Mi Thupi Mosi Taangthu Dangkhat

By: Pastor Thangdoulal Suantak

 

Bible: Exo. 1:22, Tuakhit in Faro in mi zousiah thu a pia a, “Hebru mite a kipan a ta pasal piang zousiah Nile lui a na pai diing ua, tanute pen na hingkhawi diing uh hi,” a chi hi.

Kumpipa a kipan a hibang thupiak a om hunlaitak in Mosi a piang a, tuachiin a sihlouhna diing khualna in Nile guun piau a bawm sung khat a lumsak in, tui tung ah a laamsak uh ua, tua pen Faro tanu in mu in, a ta diing in a lata chih i theih chiatsa uh ahi.

Mosi pa min Amram ahi a, a nu min Jochebed ahi a, tualeh Mosi ka ta ahi chia a pichin dong a keem Faro tanu min Bithiah ahi. A piankum ahihleh, James Usher in suutdan in, Jesu pian masang kum, 1571 hunlai hi diing in a ngaihsun a, hih pen B.C. 1571 chihna ahi a, mi siam tamtakte gintatdan zong ahi. A pianna mun ahihleh Israel tate saltan hunlai a a omna uh Goshen gam ahi.

Bithiah (Mosi ka ta ahi chia a pichin dong a keem Faro tanu) in Mosi hoihtak in a keemtou a, mite a phaklouh diing lau in ata Mosi kepna ah a hahpan mahmah hi. Tualeh Mosi in apa Faro deihsakna a ngahtheihna diing in zong tha-le-zung tamtak seeng hi. Mosi a hung pichin a, Egipt siamna zousiah theikim a, mi siam leh piltak ahung hihna ziak zong anu Bithiah hahpan ziak ahi. Tualeh Bithiah (Mosi ka ta ahi chia a pichin dong a keem Faro tanu) in Mosi a it in a deihsak mahmah a, a pa tha kheng in Faro hithei leh chih a duhthusam ahi.

 

1. Mosi Zawlthu

Mosi pen a neulai a kipan a meel hoih ahi a, Nile guun piau a amah mute’n zong hoih a sak ziak ua a laak uh ahi. Amah pen kumpi thupi Faro nuai a khanglian in, Egipt gam siamna zousiah a zilsuak a, lai siamtheitak leh pichingtak, mi pian-nalh leh meel-hoih mahmah zong ahi.

Prof. James Usher leh Historiante’n Mosi tungtaang tawh kisai a sui zeelna ua, Mosi din saandan pen, feet 6 leh inches 9 a a gelhziak un, a lian mahmah hi chih pen a kichian hi. Amah taksa a mawklet ahikei a, a taksa a kituup a, a kilawm mahmah hi. Hibang ahihziak in ama hunlai in a gam pumpi ah a hoihna leh kilawmnate gen minthang in a om hi.

Amah hunlai in kumpipa tanu Nefertari kichi nu-ngak meel hoih mahmah khat a om a, a hoihna gam zousiah a a kithan ziak in, kumpipa tapa ka hi kichithei zousiah in a heel un, kiteenpih diing in a zolzol uh hi. Tualeh Nefertari pen Seti khatna hunlai a nu-ngaak meel hoih ahi a, a pa min Seti ahi a, Egipt gam a kumpi ahihziak in Faro a kichi hi. Hihpa pen Ramases nihna pianna pa ahi a, Mosi in zong pa a a neih leh Mosi Faro hihsak sawm a panla, Seti khatna chi a kitheipa zong ahi. Tuaziak in Nu-Ngak Nefertari leh Rameses leh Mosi-te unau ahi uh hi.

 

1.1: Mosi Lawmnu Nefertari Hoihdan

Nefertari ahihleh nu-ngak meel hoih, amah hunlai a amah saang a hoihzaw a kigen omlou, pilna, pian-nalhna leh etlawmna himhim ah, leitung kumpite tanute tengteng saang a etlawmzaw leh hoihzaw a gen minthang ahi. Faro kiang a hung hawh kumpi khat pouhpouh, a hoihsa lou khatbeek a omkei ua, Kumpinu hikei lezong kumpipa’n a hoihna suang in a gei a tousak zeel hi. Tualeh Faro kiang a summet bawlna tawh kisai leh sil tuamtuam tawh kisai a hung hawh kumpite’n a gamlam uh a tun nung chiang un zong Nefertari hoihna leh etlawmnate a houlimna taangpi in a nei uh hi. Egipt mite’n ah hih nu pen ni (sun) pasian (Aton) chi in a na tawisang uh hi. Tualeh hih Nefertari taangthu ah leitung nopsakna lampangte tamtak zong gelh in a om a, Egipt in a kileppih thei taktak louh gamte zong, Nefertari tawh a omkhawm naak uh leh a neem zeel uh hi chi a, laibu a gelh zong mi tamtak a om, a kichi hi.

