GENESIS/ SIAMCHIILBU HILHCHETNA (E-004) 16-02-2025

 

SIMMUN

4

 

Text                 : Siamc 1:14-25

Thupi              : Vaakte leh Gantate

Taangvom       : “Pasian in vaak thupi nih a bawl a—tua

                           vaak thu pi zaw pen in sun sung a uk a,              

                           vaak neu zawpen in zan sung a uk a—

                           tualeh aksite zong a bawl hi.” 

                                                      Siamc 1:16

Thupatna

“Toupa thu in vaante a bawl a, a sung a om zousiah zong a kam a hupawt in a bawl hi,” (Laate 33:6)

“……. leitung pen Pasian thu a suktuah khawm ahi……” Heb. 11:3.

A tung a Bible taangte tungtawn in Pasian sil bawltheihna lamdangtak, i muh chiat diing uh a gintat-huai hi. I zillaite uah Pasian thu sil bawltheihna i mu tamsimta ua, tu in zong, vaan a om diing a Pasian sil bawlte  i muhbehlai diing uh hi.

 

Siamc 1:14-19. Vaan a om Vaakte:

Pasian in a sil siam a ni li ni in, luahlouh a om Vaanthamzawl pen, aksite, kha (moon), ni (sun) chihte tawh hukdimna a nei a, hih pen vaakte a kichih thoh hi. Stephen Mendis in a genna ah, “Hih vaakte pen bawlsa ahi ua, tu in Pasian in ama’uh ama’uh sep diing chiat a septheihna diing un, Pasian in thu a pia hi,” a chihbang in, Pasian in a bawlsa vaakte vaantung vaanthamzawl a, a omsak khit in a hingsak hi. Tualeh hih vaakte nasep diing pen sun leh zaan khen diing, chih Pasian deihdan ahih dungzui in a hung omta hi.

Khawhun: Khawhun (season) chih kammal i lakna uh Hebrew kammal pen mo’adim chih ahi a, hih pen Siamp 23:2-3 nate a i muhbang ua “hunbi seh” ahihk’eh Israelte “Ni siangthoute (holy days)” genna in a kihahzak diak hi. Tuachiang in, Kol 2:16-17 na a Sawltak Paul thugen mahbang in, mihingte khelhna a kipan a hutkhiat ahihna diing a, mihingte khangthu a Pasian sulnungte leh tanchinte genna in zong a kizang hi.

Hih pen, Pasian in mihingte a siam masang in zong, mihingte khelhna a i puuk diing uh leh hutdam ngai diing i hihdante uh a theikhinta chihna ahi.

Khawhun Chiamtehna: Vaantung vaanthamzawl a vaakte pen, “Nite, Kumte leh khawhun chiamtehna diing,” chih ahi. Chiamtehna chih kammal i lakna uh Hebrew kammal pen otot chih ahi a, hih thu/ kammal Bible sung a, a kizaknate ah sil lamdangte (miracles) genna lam ah a kihahzak a, hua in mihingte khangthu a Pasian kigolhna leh Laisiangthou Pawt. 4:8-9 leh Daan 34:11 nate a i muhbang ua, hutkhiat diing tupna ziak a bawl a om chiamtehna sil lamdangte genna ahi.

Siamc 1:20-23. Ganhingte: Siamc 1:6-8 na a, Pasian in tuite sehnih a suah a, a kikaal a vaan/ vaanthawmzawl, a kam a thu a, a siam or a omsak bang in, tu in zong tui ganhingte leh, tungleeng vasate, Pasian in a kam a thu in a siam or a omsak hi.

Siamc 1:21. Tuipi sung a ganhingte golpipite bangchibang meel pua leh bangchibang ganhing hi diing ahia, chih kichiantak a theih hikei lezong, The Moody Bible Commentary in hibang in taklang hi.

Hih ganhingte pen, eihaam ah, a min diing i theikei ua, Laate 74: 13-14 in Tui-gulpi leh Leviathan chi in nih a na hisak hi.

Siamc 1:20-21 “Tui in hinna nei a r\tangtheite pawtsak hen” Pasian in tuipi sung ah ganhing golpipite leh ganhing

tang thei chikim, ama'uh chii bang zeel a tui sung a omte….a bawl hi,” a chihbang in, Pasian in luahlouh a om tuipi sung ah tui ganhing chikimte bawl in a omsak hi, chih i theithei uh hi.

Tualeh tuite sung a ganhing chikimte siam ahih mahbang in tungleeng vasate zong, chikimtak in Pasian in a bawl hi.

Siamc 1:21 na a, “Pasian in hoih a sa hi,” chih pen, “Vaan (sky) leh tuisung pen, ganhingte’n a luahdimtaak ziak un, hih pen mihingte a diing in, Pasian in hoih asa hi,” chi in Stephen Mendis in a na gen hi.

Siamc 1:22 na ah, “Pasian in ama'uhte thupha a pia a,” chih kammal in a gen ut pen ahihleh damsawtna, khansauna, hinna keekletna, khankhua aban-ban a paitou diing leh kipehtou diing chihte ahi hi.

Siamc 1:24-25. Gantate Hinna:

Pasian in, “Leitung in hinna nei ganhing chikim pawtsak hen: Innsa, gamsa leh a bokvaak ganhing zousiah pawtsak hen,” a chi a, a chih bang in a hung om hi. Pasian in leitung ah gamsa ganhing nam kim a bawl a, innsa nam kim leh, leitung a a bokvaak ganhing zousiahte a bawl hi. Tua pen Pasian in a hoih hi chi'n a mu hi.

Biblehub.com in, Siamc 1:25 na thu a genna khat ah, “Pasian in hih gantate (Innsa, gamsa leh a bokvaakte) a siamlai in ‘Ganhingte (tuithe, thousi-thouvai, kauphe leh keeng kopthum nei ganhing neute)’ zong a siam hi, kichi kei mahleh, sil hingte, ganhingte a siamlai nite a, a siam ngei ahi diing hi. Siamtu pilna leh sil bawltheihna pen, ngaihsaan a, hoihsakpih a lungdampih diing ahi; tualeh Saipi thupi i sakbang ua maksi zong thupi i sak diing uh ahi,” a chi hi.

 

Hih lim pen, May 11, 2021 kum a, p2c.com kitaklang Pasian in a bawl ganhing neute ahi.