NA PUANBUUK MUN KEEKLIAN IN

Is. 54:1-2 ~ Pastor Thangdoulal Suantak

 

Pasian in mi a gualzawl diing chiang in hausa masasak lou hi. Damna a piak diingte zong mi damtheite hilou uh hi. Tuni a PUANBUUK keeklian diing a sawla omte zong BUILDING INN/PUCCA INN a teengte, SINGPEEK INN a teengte, ahihkei lehBII INN,TUAL INN a teengte zong hilou ua, PUANBUUK a teengte ahi uh hi (Leitung mi lak lak a, mi dinmun ngiam penpente chih diing ahi).

 

Isai laibu bung 40-55 kikaal ah, kamsaang(prophet) Isai in Israelte adia hun haksa mahmah, Babulon gam a a saltaanlaitak ua amuh thute a na gelh ahi a, 53-na ah lam-etna neiloute adia lam-etna a om theihh na diing in Jesu (Messiah) tawh kisai thu a na gelh hi. 54-na ah Isai in Pasian mi, Israelte dinmun lam-et huailoutak leh haksatak theisiam kawm in, ahong tung ding mailam huna lam-etna thupitak om ahihdan,thu kipahhuai, Pasian kiang pan a, amuh te a na gelh ahi. Hibang ahihziak in, hih a nuai a thute limtak in i ngaihsun thak diing uh hi.

 

1. PUANBUUK KEEKLIAN DIING A KISAWL PASIAN MITE (ISRAELTE) DINMUN

(a) Pasian in a mite it mahmah, ngai mahmah napi a, a mite’n Amah a theihlouh chiang un, Pasian in a thuhilhna leh Amah kiang a, amite a kileh kiikna diing un, gamtuam mite zangh in suak le sal a taanna, lungkham-mangbatna,dahna-kahna,leh thuakgimna mulkimhuai tak tak te tuak tou sak(phukha sak) zeelzeel hi. Israelte’n zong a Pasian uh ana kitheihmawh bawlna uh, a ze-etna uh leh alangpanna uh tampi omta ahihman in, lungkham-mangbatna leh shihna mulkimhuaite athuak tou tou jel uh hi. Hilezong Pasian in ama’uh a mudah chihna hilou hi.

(b) Is.54:1-na ah Israelte pen Numei Chiing (Numei taneitheiloute) tawh Bible in a na genteh hi. Bible sung hoihtak a i et leh, Pasian in nna khat pouhpouh leh silkhat pouhpouh a patthak diing chiang in NUMEI CHIINGTE a na sam masa jel hi. Tun zong Amite a diing a sil thak khat patkhiak sawmta ahihman in amiteNumei Chiingtoh agenteh jel hi.

(c) Bible a Numei Chiingte toh kisai a  Pasian sil tup:

(i) Pasian in leitung ah Nam Siangthou khat a phuhkhiat diinglai a, a mi zakh masak pen ahihleh Sara (Abraham zi) ahi a, a Chiing ahi. Sarah in ta nei kei nanleh, asuan le khak te tampi pha ding chi in Pasian in thuchiam ana bawl mok hi.Ta neiloupi a, suan le khak tampi neiding chih pen, sil hithei mong mong lou khat ahi.(mihingte ngaih tuahna ahi).

(ii) Pasian in ami Israelte khangthu a kheelsak utlai in Manoah zi (Numei Chiing) zangh a, tuachiin Samson hung piang hi.

(iii) Pasian in tatkhiatna nna bukimtak a sepna diing in, Numei Chiing dangkhat a na zangh kiik a, tua pen Baptispa Johan piannu nu Elizabeth ahi.

Mite khutlum thuak a, gentheihna leh haksatna tampi thuak a,suak leh sal  a om Israelte adiingin  Pasian thu, Jawlnei Isai tungtawn in a  hung tung hi. Tua thu pen, “Puanbuuk keeklian diing”a chih thu ahi. Gamdanga suak le sal a aom laitak ua,puanbuk keklet ding chih thu Israelte kunga hong tung mok pen, Israelte adingin  sil hithei lou leh sil mothuai asuak hi. Numei chiing(ta neithheilou)te’n tu le ta tampi anei ding chih toh kibang veve hi. Hilezong Pasian apum muan ua, a athu akip-akoiaazuihdiing uh pen,Israelte mawhpuakna ahi a, Puanbuuk sunga teeng leh khosa maimai a  om Israeltekhosak dingdan, nek le tak, silh le teen, gamtat khohei dingdan pen Amah(Pasian) mawhpuakna ahileu leu hi.

 

2. NUNNUAM INLA, LAA SA IN KIKOU IN

Eite hile-hang, “Pasian aw, Babulonte a gilouh-louh uh tawh, bang chi in ka nunnuam thei diing ua, bang chi in laa ka sathei diing ua?” kichi maithei diing hi. Israelte lak mahmah ah zong hibang lunggel nei om maithei diing in ka gingta hi. Saltaanna mun a nunnuam a laa sa a kikouna diing achih na ziak ahihleh; Ta neitheite saang in ta-le-nau hauzaw diing chih ahi a, hih pen Pasian thuchiam leh thugen ahi.

