ESTHER THU LAMDANG

 

By: Pastor Thangdoulal Suantak

 

Bible: Est. 2:13-15, “Kumpipa kiang a nu-ngaak khat a luut diing chiang in, numeite omna innpi a kipan a kumpi innpi a a hawhpih diing a a deih zousiah a kiang a piak ahi. Nitaak-lam in amahnu a valuut a, a ziingni zingsang in numeite leh kumpipa meite keem, mi chilgeh Sha-ashgaz kep diing in numeite omna inn nihna ah a hung kileh hi; amahnu tung a kumpipa a lungtun a, a min a a sap kiik kei leh kumpipa kiang ah a luut kiik nawnkei diing hi. Mordekai in a tanu diing a a laak, a paneu Abihail tanu Esther, Kumpipa kiang a a luut hun a tuntak in, numeite keem kumpipa mi chilgeh Haggai in a gente chihlouh, bangmah a genbeh kei hi. Tu in Esther mukha zousiah in hoih asa chiat uh hi.”

 

Kumpinu Esther taangthu i gen chiang ua i pelh theihlouh Kumpinu Vashti ahi a, Vashti kipaihdan themkhat beek taaklangh lou in Esther thu kipan theilou chi lehang zong dik diing hi. Tuaziak in Vashti kipaihdan tamlou i en masa diing ua, tuachiang in Esther hoihna lamdangte i suutkhawm diing uh hi.

 

1. Kumpinu Vashti Kipaihdan

Kumpinu Vashti pen Kumpi Ahasuerus zi ahi a, gam 100 vaalte tung a kumpinu ahihdan ngaihsut lechin a meel a hoiuh diingdante, a pian a nalh diingdante na muthei mai diing hi. Hilezong tu’n pen, Vashti hoihna leh a pian nalhdante gen sawmlou i hi. Tualeh amahnu kumpi zi ahihna leh a kumpinu hihna pan a a kipaihdan pen, mi taangpite ngaihdan ah a pasal thu manglou ahi a, hilezong pasalte a diing a theih-huai khat ahihleh, zuihtheih diing thu i gen maw, i gen louh uh? Chih ahi. 2018 kum a Jorhat E.T.C. (Eastern Theological College) faculty-te tawh ka kikupna uh leh laibu a ka simkhaakna mun tamtakte a a kigelhdan in, Kumpi Ahasuerus in Vashti a kumpi lukhu tawh a kiang a pai a, a lawm-le-gualte tawh a omna ua a hoihna a lah diing achihlai in, zu kham ahi a, tualeh a gendan diktak ahihleh, a kumpi lukhu bek a khuk diing in a taksa zousiah a dawksak diing chih ahi. Hibang ahihziak in Vashti a utkei hi. Ataktak a chih in kumpipa kiang a vapai leh a lawm-le-gualte tawh vakimuh pen kumpinu a diing in thu thak leh sil haksa ahikei a, a na bawl ngailouh uh zong hilou hi. hilezong tutung a pen a kii (mode) a tuam ziak in a utkei a, tuachiin paihkhiat in om hi. Tualeh Vashti in a pasal thu mang in vapaita lezong, zukham hon lak a guaktang a pai diing ahihziak in ahihna a kipan a a kipaihna diing thu khat om veve diing hi. aziak pen Pasian in a Juda mite a diing a a lampi sialna a omkha ahihman a a thuak diing hi. Tuachiin Esther hun hung tungta hi.

 

2. Kumpinu Diing a Interview-na

Kumpinu diing a interview bawl pen nna haksa mahmah khat ahi a, inn leh lou nusia a kha sawm-le-nih sung kisiam diing, sathau leh gimnamtui tuamtuamte tawh kizuut diing chihte leh an hoih, taksa tawh kituak diingte nek diing chihte a zawh chiang ua kumpipa kiang a valuut diing chih ahi.

Kumpi Ahasuerus zi hih a, gam tamtakte kumpinu hih diing pen numei khat a diing in a lunggulh-huai mahmah na diing a, hilezong kumpinu diing a interview diing in numeite ama’uh utthu in a kuan utkei uh hi. Tuaziak in Ahasuerus kumpigam sung a bialte uk leh vaihawm a pangte’n kumpinu diing a interview bawl diingte kumpi innpi a numeite omna innpi sung a mi chilgehte kiang a a hung koih zeel uh ahi.

Kumpinu diing a interview diing nu-ngaakte pen pasal tawh lumkhawm ngailou ahih diing uh chih ahi a, kumkhat sung kumpinu diing a kisakna hun a bei chiang a kumpipa kiang a valuut diing in, kumpipa kiang a zaan khat om diing chih ahihziak in, kumpinu a chingloute a diing in pasal deihbang muh pen a na haksa simta hi. Aziak pen tulai mah bang in tua hunlai a kipan in numeite pen a siangthou (virgin) diing uh pasal zousiah deihna leh lunggulhna ahi. Tuachiang in, kumpinu diing a interview bawlte kumpipa’n zaan khat a na luppih pen ahunlai in sil lamdang ahikei a, mun tuam leh gam tuamte ah zong a na hua chi veve hi.

