Thu Kipah-Huaite Sil Bawl-Theihna Lamdang

~ Pastor Thangdoulal Suantak

Text: Paunakte 16:24= Thu kipah-huaite khuaizu bang ahi a, hinna a diing a khum leh taksa a diing a damna ahi hi.

 

Introduction

Ei mite pen, mi kamkhauh ga-gate i hihna uh ka thei a, tualeh mite a diing a thukipah-huaite gen saang a, thu khauh leh dongkholh, dong haam lam sianzawte i hi ua, i zi i tate kiang a, “Ka hinkhua a nang nung lutkhak pen leitung ah ka hamphatnate lak ah a thupi penpen hi in thei ing,” chihte leh “K’ung ngai mahmah hi or hoih k’ung sa mahmah hi or na hoih mahmah hi; leitung a mihing piangkhia teng lak ah, kei a diing a kilawm pen, ngaihbaang pen, it-huai penpen hi diing a, kei diing mahmah a Pasian siam na ngei diing ka taksang hi,” chih thute genkhia a, i innkuan sung relationship khauhsak sawmloute hi lehang kilawm mahmah hi. Tuaziak in tuni a kipan in thu kipah-huai i kizil thak sawm diing uh hi.

 

1. Na innkuante (Na zi leh tate) Hoihna Diing na deih leh Thu kipah-huaite bek tawh houpih in, aziak pen hih thu kipah-huaite ahihleh damna zatui ahi.

            Tuni in eite lak ah, a zi leh tate siatna diing deih a mangbang i om diing uh ka taksang kei hi. Leitung ah kuamah in a zi leh tate siat diing deih in teh chih zong ka gingta ngaikei hi. A omkha i om uh amale??

A. Tu ni a na zi or na pasal tawh na relationship uh or pumkhat na suahna uh a khauh deuhdeuh or a kip semsem diing na na deih taktak leh thu kipah-huaite bek tawh houpih tawntung in. Pempom chin chihte tawh kihou nawnkei ni. Khiamkhuam chin chihte tawh kihou nawnkei ni. Hichibang kamkha leh kha vilvelte tawh i kihou chiang in, tha ki-ngahlou a, kilawptak a innsung a diing a theihtawpsuah utna bei hi. Hibang kilawpna a bei chiang in, i nupa hinkhua nuamthei lou a, Pasian in pumkhat na hita uh a hong chihna pen kigaaldot thoh simsim hi. Hibang a na zi or na pasal tawh theihtawpsuah a na pankhawm louh chiang un, na tate uh a gammangsa ahi ua, na innsung uh zong a chim diing a khiipawk khin a suak hi. Hichibang ahih ziak in i zi or i pasal tawh i ki-itna a thuuk semsemna diing leh i tate khamuanna diing baan ah, innkuan kilawm, Pasian deihbang innkuan i tundingna diing un thu kipah-huaite bekbek tawh kihouta ni… Hua thu kipah-huaite pen hilh i ngaih diing uh ka gingta kei, aziak pen i theih chiat uh ahi.

B. Tu ni in, kua nu leh kua pa e a tate khantouh diing deihlou? A tate khantouh diing deihlou i om uh amale?? Om samkei ni maw?? Tu ni a a tate khantouh diing deih napi a, housia tawntung kua e?? Na tate khantouh diing deih napi chin a, hiaihuai chin, na motmot tawh chi in na housia sam diing ama?? Ngaihsun un! Bang diing a i tate uh haanthawn lou leh hanthot diingdan nasan theilou a, housiat tawh i hanthot gige uh e?? Tu ni’n housiat tawh i tate kihanthawn nawnkei ni… Laisim uh ahihleh; Bawi aw, hih na theihsiam louhte maw, nang saang a thupi zawloute ahi, hoihtak in buanthak in na zawh diing ka taksang hi, tualeh na zou teitei diing chih ka thei hi, na tha khatvei tawh sangthak in, chi a tate hanthawn dan kizil thak chiat ni. Leitung ah na tate saang a thupi zaw bang na nei a?? Tua ziak in thu kipah-huaite tawh tate hanthawn nu-le-pate hit ani aw…! Thu kipah-huaite tawh i kihou a, i kihanthot chiang in tha ki-ngah hi or tha tam hi…

 

2. Thu Kipah-huaite ahihleh Thupha ahi.

            Hih thu kipah-huaite pen KJV Bible in “Guh-le-taangte damna ahi” achi a, Version dangten “Taksa a diing a damna ahi,” a na chi hi.

Damtheihna pen leitung hauhsakna kichi a, hih hauhsakna thupha kichi hi. Ahin leitung thupha hi in vaantung thupha hileh, a kigenkhiat masangsiah thupha hi ngailou hi; tuaziak in gen khiat a ngai hi. Tuaziak in tu ni a kipan in na kam ah thu kipah-huaite bekbek pawtsak sawm in, tua hileh hih thu kipah-huaite sil bawltheihna lamdang na mit teekteek tawh na mu diing hi.

 

3. Phunna Chiilbawl Inla Thu Kipah-huaite Phaltak in Genkhai in

            Mite tung ah i hoihsak louhna leh i deihlouhte uh gen diing i haau chiat mahmah diing un ka gingta hi; hinaleh tu ni a ka gen ut ahihleh, na hoihsak louhna thu leh na deihlouhna thute gen in phunphun nawn ken; phunna in gah-hoih a sung ngaikei chih thei in, tulai ngelngel in, mi phunhatte min diing kiphuak ziahziahta hi; tualeh phunna saang a thu kipah-huaite sil bawltheihna leh gahsuah hoihzaw ahih ziak in, phunna chiilbawlta ni hang in, thu kipah-huaite phaltak in genkhia zungzung zawta ni…

            Mihing pen eimah leh eimah kimuhna saang a mi dangte’n a hung muhna uh a dikzawk mahbang in, nang zong mi dangte na muhna pen ama’uhte kimuhna saang a dikzaw ahi chih thei in, ama’uhte hoihna diing in na push up or nan awk thei chih thei kawm in, na kam a kipan a pawt thu kipah-huaite tawh mi dangte a diing in mi manpha, mi mantam hi in… Pasian in hua diing in nang hung deih hi…