KHRISTIAN KICHITE KUATE AHI UA?

By: Pastor Thangdoulal Suantak

 

Leitung ah Sahkhua-na chi tuamtuam a om a, hua sahkhuate’n ama’uh thugin leh pomdan khat chiat a kineih ua, huachibangte lak ah Jesu Khrist gingtute ahihleh Khristiante a kichi a, zong a dik ngei diing in i koih uh hi.

Hichibang ahihlai a, leitung in Khristian chi a, a theih mite’n, Pasian in leitung mite a diing a, a gamchiamna mun ah mi zousiah a kitungkim kei diing chih Bible hong thuhilhna ahi, a na chi uh hi. Khristian hi ngal a vaangam tunglou or kaailou diing chih mawk pebn, bangziak hithei diing ahia? Hichibang ahihtaak leh, leitung in a theihsiam louh Pasian thu in gen-le-sak bang a nei a, chih i et uh a ngaita hi. 

 

Bible in Khristian a chihte kuate ahia?

Bible a Khristian chih thumal a kimuh masakna pen ahihleh Nasepte laibu sung ah ahi a, “Tualeh amah a muhtak in Antiok khua ah a hung paipih a, tualeh hichi a hung hi a, kumkhat sung pumpi kikhopna ah a pang ua, mi tampi thu a hilh uh hi. Tualeh Antiok khua ah nungzuite Khristian a kichi masa pen uh hi.” Nas. 11:26, na in a na chi hi. Hih Bible bung leh taang a i muh uh “Nungzuite” pen, Jesu nungzui sawm-le-nihte a hikei ua, Antiok khua a gingtute ahi uh hi. Hichi ahihziak in eite’n baihlamtak in Khristian kichite pen Jesu Khrist hinkhua zui a, Jesu thumopna zuitute ahi uh chih chiantak in i thei uh hi.

 

Khristian i hi sam uh hiam?

Tulai a i innsung leh saptuam sung baan ah, kholai a i houlimna uh leh i omdante uh a Khristian in na thei hiam? Na omdan a Khristian na hiam? MLA kiteelpina a om chiang a i omdante uh a Khristian na hiam? Kiteelpina khat pouhpouh a i omdante uh leh i gamtat dante uh a Khristian na hiam? Pasian saang a dangka masuanna hinkhua kua teng in i zangkha ua? Dangka sum-le-paai a diing a i lungsung ua mun a ombang in Pasian a diing in i lungsung uah mun a om na hiam? Jesu Khrist hinkhua zui a, etton a neite i hi taktak na uh hiam? Hih doknate na dawnna in Khristian na hih leh hihlouh a phuangzak diing hi. Nang leh nang, na luona tung hiam ah a na kidong teitei in aw!

Taanglai a gingtu masate bang a, Pasian saang a sum ngai-nazawte i hih samlouh na diing un Sawltal Paul in, 1Tim. 6:10 na ah, “Aziak dangka ngaihnatna pen gilou chinteng bulpi ahi a, hua pen khenkhat in a deihgoh ua, ginna a paimangsan uh, tualeh ama'uh leh ama'uh lungkhamna in a pumdim uh hi,” chi in a na gelh hi. Lawhchinna diing in sum poimawh masa lou hi, chih theisiam ni. Mahni a si a, Khrist a diing a hing Khristian hi diing in kipan thak ni aw! Aziak pen, mahni a si lou a Khristian hihna in vaan-gam hong tunpih lou diing hi.

Dangka (sum-le-paai) bek ahikei, i tulai khovel uh a khantouh mahmah taak ziak in, hukna in i gamsung uh fangsuakta hileh kilawmta hi.

I khangthak nu-ngaakte lah, social media lak a, mite aam theithei diing a kipost khawksalou zong omta a, hichibang mite lak ah, tulaitak a Mizoram Govt. in a mat Zolanu mahmah zong a hikha diing hi. Hichibangte pen, i Khristianna uh tawh a kituak kei chih theilou mah abang uh hi. Tualeh hih pen numeite bek ahikei a, pasalte zong ahi veve hi. Mobile phone a kuamah in a hong muhpih diing i utlouh uh muhnop chihte bang pasal khenkhatte’n ki-neita mawk hi. Tuaziak in tuni a na omdan, kuamah muhlouh a na omdan leh na lungsim pen Khristianna tawh a kituak na hiam? Chih a na ki-enthak diing in i ki-ngenzaw uh hi.