Abraham leh azi Sara in ta neilou uh ahihman un dah mahmah uh hi. Hilezong ama’un Pasian ah a ginna uh a ngak ngam ziak un, teek nung-vuai nungin ta nei uh a, tuni dong in, eite tan chieng, Abraham suante hipha hi hang… Pasian thumanna pen, leitung mite muhna ah pil-huai kei lezong, Pasian thu ahihman in,imuan dingua,izui ding uh ahi.Tua pen kei le nang a diing a ihoihna ding ahi hi.

 

3. NA PUANBUUK MUN KEEKLIAN IN

“Na puanbuuk mun keeklian inla,na teenna puanzaakte zaaklian in; chiilbawl ken; na khaute sausak inla,na khetphin phuhte zong kipsak in. Ziatlam leh veilam ah na kithehzaak diing a,na suan-le-khaakte in namte a nei diing ua,khopi siasate ah na teeng diing hi,” chi hi.

Pasian in a mite kiang a, “Na Puanbuuk Mun Keeklian in,” chih pen bang a genna ahia?

Na Puanbuuk Mun Keeklian in chih thu in a gen ut ahihleh, na lungsim liansak in (widen your heart) chihna ahi. Pasian in a mite mun kawmkhat ateng a,ham ngamlouleh, dah ngetngut a aom diing uh deihlou hi. Mi phalah ding leh mi dangte eng a, thangsia diing in zong deihlou hi. Pasian mite pen Self-centered theilou diing chihna zong ahi hi.

Na Puanbuuk Mun Keeklian in chih akhiatna dang khat ahihleh, Pasian muhna bang muhna neih diing chihna ahi. Numei Chiing in ta a neithei kei a, a neithei diing in zong kikoih theilou hi. Hilezong Pasian in a neithei diing in a mu a, a neisak taktak hi. Nang muhna leh theihna bek a ki-nga kenla, Pasian lungsim neihna leh Pasian muhnate muhpih thei ding in, Ama kungah ki-ap zaw in.

 

4. NA TEENNA PUANZAAKTE ZAAKLIAN IN; CHIILBAWL KEN; NA KHAUTE SAUSAK INLA, NA KHETPHIN PHUHTE ZONG KIPSAK IN. 

Mi khat in a puanbuuk a keeklet diing leh, khausaau a poimawh diing a, a khihna khetphinte zong leilak a khettum a poimawh diing hi chihte i theihsa uh ahi. Pasian sung a zung I khak ua, i sungtum mah mah  diing uhchihna zong ahi hi.Hihbanga Pasian sunga zungkhoh leh thagui kiptaka ikhak theih na ding un, thuumna leh Laisiangthou simna hoihtak aineih gige diing uh ahihdanitheih chiat ding uh ahi. Kumpi David in sun leh zan a Pasian thute angaihtuah ngit nget mah banga, eite’n jong Pasian thu mah mah ingaihtuah leh ilunggul pen uh ahih tawntung  ding ahi.

Daidide a Pasian Thu lungggiltak a gelna, Thungetna leh Laisiangthou simna (Quiet time, meditation, Bible Study)te tungtawn a,ilunggel-ngaituahnate, i gamtat khuaheidante, inn le loute, mun-le-mualte,iham le pau, I minam dinmun ikipsak diing uh pen Puanbuk kekletna ahi hi.Hihbanga ibawl chiang un, iPa uh Pasian in hong tangtun pih ding hi. A omloute omsak thei Pasian,a omsate lakhia thei Pasian leh a omlou zong ala khia thei lai Pasian bia ihi hi. Amah pen muan huai mah mah hi. Zani leh tuni vela hong piangpan Pasian hilou a, leitung kibawl ma pek pek a ana omsa Pasian ahi hi. Zani leh tuni a imuh khiat Pasian hiloua, ipu le pate hun lai pek a imuh leh ibiak Pasian ahi ta hi.

 

Pasian in mi a gualzawl diing chiang in hauhsakna pe masa lou hi. Damna a piak diingte zong mi damtheite hilou uh hi. Tuni a PUANBUUK keeklian diing a kisawlte zong BUILDING INN a teengte, SINGPEEK INN a teengte, ahihke’h CHIPEEK INN a teengte zong hilou ua, PUANBUUK a teengte ahi uh hi. (Leitung mi lak lak a, mi dinmun ngiam penpente chih diing ahi). Hibang hun haksatak ah lungkia lehang zong, i Pasian in eite hung nusia lou a, Amah i theihna uh a let a, a thuuk zawkna diing in i thuakgim diing uh hung phal ahizaw hi. Ziing chiang diing lam-en kawm in, Pasian lam ah kileh thak ni.