YUSUF LEH ZULEIKA TAANGTHU
By: Pastor Thangdoulal Suantak
Islam Bible leh Hebrew Bible in a genkhawm
uh, Jusuf taangthu tawh kisamkaih numei meel hoih Zuleika taangthu
ngaihnop-huai tuni’n i na ngaihsut khawm diing uh hi. Tualeh Bible a taangthu
ngaihnop-huai tamtakte lak ah tuni a, Yusuf leh Zuleika kaal taangthu i suut
khawm diing pen uh ahihleh, Islamte Bible leh Hebrew Bible in a na gen Joseph
taangthu tawh kisamkaih taangthu ahi a, hihpen internet manphatna tungtawn a
muhtheih in zong a om a, a kichianzaw a sim utte’n google ah, a tung a topic
gelh in a muhtheih diing hi.
Yusuf kichi pen Joseph chihna ahi a, Jakob
tapate lak a sawm-le-khatna ahi a, a pa Jakob in a zi nihna Rachel tawh a neih
ahi. Joseph taangthu Genesis bung 37-50 ah a na ki-hahgen diak hi. Joseph
ahihleh, leitung mihingte lak a kideektheihtak a gen minthangpa zong ahi hi.
Zuleika
leh A Hoih gTungtuanna
Bible ah Zuleika kichi mihing min a kimu
kei a, kua ahih zong a thei a kitam diing in ka gingta kei hi. Hilezong Bible a
Potifar zi kichinu pen kua hi a, a min bang chihte leh Potifar zi kichi kua
mawngmawng e? chih theihkhiat sawm in, USA a om Maxwell Institute a saangsia Christine
Ashfield leh siamna leh theihna saangzaw neite’n pan a la ua, Egipt gam a
laibu lui, Joseph hunlai a kigelhte, Potifar tawh kisai thute leh Islamte laibu
tuamtuamte tawh kaikhawm in, Bible a Potifar zi kichi nu pen theihkhiat sawm in
(research) zonthakna a bawl ua, tuabang a a bawllai un, Potifar zi pen Zuleika
ahi chih leh numei meel hoihtak, pianken a dembaanglou etlawm leh nalhtak ahi
chih a mukhia uh hi. Egipt kumpi Faro innsung a nna sem uliante zite lak a zong
a hoihpen dan a gen in a om hi.
Hizah a dembaanna kichi mawngmawng neilou
Potifar zi meel hoihtak leh duang etlawm, a etlawmna lamdangtak in Joseph a
kheempuuk zawhlouh pen sil lamdangtak ahi, chi a gen in a om a, hilezong eite’n
Pasian a a gin-omna ziak ahi i chi utzaw uh hi.
Ki-etchianna
Diing: Na Pasian tung a na gin-omna in bangzah
in a hung minsesak in, hamphatna tuamtuamte bangzahvei hung suplawhsakta hiam??
Gen diing na neihkei leh, na Pasian tung a na gin-omna pen gin-omna hilou
maithei diing ahi.
Zuleika
Min Khiatna
Zuleika kichi Persian haam pan a kilasawn
ahi a, Zulaikha, Zuhleyka, leh Zuleika chihte in a kigelh a, a gelhdan kibang
kei leh zong a khiatna a kibang a, tua pen, saap haam in, ‘Brilliant Beauty,’
chih ahi a, ei haam in ‘Hoihna Bukim a Tuam,’ ahihke’h ‘Hoih Bukim,’ chihmai
diingdan in ka ngaihtuah hi.
Egipt
Gam Silate Dinmun
Taanglai Egipt gam a sila a kizangh mite
chii-nih/ pawl nih a khen in a om a, Gaaldouna hiam, kidouna hiam a kimankha
silate leh dangka a lei-thoh silate in kikhen hi. Gaalmat silate ahihleh
huan/gam leh lou-lam ah nna haksate, sing-le-suang bawlna tawh kisai nnate a
semsak ua, dangka a a lei uh silate ahihleh innsung nnate a semsak uh hi. Joseph
pen dangka a lei-thoh sila ahihziak in innsung nnate sem in a pang hi. Hih
silate tawh kisai a theihbaihdan pen Spartacus Movie enkha zousiah in i
theisiam diing un ka gingta hi.
Joseph hunlai a numei leh pasal silate
ahihleh taksa nopsakna a a pute uh leh a pite un a ut bangbang ua, a ut hunhun
ua a zaktheih uh ahi. Tuaziak in Faro ulian zousiah in a zite tawh hun a
zanghtam kei ua, tuachiin a zite uh zong kiphamawh mahmah sam uh ahihman un, a
sila uh pasalte sam in hun nuam a zakpih zeel ua, hibang a thang-huaina pen
ama’uh a diing a thang-huaina ahihlouh ziak in bangmah a buaikei hi. Hibang
dinmun ah Joseph zong va-omkha ahihman in a pi’n luppih diing in a chial
mialmual a, hilezong a ngahkei chih Bible a i muhdan uh ahi. Joseph in a pi thu
a manlouh pen sila a diing a mawhna saangtak ahi a, tuaziak a gawtna a thuak
diing ninapi, a aam-huaina leh a etlah-huainate ziak in a pi’n a gawt sawm kei
a, zol-khiat a luppih teitei diinglam ah a koihzaw hi. Aziak pen amah zong
numei hoih leh kilawmna bukim nei, gimnamtui thupitak a kizuut khat ahihziak in
a zol-khiat zawh diing a kinem hi.
