A DINMUN LEH HIHNA THEILOU MIHING (E01)

 

By: Pastor Thangdoulal Suantak

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in chibai ka hung buk hi.

 

BIBLE: Gen.2:8 Tuachiang in Toupa Pasian in suahlam ah, Eden huan a bawl a; a mi bawlpa Adam tua huan ah a koih hi.

Leitung kisiam chiillai a kipan in, leitung mihingte lak ah a hihna diktak leh a dinmun diktak thei a hinkhua zangh kuamah omlou i na hihna uah, i mawhna uh leh i khelhnate uh, i gamtat-khelhnate uh kitheilou in hun bangtan hiam chiang i na zangh chiat ua, hibang a hun zangh leitung mihingte lak ah mi masa Adam hun zakh sung tom pen maithei diing in ka ngaihsun hi. Gen.3:21 i sim leh, “Toupa Pasian in Adam leh a zi a diing in savun puantual a bawlsak a, a silhsakta hi,” a chi hi. Hih Bible taang pen, Bible siamte’n a genna uah, ‘Pasian in a mawhna ziak ua Adam leh a zi Eve a hawlpawt nung a ama’uh a diing a kithoihna a na bawlsakna ahi a, savun pen ahihleh belaam vun ahi, a na chi uh hi. Aziak pen kithoihna omlou a Pasian a kipan a damna omlou ahihna ah, mi masa Adam a diing pen, Pasian mahmah lou kuamah a bawlsak diing omlou ahihziak ahi,’a chi uh hi. Bangteng hileh tuni a i gen ut pen uh, Adam a diing a kithoihna kua’n a bawlsak e, chih ahikei a, mi hingte’n i dinmunte uh leh i hihnate uh i theihlouh daan uh tawh kisai thute ahizaw hi. Tuaziak in mi masa Adam in a dinmun leh hihnate a theihlouhna a kipan in i houlimzaw diing uh hi.

 

ADAM DINMUN LEH HIHNA DIING DIKTAK

Pasian in Adam pen, leitung kilawmsakna diing bek a a bawl ahikei a, thupina leh pahtawina or phatna a kiang a pia diing a zong a bawl ahi. Vaantung leitung ah Amah bang kuamah leh bangmah omlou ahihman in sil zousiah in Amah thupina a piak ua, a biak diing uh pen Pasian in Ama hihna diing a a deih pen leh a kiveinatna zong ahihziak in Adam pen a mawk-om diing in bawllou hi. Tuaziak in Pasian in mawhpuakna Adam a guan a, tua a mawhpuaknate pen ama (Adam) dinmun leh hihna diing diktakte ahi.

Adam Mawhpuakna:

1. Huan etkol or keem diing.

2. Pilna singgah neeklouh diing.

3. Pasian tawh a kipawl diing, chihte ahi taangpi hi.

Hih a tung a i gen uh thumteng pen Adam dinmun leh hihnate ahi a, Adam in a dinmun a zou ei? A hihnate a zou ei? Chih pen Pasian in etkhiatna a nei a, A (Pasian) etkhiatna ahihleh Thu a man leh manlouh ahi.

 

ADAM IN A DINMUN LEH HIHNATE A ZOU EI?

Adam in a huam kep diing pen a keemzou taktak ei? A kep zawhlouhlam ki-genlou ahihman in a keemzou ahi maithei hi. Ahihleh a pilna singgah neeklouh diing pen nelou in a om ei? Omlou a, va-ne hi. Pasian tawh kigawp gige diing chih hinapi, Pasian tawh a hunzakh sung saang in a zi tawh a hunzakh sung sawtzaw or tamzaw ahihman in Pasian tawh hun zangh tamlou ahi diing a Adam in pilna singgah ve-nekha laizang hi. Ahihleh, Adam in a dinmun leh hihna diingte a zoukei chih a kichianta hi. Hilezong Adam i mawhsak kei uh hi.

 

ADAM IN A DINMUN LEH HIHNATE A ZOUKEI CHIH NA MUTA HI. NANG NA ZOU HIAM?

Leitung ah eima mawhna leh chitlouhnate saang in mi dangte mawhna leh chitlouhnate a kithei baihzaw a, a gen zong nuamzaw hileh kilawm hi. A huachi kei a huachi a vele, huachi kei leh huachilou diing avele, chi a mite tung a thukhen pen kibaih-bawlta hi. Mi dangte chitlouhnate na zaak hiam, na theih hiam chiang in, kei zong chitna neilou pen hi veng aw! Na chi ngai hiam?

Nu-le-pa khenkhatte pen, teep-le-muam zongsang (adict) hinapi, a tate uh kiang ah, teep-le-muam bawllou diing in a thuhilh ua, a tate un teep-le-muam bawllou diing a a thuhilhnate uh a zuihlouh chiang un a zeep ua, phawk gawp-gawp uh hi. A taktak a chih in, hih pen nu-le-pate mawhna hi. Tate mawhna khasiatpih nu-le-pa kitamta a, nu-le-pate mawhna khasiatpih tate kitamta hi. Adam in a dinmun leh hihna diing diktakte a zoukei, nang na zou hiam? Tua na omdaante, na neek a na dawn daante Pasian in a hung lungdampih taktak na diam? Na vaihawmna ah Pasian a lungdam na diam? Na nna sepna ah Pasian a lungdam taktak na diam? Na awsuak Pasian lungdamna ahi taktak na diam?

Nang leh kei zong, Pasian a pan a i dinmun leh hihna diing diktakte zoulou a, i innsung a ki-pa pensak a, eimah sun i tate or i innsung mite samsiat diing pouh a mi gii a pangte i hikha maw? Ei bangbang a i innsung mi lawhsamte tung a hehdaan bek theite i hikha maw? Ei mahmah in panlak sawmlou a, mi dangte or innsung mite panlakna a lawhchin sawmte i hikha maw? Adam in a mawhna a zi a piaksawn bang a na mawhna mi dangte pesawn a, nang-le-nang siam kitan na hikha maw?

Limtak in ki-ngaihsun thak inla, na dinmun leh hihna diing, na zawhlouhte tawh Toupa Pasian kiang lam a kileh in, nang a diing in hun a tam nawnkei maithei diing hi.

Na thupukna bangbang in Toupa’n thupha hung pia hen…