THU MANPHA 10TE

 

~ Pastor Thangdoulal Suantak

Tuni in, mihing hinkhua tawh kisai a thu manpha, thei na gige a i zuihtheih khollouh uh message giltak, i na kikum diing uh hi.

Tualeh eimite pen, himah veh aw, ka zui theikei a, dik mah veh aw, ka tawpsan theikei a, na thu gen dik mah veh aw, ka hinpih thei taktak kei a, chih kammal hahzakte leh hichi-bang a houlim utte i hih ziak un, i pil ua, hilezong i pilna uh hinpih lou, ahihkeh i theihna uh zuilou leh zui nuamlou minamte hile-hang i kilawm mahmah mawk ua, dahhuai hi.

“Za teep ken” i chih leh, “Himah veh aw, ka ngawl theikei a, “Zu dawn ken” i chih leh, “Himah veh aw, ka khawl theikei a” “Bible sim gige in, i chih leh, “Himah veh aw, ka mit haatlouh tawh ka sim zoukei a” chi in, tua-lah WhatsApp message leh sms sim a, thusia kigenna chinteng theite lah hi-ngal…. Ka ngaihsut-sut leh, Job thawngnou in “Zomite kichiamtehna pen Vaphual hi a, ahihhang Zomite’n Vaphual zia-le-tongte kithei nawnlou a, ut bangbang a ki-om in, khatvei leh san, khatvei leh vom in, thangkik kibangta ahihman in, thangkik in kichiamteh lehang i mizia uh tawh kituak diing in ka um hi,” a chih thu pen dik sakna ka nei mawk hi. Ahi’n eite pen, mite’n i omlouhna leh i zaak louhna lam a thangkik or thangkhiit tawh a hung genteh louhna diing un, thu dik leh hoih hi a i theihte uh zui diing in i ki-ngen masa ua, tualeh mihing in puakgik kinei chiat ahihna ah, i puakgikte uh, i haksatnate uh leh i buainate uh Laisiangthou in i solve sak theih uh a ngai a, Laisiangthou mah in a hung khamuan-theih diing ahi. LST in a khamuan theihlouh mihing na hihkhaak leh na ki-ngaihsut mengmeng inla, na ki-naihpih Pastor a na kimuhpih sawm in. Bangteng hileh, tuni a i ngaihsut khawm diing uh thu ahihleh

Khatna ah:

Hehna leh thangpaihna pen eimah a diing a natna ahihman in, hehna leh thangpaihna pan in kihemkhia in. Laate 37:8-na in zong, “Heh kideek inla, thangpaihna taisan in. Kihehsuah ken—hih in silhoihlou a suah zaw hi” chi in a hung thuhilh hi. A dikzaw na hihleh, na hehsuakna diing a om kei a, a khialzaw na hihleh lah, na heh theih na diing a om tuankei hi. Bible tungtawn a i Pasian hung thumopna zui leh, eima damna diing khualna in, hehna leh thangpaihna pan in kihemkhia ni.

Nihna:

Pilna gil neizawte’n, “Innkuante tung a DOHZOHNA pen Itna ahi” a chi ua, hilezong eimite pen, eima innkuante tung mah ah ki-haa-hiam ut sim taangpi a, kisiamthak ngai hi.

Tualeh “Mi dangte tung a DOHZOHNA pen ZAHNA ahi, a kichi a, hih zong, eimite lak ah, kizang diklou hileh kilawm hi. Aziak pen, Mi dangte tung a dohzohna pen meipuahna hiam, maipha zonna hiam in eite’n i ngaihsun taangpi ua, i ngaihsutna uh kheel ngai ahikha maithei diing hi.

Tuachiang in, “Patience with self is confidence” Mahni tung a Dohzohna pen Kimuanna ahi, chi in zong, pilna gil neizawte’n a gen ua, tualeh “Patience with God is faith,” a kichi hi. Hichibang ahihziak in, i hinkhua uah DOHZOHNA in gualzohna tansak sawm chiat hi. DOHZOHNA neihlouhna pen LOHSAPNA chi-khat ahi.

Kolosa 3:13, Khat leh khat kithuakzou tuah unla, ki-ngaihdam tuah un, khat in khat tung a thubuai bang a neih leh Khrist in nou a hung ngaihdam bang in nou zong ki-ngaidam un.

Thumna:

Na hun paisate ngaihsut tam ken, khitui luanna bep ahi khathei diing hi. Tuachimahbang in mailam hun diing zong ngaihsut tamlou ahoih hi, aziak pen launa, patauhna leh thawmhauna a hung tunzaw thei hi. Jakob 4:14; Matt. 6:34

Lina:

Na tu hun pen nui hiuhiau kawm a zakdan kisin in, tua in tha a hung guanzaw hi.

Hinkhua a sil khat pouhpouh a tun chiang in, hua in siatna hiam hoihna hiam a tun taangpi hi. Buaina khat pouhpouh pen i hoihna diing ahihke’h i siatna diing ahi a, banglam pen a i zakh diing e? chihleh, buaina tung a gualzoh diing leh guallelh diing pen eima deihteelna ahi taangpi hi. Jos. 24:15 (deihteelna)

Ngana:

Sil etlawm leh kilawm zousiah a hoih kim kei a, hilezong sil hoih zousiah a etlawm kim hi.

Gukna:

“Bang diing a Pasian in i khuttalte uh or i fingerste uh, a kikak ahihke’h gap nei a, a bawl e?” chih ahi a, hih dokna pen, dokna pil-huaitak hi in zong ka ngaihsun hi; nang dawn diing hileh bangchibang a na dawn diing na gingta a??

Hih pen bangdang hilou in, nang a diing a mi manpha diak (special person) khat a hung pai a, na a a hung hum a, tua gapte a tawntung a, a hukdim diing, Pasian deihna ahihziak ahi, chi in a kigen hi. Laate 136:4

Sagihna:

Lungdam tawntung diing in nang leh nang kisin in. Lungdamna pen maitaina leh damtheihna diing a poimawh ahihziak in, nang leh nang kilungdam suah sawm tungtung in. Nang a kipan a lungdamna na pawtkhiatsak theihkei leh lungdamna kichi nang a dia omlou mah a bangkha diing hi. 1Thes. 5:16

Giatna:

Pasian in nazousiah a kopching a abawl ahih chih muangzou in, nang koppih diing zong a bawl a, koi hiam ah hung ngak ahi, chih gingta in. Hichibang ahihziak in ahun diktak a tun diing ngakzou diing in pang in. (Look at the creation account in Gen.1)

 

Kuana:

Hinkhua i chih echo bang ahi a, na sawlkhiakte mah na kiang ah a hung tungkiik diing a, na tuh bangbang na at diing a, na piak bangbang na ngah kiik diing hi. Tualeh mi dangte omdan leh lungputdan na muh bangbang nang sung ah zong a om hi. Eccl. 12:14

Sawmna:

Mi dangte thukhen khum ken, tuachiin kuamah in a hung thukhen khum kei diing uh hi. Ama’uhte taanvaak diing in panla inla, it taak kei le-uh zong it in, tua hileh, hua itna na kiang ah a hung tungkiik diing hi. Mt. 7:1