PASIAN ITNA THUKDAN

 

~ Pastor Thangdoulal Suantak

TEXT: 1KOR. 13:4-7= “4 Itna in adawh zou a, a migi a, itna in a engsia kei a, itna a kiliansak kei a; 5 itna akilawmlou in a gamta kei a, amah diing bek akhual kei a, a hehbaih kei a, sil gilou a ngaihtuah kei a; 6 diktatlouhna ah akipak kei a, hinanleh thutak ah akipak hi. 7 Sil zousiah puakdan a siam a, sil zousiah a gingta a, sil zousiah alam en a, sil zousiah a thuak mualsuak hi”.

Introduction

            Kammal lak a a kitheikhial leh kithei siamlou kammal ahihleh “ITNA” ahi a, Sia Thanglammung in, “Eite pen itna kammal tawh a kihing kheemte hi hang a na chi hi. Tua ahihziak in “ITNA” chih kammal pen i suichian uh a ngai hi. Bible ah Itna genna a kammal kizang tam diak nih a om a, Agape leh Phileo ahi. Agape ahih leh New Testament ah itna genna in a kihahzak diak hi.

            Hih Agape itna pen 1Kor.13-na sung a i muhbang ua bangkim a huamzou itna ahi. Tualeh Agape kammal Latin haam a a kilehna ah Caritas a kichi a, hih pen KJV Bible a kammal kilangtak “Charity” hung kipatna zungpi ahi. Hih in a gen ut pen ahihleh, it huailoute itna, ittaak loute itna leh a hoihmawh penpente itna ahi a, hibang itna in bangmah a hung kipaik-thuk diing a lam-en kei hi.

            Agape ahihleh Pasian pianken (nature) ahi; aziak pen Pasian Itna ahi (1Jn 4:7-12,16). Tulai mite’n itna pen feelings hidan in a ngaihsun ua, hilezong Agape itna in feelings poimawhlou hi; Agape itna a sepkhiat ziak in a itna a, a feelings ziak a a it ahikei hi.

            Pasian in a hung it (agape) a, tuachiin a Tapa tang neihsun a hung pia hi. Hih pen Pasian a diing a a hoih ziak a, Pasian in a bawl ahikei a, itna in a sepsak ahizaw hi. Khrist in a hung it (agape) a, tuachiin a Hinna a hung pia hi. Hih pen a sih utziak a mawkkei a, hilezong itna a neih ziak in, Pasian poimawhna bang in a bawlzaw hi. Nupi khat in a ta senlai damlou a om, a zaan hahpih pen a ut ziak ahikei a, hilezong a itna in a zaan haksa zaw hi.

 

ITNA Vs DEIHNA

Itna (agape) i chih uh pen feelings tungtawn a hung omkhia ahikei hi. Hih agape itna pen ut thu leh deihtelna a ki-nga ahi a, hihziak mah in Pasian in i gaalte uh it diing in thu hung pia hi (Matt. 5:44; Ex.23:1-5). Aman i gaalte uh tung a good feelings nei diing hiam ahihkeileh ama’uhte deih leh ngai-na diing hiam in a hung sawlkei a, hilezong agape itna nei diing in a hung sawlzaw hi. Tualeh hih agape itna pen thumanna leh kipumpiakna tawh kikumkaih ahi a, feelings leh emotions ngai sese lou hi. Tualeh mi khat i it leh i mi it nu/pa hiam thupha leh deihsak tawntungna zonna ahizaw hi.

Agape itna ahihleh mihingte pianken ah a omkei a, ngaina khenlam pek a om Pasian tawh kisai ahi. Hih in ama origin a nei a, hih pen mihingte lungtang a hung kipankhia hilou in Pasian lungtang sung a hung kipankhia ahizaw hi. Tualeh hih Pasian lungtang a hung kipankhia itna pen mihingte kangthu ah a hung kiphuangzak hi. Tualeh tu in hih mihingte khangthu a phuankhiat a om Pasian lungtang a hung kipankhia itna pen Kha Siangthou tungtawn in ei Khrist a tatsate lungtang sung ah sunbuak in a om hi (Eph. 1:4; 1Jn.4:9; Rom.5:8,5).

Deihna kichi Itna a hikei hi. Haam kibak ziak in mi khat ka deih in ka ngaisang maithei diing hi. Ka khua mite khat zong gamtuam, theih ngailouhna gam a kimuhpih diing ka thanuam mahmah kha diing hi. Hih pen amah ka it ziak ahi sese kei diing a, hilezong ka khua ka tuite ka ngaihsaan ziak ahizaw kha diing hi.

 

Mihingte Tulmawh Vs Agape

Khristian ministries pen Agape itna luanletna ahi a, mite khotang hinkhua khantouna diing deihna a lamkaih ministries hi masa lou hi. Tagah inn i neih ua i bawlna ziak uh zong agape itna luanletna ahi a, tagahte gualphakna diing khualna himasa lou hi.

India a hung kuan misonari a tuul a simte’n ama’uh nopsakna nusia ua gen senglouh haksatna hung thuak uh hi; hih pen ama’un Toupa a itna ziak bek uh ahi.