 

1:2:. Mosi leh Nefertari Ki-ngaihna 

Yale Divinity School (USA a zilna innpi tunding masak thumte lak a khat ahi a, tualitak in hih zilna innpi kum 319 a upa ahita hi) a O.T Criticism and Interpretation a siamna hoihtak/ theihna giltak nei Prof. John Collins leh hih zilna innpi a mi tungtuang diakte’n Mosi tungtaang thu a suina uah, Mosi pen Faro in a deihsak mahmah a, tualeh amah ah kumpi hih theihna diing quality a om a, a nunneem a, a poimawh hun ah zahtaak-huaitak a omdan zong a siam a, gamdang hung kipan palaite na vaidawn diing in zong apa Faro in Ramases saang in a muanzaw hi. Tualeh a thugen/ houlim a siam a, apa Faro in nna sep diing a piak zousiah bukimtak in a zou zeel a, gam mipite’n Ramases saang in a neelzaw uh hi. Tualeh a hunlai a poimawh mahmah gaalkaapte makaihdan a siam a, nguuitak a om gaalkaapte hanthawn a, tha thohsakna diing a thugen a siam mahmah ziak in Faro in Mosi a koih saang mahmah hi. Hihbang ahihziak in Nefertari in zong Mosi a deihgawh in, a motpih phial-phial a, Mosi pawtnate ah a zui mun mahmah hi. Mosi in zong amah bang nu-ngak meel hoihtak kiang a om khawk a sa tuankei a, tuachiin Mosi teenna inn ah Nefertari a vahawh tamialmual hi. Tualeh Mosi zong Nefertari omna ah a hawh mun mahmah hi.

Mosi leh Nefertari a ki-ngaih ziak un Mosi in suanlam a simchinglou leh neu nounoute bawl in Kumpi kimuhpih diing chi in Nefertari kiang ah a hawh tadendon a, tuachiin a hun masate uh saang in a kimu mun mahmahta uh hi. A kaal simthu uh Faro in zong a theisiam mahmah hi. Hihbang hunlaitak in Ramases a kipan in haksatna a tuakta uh hi.  Khatvei Egipt mite’n Nile Kutpi zakna diing a a kisakna uh en diing in Mosi a sawl a, hilezong Mosi amah bek a pailou in kumpi tanu Nefertari a zawhpih a, tuachiin anih un Nile kutpi kisak kholhna a enkhawmta ua, a etdik khit un, innlam a kileh lou in Nile guun piau a Faro huan ah, kuamah sukbuai louh in hun a zangh khawm uh hi. Hih hun in zong Rameses in Mosi leh Nefertari apa Faro kiang ah a heek a, a bawl diing uh bawllou chiin a ngawh hi. Hilezong Faro in a tapa Ramases kiang ah, kumpi tanu meel hoihtak a zi diing a amuhsak diingdan thute a na kikuppih zaw hi.

 

(Ramases in apa Faro kiang a amah nung a Faro hi a, Nefertari tawh kiteen diing a lunggulhna leh Nefertari a deihgawhdan thute tutung in i nuse mai diing uh hi)

 

2. Mosi Egipt Gam Faro Hihtheihna Diing Lemtaang

Egipt gam Faro hihtheih na diing lemtaang Mosi a diing in a tam mahmah a, 2016 kumlai a US election a Hillary leh Trump kikhiat bang in Mosi leh Ramases a kikhia ua, Mosi a diing in Faro hihna diing 91% in a lemtaang a, Ramases a diing in 9% bek ahi. Hilezong Trump teelching a a omdan bang in Ramases Faro diing a teelching in a omzaw hi. Ramases leh Mosi pen Faro ta tuak ahi ua, hilezong pilna, siamna, theihna, thugen siamna leh lamkaih siamnate ah a kikhe mahmah uh hi. Banglam peuh a Ramases in Mosi a phaklouh ziak leh Faro zi diing Nefertari ahi a, tualeh Nefertari in Mosi a deih a, a ngai mahmah a, tuate ziak in Mosi pen Faro hi diing in, gam mipite leh a lawmnu Nefertari leh Ramases leh apa uh Faro mahmah in zong a na ngaihtuah uh ahi. Hihte ziak in Ramases in Nefertari a kiteenpih diing thu leh Faro ahi diingdan thute apa Faro kiang ah a gen a, hih thute Nefertari in zong a na thei a, tuachiin apa Faro kiang ah, Ramases tungtaang thu ngaihtuah diing a nget a sawm a, hilezong Mosi in amah (Nefertari) a kiteenpih a, Faro ahih chiang a ngaihtuah diing in Nefertari a na zol lungdam zeelzaw hi. Hibang a Mosi in a lawmnu a zol lungdamna ziak ahihleh kumpi innpi sung a kilemlouhna huaisetak, gam mipite theih a a pawt diing a deihlouhna ziak hi daan in a kigen hi.  