Khristianna tawh kituak lou hinkhua pen, Pasian a kipan a paimangna, ginna a kipan a taaimangna chi khat ahi, chih theisiam kawm a, Jesu gingtu mi khat ka hi na hiam? Chih ngaihsut diing in zong i ki-chial uh hi.

Lai Siangthou, Paunakte 22:6 na in, “Naupang a paina diing lampi ah kizilsak in, tua hileh a pichin khit chiang un zong a pialkei diing uh hi,” a chih thu tawh khatvei mawngmawng i innkuan sung uh i bul patthak ni i chi nuam uh hi. Hichibang a Pasian thu in naupang paina diing a, a na gen lampi pen, Mika 6:8 na a, “Khawtuahna it a, ki-ngiamkhiat a Pasian tawh zawkkhawm” na diing deihna ahi hi.

Leitung kheemna tampite lak a i dinkhiat zawh ua, innkuan a i ki-it ua, i hih dialdial theih na diing un, tha-sang in Innkuan a Pasian a diing in i kipanthak taktak diing uh hi.

 

Ahihtaak leh Khristian i Chihte uh Kuate ahita diing ua le?

Mosi in gamdaai a sum-guul a khaikaang pen, mi zousiah a diing ahihbang in, Jesu Khrist sihna leh thohkiikna pen mi zousiah a diing ahi hi; hitalezong, mi zousiah in i dampihkei uh chih i theo uh hi.

A awmzia chu, Mosi hunlai a Mosi in sum-guul khaikaang tan bek a, damna a omlouh bang in, Jesu Khrist sihna leh thohkiikna ziak in i dampai kei uh hi; aziak pen, 1Timothi 4:10 na a i muhbang un, ginna neite a diing in a hi deuh sese hi.

Jesu Khrist kiang a kilhden a om samte’n Singlamteh thu a theikei ua, hilezong, a khelhna uh a kithei ua, tuachiin Jesu Khrist pen, Messiah, Pasian tapa, Amah kei hong hundam theitu ahi chih a gingta a, “Toupa, na gam na tun chiang in, hong theizing in aw” chi a, lungsim tengteng a lam-etna, a neihna thu i muzaw uh hi.

Tuni’n zong, hondam ngai ahihna uh kithei a, hondampa Jesu a kinemte’n, Pasian hehpihna ziak a hotdamna pen, Singlamteh a Jesu sisan luang pen tungtawn in a tang zeel uh hi; ama’uhte ahih uh leh Khristiante ahi uh hi.

Ama’un vaan-gam kaina diing bek in Pasian a gingta kei ua, ama’uhte sia leh a hinkhua uh lal in a saang ua, huabang in a pomdet zeel hi.

Khristiante’n Jesu Khrist a ngaisaang ua, a hinkhua etton in a nei uh hi.

Khristiante’n sepkhial, bawlkhial a nei tham ua, hilezong, Jesu a ginna ziak un, Jesu thumopnate tawh kituak lou in hinkhua a zang uh chih a kithei ua, tuachiin Pasian kiang ah ngaihdam a ngeen zeel uh hi.

Peter in zong, Jesu a kitheihmoh bawl khit in, “A pawtkhia a, a kap ngut-ngutta hi” chi in Matthai 26:75na in a na gelh hi. Peter in Jesu a kitheihmoh bawl taktak a, hilezong Jesu a gingta kei chihna a hi tuankei hi. Jesu thuak zah a thuak diing in a ginna a na haat zoukei chihna ahizaw hi.

Hichibang mah in, Khristiante’n haatlouhna nei in a dou lah zeel ua, hilezong, lunggiltak ah a bawlkhelhna uh a kithei uh hi.

Khristiante’n bangkim a Jesu Khrist it sam diing a lunggulh ua, hilezong a lunggulh bang un ahi zungzung ngal hi, chihna pen a hituankei hi.

Khristiante’n khelhna a hu aua, hilezong khelhna utna mizia a maituah gige uh hi. Khristiante’n mi dangte theihsiamna a nei ua, tualeh dikna a poimawh-ngaih ziak un, hehpihna a tasam tuamkei uh hi. Aziak pen ama’uh sinsaktu Jesu ahi hi.

 

✝️TONGKUP-ZAITHA✝️