 

3. Talmud in Esther Tungtaang a Gendan.

Talmud ahihleh Judate laibu ngaihsaan mahmah khat ahi a, Bible tawh kibang khop a ngai zong Judate lak ah mi tampi a om uh hi. Talmud in Esther tungtaang thu a gelhdan in, Kumpinu diing a Esther a kisak hunlai in, amah keem mi chilgehte’n sa leh zu chikim a neek a a dawn diing in a pia ua, hilezong Esther in Danielte bangsimtak in  hih a neek a a dawn diing zute a unpi in a dawn utkei hi. Hibang ahihziak in kumpi innpi a numeite keem, mi chilgeh Haggai in zong lamdang asa a, tuachiin Esther kiang ah, hibang a sa chidam leh zu hoihte, na taksa hoihna diing a hung kipiate na deihkei leh kumpinu in na ching zoukei diing hi. Kumpinu a na chinkei leh pasal dang neih nang a diing in lemlou maithei ahi, tuaziak in zu hoihte leh sa chidam zousiah na neek diing ahi. Tua hileh na kidempih diing numei dangte saang in na hoihzaw thamlai diing hi. Hihte na bawl utkei leh nang a diing in kumpinu chinlouh theihna diing lampi a om ahi, chihte in a deihsakna thute a na gen hi, chih ahi a, tuaziak in Esther pen sa nelou (vegetarian) kichite ahi. Hilezong Esther taksa a hoih deuhdeuh chih a ompihte leh kumpi innpi a numeite keem nupite’n a mu ua, tuachiin nupi khat in, taksa hoihna diing a an hoih leh zu hoih a tuatte ne utlou a Esther a hoih deuhdeuh pen leitung a sil lamdang tawpna hi in the chiin zong a gen a kichi hi.

 

4. Kumpi Mi Chilgeh Haggai Genphatna.

Kumpi Ahasueras hunlai a kumpinu diingte pen taksa hoihna, meel hoihna leh pian nalhtak hihnate baan ah a poimawh mahmah khat a om a, tua pen ahihleh, a aw (voice) a nalh ei? A aw suak bang a chi a? chih leh kumpinu diing in pilna a nei ei? Chihte ahi.

Kumpinu diing a nu-ngaak hoih leh etlawm taktakte, kum khat sung keem a, kumpinu diing a kisakna a pia mi chilgehte’n a numei kepte uh lak ah, kumpinu diing a ching kua e? chih kumpipa saang in zong a theizaw ua, tuachiin kumpipa in zong hih mi chilgeh, numei keemte kiang ah, a aw nalh, a aw (voice) ngaihbaang deuh, aw (voice) kilawmtak nei, leh numei pil, kumpinu diing a ching, pilna nei numeite a vakan or dong zeel hi. Hibang ahihman in Haggai in kumpipa kiang ah kumpinu diing in Esther ching asakna thu a gen, a aw (voice) a kilawm a, tualeh a lungsim navaak in a pil mahmah hi, chiin a genpha hi.

 

5. Esther Tawh Kisai Tuamtuamte

Esther hoihnate a kigenna mun tuamtuamte ah, sunglam hoihna leh pawlam hoihna anei khawm a, tua in Kumpi Ahasuerus lungsim a zou hi, a kichi hi.

Kumpi Ahasuerus zi a Esther a pan chiillai in kum 15-17 kikaal mi hi diing a ngaihsut ahi a, amah pen mi lian or dinsaang hilou in, feet 5 leh inch 2 or 3 pawl hi diing a tuat ahi. Amah mi lian hikei lezong a vun a hoih a, a aang bawk pen hi venvan deuh hidan in mun khenkhat ah a kigelh hi. Mi thau lua ahikei a, a gawng siipsaap zong ahi tuankei hi. Pasalte a diing a aam-huaitak taksa nei hi a gen in a om hi.

Esther Haa Hoihdan

Esther pen a taksa leh vunte bek hoih ahikei a, a haa (teeth) mahmah zong hoih in kilawmpih mahmah hi, a kichi hi. Hihzahta a meel hoih leh pian nalhtak ahihziak in Kumpipa mai a a kilah masanglai a kipan in zong a saltaanna mun a tangvalte leh a Juda mi hihpihte’n zong a deihthei mahmah ua, hilezong amah keem Mordekai pen mi khauhpaitak ahihziak in kuamah in a neelngam taktak kei uh hi. Tualeh Esther nuihmeel mu ngailou a mukha tangval khenkhatte lungsim ah, Esther khazumdan, a haa leh a maitang kilawmnate thaamden ahihman in, lampaite’n lampi a pai ahihlam uh zong theilou in pialkha uh kichi hi.

 

Esther Hunlai a Numeite Pasal Neihdan

Esther hunlai a numeite pasal neihdan pen, taanglai i pu-le-pate uh hunlai a mah bang in a na pal mahmah ua, a taangpi in kum 15 lak ahih chiang un numeite’n pasal nei uh hi. Abaan gelh ngap nawn k’eng… awl in aw…