Christian Fundraising

 

✍️ Pastor Thangdoulal Suantak

I saptuam sung zong, sum zonna vive na chi maw! Na chi tham maithei diing hi. Ke’n zong ni danglai in sum zong pawlpi hi dekdekta hang e, chi in ka na ngaihsut kha-tham hi. Saptuam lamkaite, a diak in Saptuam sung a pay-workers i chih uh kha sum saangte bang, kha khat a khatvei bek i localte ua hung kikhawm uh ahih hang, hih sum-le-paai zonate ziak in ama’uhte tawh kikhop diing zong, ut-huailou chi a genkhiat diing i utlouh hang, i lungsim uh utlouta ahihman in, kilawpna tawh hilou in, alou-theilou a ngaihna ziak in i kikhawm haam-haam zeel uh hi. Aziak pen, sum zonna a hung nei diing uh hi in teh chih ngaihdan in i lungsim uh luahdim phial-phialta hi. Hibang ahihziak in, tuni in Laisiangthou dungzui a sum-le-paai zonna thute, Christian Fundraising chih thupi a nei in i kikumkhawm diing uh hi.

I gam ah Fundraising chimtaak mi bangzah hiam ki-omta hi in ka thei a, tualeh hih Christian Fundraising hahbawl pawlpi pen, a mite mahmah in pahtaak lou hi in zong ka thei hi. Hibang ahihziak in Fundraise hahbawl lou pawlpi belh ut a zong dap zong ki-omthei hihtuak hi. Tualeh hih Fudraise hahbawl lou pawlpi a na omsate’n Fundraise ki-hahbawlna pawlpi hi a, a theihte uh beel ngamlou uh hileh kilawm bangtak in kilangthei hi. Tuaziak in tuni in limtak in ngaihsun thak ni.

Laisiangthou sung ah Sum-le-paai zonna (Fundraising) tampi muhtheih diing in a om a, hibang a sum zonnate tup-le-ngim ahihleh leitung a Pasian nnate sepkhiat a a om theih na diing ahi a, ei innkuan nnate sepna diing ahikei a, ei local nnate sepna diing zong ahikei a, tualeh ei pawlpi khantouhna diing nna-le-silte sepna diing zong hi masalou in, Pasian kumpigam khantouhna diing a panlakna ahizaw hi. Tua ahihziak in Laisiangthou sung a etteh diing i muhte uh i en diing uh hi.

I. I Etteh Diing Uh LST A Fundraising Na Bawl Masa Ahihleh Mosi Ahi A, Ama Fundraise Bawlna Thute Exodus 25, 35, Leh 36 Ah Om Hi.

Mosi in Israel mipite kiang ah, ama’uh kiphal dan bang a sil piakte pia diing in a gen hi. Ex.25-na ah “Thohlawm” a phuut a, 35-na ah “Vanhzak tuamtuamte (materials)” leh 36-na ah, “A khutsiamna uh,” a phuut hi. 

Hih bungte ah, mi kipumpiak bangzah hiam zong muhtheih in a om hi.

II. Etteh Diing Dangkhat Ahihleh, David Hinkhua Ah A Kimu Hi. Ama’n A Tapa Solomon Biak-Innpi Lamna Diing In Fundraise A Na Bawl Hi. Hibang A David Fundraise Bawlna Ahihleh 1chro. 29:1-20 Ah Kimuthei Hi.

1Chro. 29:10-16, … “Hilezong hih kiphalna silpiakte pe diing in, kei kua ka hia, ka mipite zong bang a leltak ua? Sil zousiah nang a pan a hung kipan vive ahi a, na neihsate mah hung pekiik hi ungh...”

David in kipumpiaktak in silpiak apia hi chih i mu uh hi.

David in mi dangte zong, silpiakte pia diing in, hangsantak in haanthawn hi.

Ama’n silpiak ah lungdamna lianzaw hi chih mipite musak hi. 

Tualeh khangsawn hung om diingte’n hih silpiakte a phattuampih diing uh hi chih David in muhkholhna nei hihman in piakna hahbawl mahmah hi. 

III. Nehemiah In Zong Leitung Vanhzakte (Secular Resources) Pasian Thupina Diing In Zangh Hi Chih Nehemiah 1 Leh Nihna Tungtawn In Kimuthei Hi.

Nehemiah in Artaxerxes panpihna a nget masang in naktak in thuum masa hi. Tuachiin ama’n Artaxerxes a kipan in support tampi a mu hi. Hibang a haksatak a Nehemiah in fundraising a bawllai in gingloute (pagans) a kipan in huhna/ panpihna bangmah a mukei hi.

IV. Jesu Khrist In Zong, Nna A Sepna Mite Kiang A Kipan In Huhna (Support) A Mu Hi. 

Luke 8:1-3, Tualeh hi chi a hung hi a, Jesu thuhilh kawm leh Pasian kumpigam tangthupha gen kawm in khuapi leh khuata ah avak kawikawi a, sawm-le-nihte a kiang ah a om uh hi. 2 Tualeh numei kuate hiam, dawi pai damkik leh natnate a pat damkik Mari Magdalini achih uh, a sung a pat dawi sagih pawt-dokna nu tawh, 3 tualeh Herod dangka kemtu Chuza zi Joanna tawh, Susana tawh, tualeh mi dang tampite tawh ahi ua, huate'n a neihsa un a nna asepsak zel uh hi. 

Lk. 6:38, Pia un, tuachiin piak in na om diing uh…..

V. Paul Hinkhua A Kipan In Zong, Fundraise Tawh Kisai A Etteh Diing Om Hi.

1. Mi tampite’n Paul pen, innlam a amah leh amah kitou-delh hi chi in a thei ua, a dikna chiang a om hi. Hilezong 2Korinth bung 8na leh 9na a i lut leh a fundraise bawlna tawh kisai muhtheih diing om hi. 

2. I Corinthians 16:1-4 leh Philippians 1 leh 4:10-20-nate ah zong, Paul in fundraising a bawldan (techniques) muhtheih in om hi. 

Bible Simna: Philippi 4:15-16,19, Tu in nou Philippite'n tangthupha a hung om chiil a, Mesidonia gam a pat ka paikhiat lai in, nou chihlouh, saptuam dang kuamah in piak leh lak lam thu ah bangmah in a hung kithuahpih kei uh chih zong na thei uh hi. 16 Aziak, Thessalonika khua ah zong ka taaksap panpihna nung khak kik zel uh hi. 19 Tualeh ka Pasian in Jesu Khrist a thupina a a hauhsatna dungzui in na taksap zousiah uh a hung pia diing hi.

3. I Timothy 6:17-19 ah, Paul in mipite kiang ah, a lungtang ua a kiphal bang zeel ua pia diing in challenge a bawlna kimu hi. 

Bible Simna: 1Tim 6:17- Tu-khang a mihausate, a kisaktheih louhna diing uh leh hauhsaknate a kimuanpih louhna diing un thupia inla, Pasian a lam-etna ngazaw diing in gen in….

Gen nuam tampi omlai lezong hizah a hunsak utta i hihman un, a tawpna a i lungsim ua i kep diing uh thu ahihleh, Christian Fundraising pen Bible tawh kituak a bawl ahi a, hilezong Khrist min a fund zonna a tam luattaak ziak in piak diing a lawm leh lawmlou enchain diing in i ki-ngen uh hi…

Toupa Pasian in Thupha hung piata hen……..