Ettontaak Shashanka Ala IAS

By: Pastor Thangdoulal Suantak

 

Tutung a i ngaihsut diing uh thu ahihleh Rev. Chauthuama, tulaitak a Mizote Bible Translatorpa in, 26/05/2020 a, a na gelh thu ahi a, eite a diing a zong ngaihsut tham ching ahihman in limtak in sim in, ki-ngaihsun chiat ni, chi in i ki-ngen masa uh hi.

 

Shashanka Ala Puaknatna

Mizogam lawngtlai D.C. a sem, Mrs Shashanka Ala in a tapa, lawngtlai a Aganwadi Centre ah a sawl a, tuachiin a tapa zong a vapai hi. Tuabang a Aganwadi Centre a pan a a tapa a hung kileh in, dal (havai) leh antang a hung puakte a muhtak in, Shashanka Ala a chii a zaa a, lamdangsakna in a dimta hi.

Tuachi a sil omdante hoihtak in a kanchet leh, Aganwadi Centre leh Skul lam a om naupangte’n neek-le-dawn a poimawh zah uh a muzou kei uh chih a mukhia hi. Tuachiang in Aganwadite zong ahihna diing bangtak in a omkei chih a mukhia a, naupangte kiang ah zong an neek diing piak ahikei a, theigah leh anteh khaithakte bangmah piak in a omkei uh chih zong a mukhia hi.

Lawngtlai District ahihleh Mizogam a diing a a tuantual pawl ahi a, a poimawh zousiah uh Assam leh Silchar a kipan a laakluut vive ahi taangpi a, a puakluutna diing in ni nih leh ni thum kikaal a ngai hi. Hibang a puakluut a om vanhte, a kipuakna a puaksiat leh a hoih omsunte zong a man a tam mahmah hi.

Hibang haksatnate leptuak leh bawldikna diing in “I Skul, I Huan, (My School, My Farm)” chih a hung phutkhia a, tuachiin a huan ah khaichii a chiingta hi. A kipat chiil in haksatna tamtak a tuakkha a, a khaichii lah deihbang muh diing a haksa mahmah hi. Baan ah, tui a haksa mahmah hi. Hitalezong a tupna ah Shashanka Ala a dingkip a, tuachiin a project in tu ni chiang ah, Aganwadi Centre leh skul 713 dong a zeelsuakta hi.

 

Ka Skul, Ka Huan, (My School, My Farm)

‘I skul, I huan’ ah khaichii khangthei leh aam-huaite chiing in, khaichii hoihte zaam a a khan hoihzawkna diing la-ang (Nursery beds) a bawl uh hi. Tuachiin khaichii hing dipdep neektheihte, theigahte, leh Mosala chii dong a chiing in tua huan khawhna nna sep a hahbawl mahmah uh hi. Hibang ahihman in Mizogam sawrkal bek hilou in, phualpi sawrkal na-ngawn in zong a theihpih a, tuachiin huhnate zong a peta uh hi.

 

Shashanka Ala Panlaakna Dang

Tu in Shashanka Ala in, gan khoina leh ak khoina tawh kisaite zong bawl diing in a ngaihtuah a, hibang a a panlaaknate a hung lawhchin a ahihleh, skul naupangte neek-le-dawn hoihlou lua pen hung hoihdeuh diing in lam-et a om hi. 

Shashanka Ala in, “Mun haksatna ah kipatkhiat ka utna uh ahi a, hih ahihna diing in haksatna tamtak a om diing hi; hilezong hihte pen eite a diing a chouna (challenges) ahi. Mipite muan tham hih a ngai a, tuachia mipite muan i hihleh, mipite’n zong a hung huh diing uh hi. I nna sep uh tamtakte pen nna thak leh sil thak a hikei a, sil lui, mangngilh a om pen sem thak a bawlthak i hizaw uh hi,” a chi hi.

 

Shashanka Ala Pasal

Shashanka Ala pasal ahihleh Bupesh Chaudhuri ahi a, amah zong IAS hi in, Saiha a D.C. nna sem in a om hi. Ama’n zong Saiha district a diing in sil hoih tamtak a bawlsakta hi. Tu masang deuh in zong, Maraland a malta heekvui a hung taaklangh uh hi.  Pu. Bupesh Chaudhuri ahihleh Mamit D.C. Bru voters tungtaang a a deihlouh ua, a hung delhkhiatpa uh ahi a, hilezong Saiha ah D.C. hoih leh kipe zou mahmah ahi a, sil thak tamtak zong a bawlsakta hi.

 

Shashanka Ala Sahkhua

Shashanka Ala ahihleh Christian ahi a, nipi kaal a bei diing sial in, Saiha a om a pasal kiang ah a pai gige a, Pasian ni chiang in ECM saptuam ah, a innkuan un a kikhawm gige uh hi.

 

Shashanka Ala nna sep tamlou i taaklatte ua kipan in zil diing tamtak a om hi chih i thei uh hi. Mi ettontaak i chihte uh ahihleh nam dang leh mi dang ahihna ua enlou in, a nna sep uah enzaw in, ama’uh hihna saang in a nna septe uah enzaw lehang a hoihzaw diing a, tualeh mi ettontaakte a thu bek a theilou in, leh a lai bek a simlou in a nna septe uh zui in om lehang ei a diing in manpha mahmah diing hi.

Toupa Pasian in thupha hung peta hen.