 

3. Mosi leh Ramases Kaal Buaina

Ramases in Mosi leh Nefertari ki-ngaihdante leh a kizuihdante uh a theih zawh in, apa Faro in amah saang in Mosi a deihsakzaw chih a theitou zeel ziak in, Mosi kiatmang theihna diing lampi zon chihtak in a zongta hi. Tuachiin apa Faro kiang ah Mosi a vaheek tamialmual a, demtheihna diing a lampi om zousiah ah a den hi. Hilezong amah saang a pilzaw, theihna gil neizaw, thugen siamna neizaw leh nunneemtak, mi vaidawn leh houlimdan siam Mosi a dem zoukei ahi. Tualeh banglam peuh a Ramases in Mosi a phaklouh ziak in, apa’n a deihsak in a ngaisaang zaw chih a thei a, apa tha kheng a Faro a Mosi a hung pankhaak diing launa a neih ban ah, Mosi leh Nefertari a ki-ngai ua, tualeh Nefertari pen Faro zi ahih diing thu apa Faro in a na gensa ahih tawh Mosi siatna diing Ramases in zon chihtak in a zong hi. Mosi bulbal neilou ahi chihte leh heek theih na diing lampi om zousiah a Ramases in Mosi a heek a, a siatna diing a zonlai in, ni khat Mosi saltang Israel mi khat leh Egipt mi khat kihaauna a tuakkha a, tuachiin Egipt mipa a thatta hi. Hih thu Ramases tungtawn a Faro bil a lut diing ahi chih leh a Nefertari bil a lut diing ahi chih Mosi in a thei a, bulbal neiloupa bulbal muhkhiat ahihtaak diing ziak in Mosi taimang hi.

 

4. Pasian In Egipt Gam A Kileh Diing A Mosi A Sawllai A, Bangziak A Mosi Utlou A, Suanlam Tamtak A Bawl E?

Achii leh a nam it, pasal hangsan Mosi in, a nam mite a itna ziak in Egipt mite khat that in Egipt gam a nuseta a, tuachiin Midian gam a siampupa inn ah a hung khawsata hi. Tuachiin Mosi in a sunghpa gan honte ching in hinkhua a hung zangh a, hibang ahihlaitak in Pasian in amah a sam a, Egipt a kileh a, a mi Israelte puikhia diing in thu a pia hi. Hilezong Mosi in Egipt gam a nung phaak kiik diing haksa sa in a huphulh mahmah a, tuachiin Pasian mai ah, hangsantak in suanlam tamtak a bawlta hi. Tuate ahihleh hibang ahi:

Thugen siamna neilou: Mosi pen thugen siamlou dan a kigen in Pasian kiang ah a utlouhna suanlam a bawl hi. Ataktak a chih in Mosi pen, a tunglam a i na gensate uh bang in, thugen a siam mahmah hi.

Mi dang-awk: Hih zong pen suanlam maimai ahi. Egipt kumpipa’n ama kiang a hawh mi thupi dangte leh kumpite vaidawn a, siamtak a houlim a azak Mosi ahi a, a dang-awk ahi kei a, a utlouh ziak a suanlam a a bawl ahizaw hi. Tualeh a dang zong tampi omkha in teh, hilezong tuate ensau lou in, Egipt gam a kileh diing Mosi utlouhna ziakte i enzaw diing uh hi.

Egipt gam a kileh diing Mosi utlouhna ziak ahihleh:

1. A lawmnu (A first love nu) Nefertari tawh kimuh diing a huphulh mahmah hi.

2. Anu Bithiah meel mu-ngam diing in a ki-ngaihsun kei hi.

3. Ramases in a na thah mai diing a lau hi.

4. Faro a tung a khasia in, a ngetnate a pichinkei diing, chih a theih hi.

5. Egipt mipite ngaihsanpa pen, tun a Muhdahpa uh ahita diing chih a thei hi.

Hite lou zong a dang genbeh ut tamtak a omlai a, hilezong a sausimtak ziak in i hunsakta diing uh hi. Theihbeh ut na neih leh www.dailystar.com ah sim in.

Hih na sim thute tungtawn in Toupa Pasian in thupha hung peta hen…