I LUNGGEL UH BUAIPIH HIZAW VE-HANG AW!

__✍🏻 Pastor Thangdoulal Suantak

Leitung ah ei saang a dinmun ngiamzaw deuhte i muh chiang un, hampha kisakna liantak i lungsung uah i nei ua, eite saang a dinmun saangzaw deuhte i muh chiang un, vaangsia kisakna liantak i nei zeel uh hi.

Hih vaangsia kisakna leh vaangpha kisakna pen i lungsim puakdan uh ahihziak in, i ngaihtuahna uh leh i lungsim puakdan un, eite a hung lungkhamsak thei a, tualeh a hung lungdamsak thei hi.

Lungkham mangbang leh haksatnate thuak a, buainate’n a hung tunkhumlai un, meelmapa’n beidonna guam ah a hung puilut a, tuachiin i lungsim ngaihtuahnate uh ahilou-lam a paisak sawm in, vaangsia kisak diakna, thuak kisak diakna, haksatna thuak diak a kikoihna lungsim nei a, ei tungtawn a Pasian deihlou leh huatte bawl na diing hunlem a zong hi.

Khrist, Jesu neihna ziak a kheemnate’n eite a hung taisan diing ahikei a, Amah (Khrist Jesu) pen hua kheemnate i zohna diing uh ahizaw hi.

Hichibang ahihziak in, i lungsim ngaihtuahnate un, sil zousiah asia lam bekbek a amuh gige na pen meelmapa thununna nuai a gamtatna chi-khat ahi chih theisiam a, Toupa a diing a i lungsung ua mun siam a, amah Khrist Jesu a ki-ngak zeel zawkna diing in hanchiam chiat ni.

Ama'n thuakgimte thuaknatnate a simmawh leh a kihdak bawl sak kei hi; amai zong kei a pan in a phualkei a, hinanleh a kiang a ka kikou chiang in ama'n a hung za hi. (Laate 22:24)

Hih Bible taang a i muhbang un, hih leitung leh a sung a sil om zousiah neitu Toupa Pasian in, haksatna leh thuakgimna munte ah zong, kipahna thuguk a hung pia a, a kha-muanna leh a ompihnate hua a kipan in a hung kilangkhia zaw hi.

Toupa tung ah na puakgik nga lechin, Ama'n na hinna a hung kepsak diing a; bangchiktan in zong ama'n mi diktat a puuk diing a phal kei diing hi. (Laate 55:22)

Nou a misiangthoute aw, Toupa laau un, Aziak pen amah laau mite a diing in taaksapna kichi a omkei hi. (Laate 34:9)

Toupa’n a thupha hung pia hen!