MORIAH MUAL A HAKSATNA

By: Pastor Thangdoulal Suantak

 

Pasian Laisiangthou, Gen 22:2na ah, “Ama'n a kiang ah, “Na it mahmah, na tapa tang neihsun Isak zawhpih inla, Moriah gam ah paipih in, hua mun a k'ung etsak diing mual khat ah, amah haaltum silpiak in aap in,” a chi hi.

Hih Bible taang a i muhbang un, Thukhun ta leh tapa tangh neihsun, haaltum silpiak a aap diing a sapna pen, Abraham a diing in bangzahtuk in a thuak hak in, a naa diai? Bangchituk a dipkua in a om deh-aw? Chih ngaihtuahna in a hung luahdim lai in, hih doknate ka lungsim ah a hung kilangkhia hi: Na koppi hiam, na tate hiam, na nu hiam na pa hiam haaltum silpiak a aap diing a sapna mu lechin, bangchibang in na om diai? Bangchihbang lungsim a ki-nei mahdeh aw! Ka chi hi.

Pasian in Amah i ginna uh or i taksanna uh a enchian zeel hi. Hih pen etchian i ngaih ziak uh leh, etchian ngaite i hihna ziak uh ahi.

Pasian in, Job kichi mipa zong, etchettaak a a ngaihtuah ziak in, Setan a enchiansak hi; Abraham zong etchettaak a, a ngaihziak a hithei diam, a hinkhua a poimawh mahmah Isak tungtawn a etchet a sawm? Ahihkeileh mun tuam a sapkhiat diing a deihna ziak?

Pasian thupha tampite buaipih luat nalam a, Amah Pasian (thupha piatu) pen theihphak a zong neihlouh theih gige a na hidan ahi. Hilezong Pasian in i hinkhua uah, Amah saang a poimawh zaw a om diing a phalkei a, deih zong a deihkei hi.

I it mahmahte, i nna uh leh khovel silte’n, eima hihtheih na chiang tantan a Pasian nna i sepna diing uh a hung dalkha houh a hikha deh-aw! Ahihke’h hichibang nna leh silte, Pasian saang a kiloppih zaw houh i hikha uh mawleh? A chih huai mahmah hi.

Leitung a i ngaihsang penpen, a omlou a i omtheih louh uh leh i dampih leh damsan hi a i ngaihsutte uh, Pasian nnate i septheih louh na uh ahihkhaak diing ki-etthak a ngai mahmah hi. Aziak pen, Pasian in Amah saang a lianzaw a om diing a deihlouh ziak in, Amah saang a lianzaw a i hinkhua ua i koihte uh a lamang kha-diing hi.