Eite hung mangngilh lou Pasian in vaak hi diing in hung deih hi.

 

___✍🏻 Pastor Thangdoulal Suantak

 

Mi tampite’n i min a mangngilhta kha-diing ua, eite’n zong theihphaak a i neih nawnlouh uh bang a tam mahmah kha-diing hi.

Hitalezong, i Pasian uh ahihleh hichibang a hikei hi. Ama’n eite a hung theihzingna pen bangchik in zong a mansuah ngai nawnkei diing hi.

Leitung in a pahtawi theihzeel mite pen, mi bik, bangchidan hiam lam a mi manphate ahi uh hi. Hitalezong, huachibangte pen sil hih diingdan mawng ahi, a chihtheih kei hi.

Mite pahtatna kinemte gensiat in a omthei zawsawp ua, hilezong Pasian in a mite lunggil sung ah bittak in a keem tawntung zaw hi.

Eite pen, i Pasian un taangtawn a diing in eite hung paisan ngaikei mahleh, eite’n Amah i pialsan un i paisan mun mahmah uh hi!

Banghiam khat bawlkhiak sam diing i ut ua, mi thupi hih leh tawisaan a om diing chihte i lunggulh chiat uh hi.

Hichibang lunggulhna pen sual/ khelhna ahikei a, hilezong i tupna dan uh leh i lungsim uh pen, Pasian thu tawh a na kilehkalh kha-zeel hi.

Pasian in a hung bawlna ziak diktak bang a hinkhua zatna pen eite thupina penpen ahi hi. Mi thupi hih diing sawm a, kiletsakna pen Ama huat leh deihlouh sil ahi hi.

Mi zousiah a diing a, vaak hi diing a siam i hi ua, khelhna/ sual ziak in i mial khinsiangta uh hi. I Lungsung uh vaak, khelhna ziak a mial nuai a om pen, vaaksak kiikna diing in, Jesu Khrist piak in i om uh hi.

Vaak hi diing a eite hung lem-entu Pasian i mohpaih theikei diing uh hi.

Amah a i om ua ahihleh, mial mialdante tung a gualzou in, Ama vaak ah i vaak sam diing uh hi.

       🎍🎍🎍🎍🎍🎍🎍🎍🎍🎍