “The Origin of Human Life” kichi ah, hibang in a na gen hi; “Barah” chih kammal ahihleh ‘Bangmahlou pan a banghiam bawlkhiat diing’ genna ahi a, tualeh hih “Barah” ei haam a bawlkhia, chih pen Siamchiilbu, bung khatna ah thumvei a kimu a, a thum in a tup leh a gen ut pen a kibang hi,” a chi hi.

 

Siamc 1:2. Lim-le-meel neilou a hawmpi (Heb. Tōhū wabōhū): Hih pen Pasian in leitung a bawlkhit a, leitung omdan ahi a, lim-le-meel neilou ahih baan ah, a sung ah zong bangmah a omkei a, tualeh Pasian Kha in a opkhum hi.

Mialna kichi pen, Laate 104:19-24 na a i muhbang un, siatna leh gilou etsakna a hi tawntung kei hi. Hitak a mialna kigen pen ahihleh Vaak (light) omlouhna genna ahizaw hi. Tualeh hih Mialna in tuipi tung zousiah a tuam bikbek hi, a kichihna ziak ahihleh, Siamc 1:9 a i muhbang ua, leitung bawlkhiat khit hitalezong tui nuai a omlai, tuipi tung a dawkkhia nailou ahihziak ahi.

Pasian Kha pen sil siamte siam ahih hunlai in a kitaklah mahmah a, silte bawlkhiatna diing a poimawh mahmah Kha Siangthou ahi a, hih pen John 1:3 na a i muhbang un Jesu Khrist ahi, chiin KJV Study Bible in a na gen a, dik ngei diing in zong i gingta uh hi.

Siamc 1:3. Pasian thupiak: Silsiamte tawh kisai a Pasian thugente ahihleh sil siamte bukimtak a akisiam zohna ahi chih a kichetna pen, Pasian in a genbang zeel in silte a hung om hi.

Hih Pasian thu tawh kisai pen, Kum 2016 piching Sunday School hilhchian bu a i na zilsa uh ahihziak in, hih a nuai ah  tamlou i taklang diing uh hi.

“Laate 119:89 na a i muhbang un Pasian thu pen vaantung a phuhdet ahi a, hih thu pen Heb. 4:12 na a i muhbang un, a hing a, sil a bawlthei a, temsau hiamtuah saang in a hiamzaw hi. Hih Pasian thu, thu hing leh sil bawlthei ahihna pen Siamchiilbu a silsiamte tungtawn in i muthei ua, tualeh gingtute hinkhua mahmah ah zong Pasian thu pen a hing ahihna leh sil bawltheih ahihna muhtheih in a om hi,” chih ahi.

Siamc 1:4. Vaak: Taang 3 na a Pasian thupiak a hung om Vaak pen taang 4 na ah zong i mu uh hi. Hih vaak pen, Siamc 1:16-na a i muh uh, silsiam a ni li ni a siamkhiat a om nisa (sun) taang pen ahikei a, leitung pulam pan a om or hung taang ahi. Hih vaak ah leitung pen sun-le-zaan in a kivialleh khawp hi.

Siamc 1:4-na a i muhbang un, hih vaak pen hinna nei zousiah in zong, hoih asak bek uh hilou in a hinpih chiat uh hi. Hih Pasian vaak pen, nisa (sun) vaak ahikei a, kichiantak suikhiat theihlouh vaak hoihtak, Pasian khutsuak vaak ahi hi.

Siamc 1:5. Pasian Sapna/ Minphuakna: Pasian in mial leh vaak a tuamkhen khit in, a min diing uh a phuaksak a, Mial pen Zaan a chi a, Vaak pen Suunlai a chi hi.

Pasian in a silsiamte tung a, a thuneihna a kilatna mahmah khat ahihleh a silsiamte min diing ahihkeileh a kisapna diing a phuahna ahi.

Judahte khovel ah, banghiam sil khat minphuahna leh mi khat minphuahna pen toupa (lordship) limlahna leh genna dan in a na kizang hi. Etsakna diing in, Kis. 32:38 nate a i  muhbang un, Reuben namte’n Amor mite a zohtak un, a khopite uh min a tuam in a phuakthak uh hi. Hichibang mah in Faro Neko in zong, 2Kum 23:34 nate a i muhbang un, Judah kumpipa a zoh khit in, Eliakim min pen Jehoiakim chiin a phuaksak hi.

Hichibang ahihziak in, mi khat hiam sil khat hiam min phuahna pen toupa (lordship) hihna etsakna ahi. Pasian in a silsiamte min a phuakna pen a silsiamte tung a toupa ahihna ahi. Tualeh Siamc 2:19-23 na a i muh uh, silsiam Adam in a min diing uh a phuahte lak a numei zong a pang a, hua in a gennop pen ahihleh, silsiamte leh numei tung a toupa (lordship) ahihna ahi.

Siamc 1:5. Ni Khat: Ni khat sung in dakkal bangzah a om a? chih dokna Moody Handbook of Theology in a dawnna ah, “Silte a kisiamlai nite in ‘Nitaak bei in Zingsang a hung hi a,’ a chih in ni khat sung in dakkal sawmnih-le-li a om chih a hung hilh a, hibangmah in a ni dangte ah zong ahi,” a chi hi.

Tualeh Hebrew laimal a yom (day) chih in ni khat sung in dakkal sawmnih-le-li a om hi, chih a hung kawkmuh hi.