Ki-etchianna
Diing: Sila dinmun a om, hihtheih bangmah neilou
in na kithei hiam? Sil hoihloute sila na hikei a, Pasian sila na hi. Nang thu
in gamtat sawm mawk kenla, Pasian aw, na lungsim bil in ngai in. Hoihlouhna in
a hung tuam leh, Pasian in a lampi hung honsak diing hi. Amah muang in.
Zuleika
In Yusuf (Joseph) A Kheemdan
Theologiante leh Egipt a uliante taangthu
gelh a koih ahihna ah, Zuleika pen numei hoihtak ahihban ah a pasal Potifar tawh
a kaal uh a buai mun mahmah a, ama’uh hunlai a kigelh laibute ah zong a
kilemlouhdante uh gelh in a om a kichi hi. Hibang dinmun a Zuleika a omlaitak
in a deihbang a hoih leh aam-huai tangvaal meel hoihtak Yusuf a inn ua a
va-ompen a hamphatna a ngai in, a luppih sawm gigeta hi. Zuleika in Yusuf a
kheemzawhna diing in kamsiam in a houpih gige a, a Pasian tawh kisai thute a
dong a, tualeh a taksa aam-huai khop a dawksak in Yusuf a kiang a pai diing in
a samsak tadendon hi. Theihtawpsuah a Zuleika in Yusuf a kheem a, a pasal a ut
dandan a a bawltheih dante, leh a lungsim bang a a utnate a taangtunsak leh a
pasal that a amah kiteenpih a, tuachi a Yusuf pen Potifar suak mai diing chihte
in a zol mialmual hi. Zuleika in a pasal Potifar pawtna diing bekbek a zong a,
a pawtkhiat kikaal in damlou kheem kineih in amah keem diing numeite zong
kikeemsak utlou in Yusuf a kikeemsak diing in a room ah a samsak mialmual hi.
Hitalezong kheempuuk zoulou hi.
Ki-etchianna
Diing: Diklou a na theihsate bawllou diing a
kidekzawhna na nei hiam? Nangmah ah kidektheihna a omkei maithei diing hi,
hilezong na biak na Pasian min suang a na kidektheih diing pen nang mawhpuakna
hi. Sil hoihloute kikheemsak ken, na Pasian lungkimlou diing ahi.
Zuleika
In A Motpih Yusuf Meel Hoihna
Research bawlte’n Zuleika tawh kisai thute
a zonna uah, Yusuf hoihdan zong muhkhiat anei ua, tua pen hibang in a gen uh
hi. Zuleika in ni khat, a inn a om numeite leh Faro uliante zite an nekpih
diing in a samkhawm a (tulai a party bawl i chihdan un), a an nekna diing uh
dawhkaan ah sek leh a metna diing temta tawh zong a koihsak chiat hi. Tuachiin
an a ne ua, hibang a nekna leh dawnna a bawl sung un Yusuf mun ningkhat ah
Zuleika in a omsak hi. Tuabang a nekna-dawnna a bawl uh a zawh diing kuan un,
Zuleika in Yusuf a sam a, tuachiin Yusuf ama’uhte lak a hung pai hi. Hibang a Yusuf
a hung pailai in, Zuleika in a chial a nekkhawmpih numeite’n hoihsa in a en ua,
Yusuf a etnalam un, sek metna diing a kikoih temta tawh a khut uh a atkha ua,
hilezong a ki-atkha uh chih a theikei ua, Zuleika in bang diing a na khut uh na
at uh? A chih dong a ki-atkha uh chih zong a theikei uh, chi a gen in zong a om
hi. Hibang hunlaitak in Zuleika in a nekkhawmpihte kiang ah, ka innsung silspa
ahi a, na khatvei muhna ua hibang a na buai uh, kei a ompihnu a diing in iplah/
etlah-huai ke’nteh na chi uai le? Chi in a nui keuhkeuh hi, chiin zong a gen uh
hi.
Ki-etchianna
Diing: Hibang a numei meel hoihtak in luppih
diing a a kheem zohlouhpa pen Pasian hing, Bible a i muh uh Pasian a bia mi
khat ahihziak ahi. Yusuf in a Pasian ziak in hibang teng tan-ngam hi. Nang
hileteh bang na chi diai? Na Pasian ziak in na leitung utnate leh lunggulhte na
nusia ngam diam??
Comments
Post a Comment