LEITUNG AH, MIKHUAL LEH KHUALZIN I HI

 

~ Pastor Thangdoulal Suantak

Tutung in

LEITUNG AH, MIKHUAL LEH KHUALZIN I HI

Chih thu LST a i muhbang ua, thudik ahihna leh a taktak ahihna thute, LST tungtawn mah in i na kikumkhawm diing uh hi.

LST Hebrai 11:15-16 ah, “Tualeh ama'un a hung pawtna uh gam lunggulh taktak le uh pen, kilehna hunlemtang a na muta tham diing uh hi. Hinanleh hibang in gam hoihzaw a lunggulh ua, hua pen vaantung gam ahi. Tuachi a Pasian in ama'uh a diing a khopi khat a guatsak ziak in, a Pasian uh chi a sap diing Pasian a zumkei hi,” chi in a na kigelh hi. Hih pen, Pasian nam teel mite’n Vaantung gam a lunggulhna uh leh, hih a lunggulhna ziak a, Pasian zong, ama’uhte Pasian a kichih diing a zumlouhna thu hi. A omdan pen, Pasian thei mahmah, kikhop bang tai-a-taima, Saptuam projectte a phattuam ngaithei mahmah hinapi a, Vaantung gam a lunggulh theiloute tung ah, Pasian pen ama’uhte Pasian a kichih diing zum tuntun leh kilawm bangtak in kilangthei hi. Tuaziak in, tuni LST tungtawn a i muh uh Pasian pen, eite Pasian a kichih diing a sa-ik kha thei diam? Eite Pasian a kichih diing a zumkha thei diam chih ngaihsun thak lehang a deih mahmah hi.

Saultaak Paul in, Philippi 3:20 na ah, “Ei khua leh tui hihna pen vaan ah ahi a, vaan a kipan a i Toupa Jesu Khrist, eite hundampa a hung pai diing ngaak in i om uh hi,” chi a Saptuam masate a na haanthawnna tungtawn in gingtute pen vaan khua-le-tui hihna neite i hih uh chih a kichian a, i tu hinkhua i zakh na uh hih leitung pen i khua-le-tui hihna diktak uh ahikei a, tualeh taangtawn a i teen denna diing uh munpi zong ahikei chih baihlamtak in i theithei uh hi. Hichibang ahihziak in hih leitung pen, i khual-hawhna gam leh i zin tanna gam ahi chih, athak in theihsiam sawm chiat ni.

1Tim. 6:7 na ah, Sawltaak Paul mah in, “leitung ah bangmah i pualut kei a or i lutpihkei a, tualeh bangmah i puakhia or i pawtkhiatpih kei diing uh hi!” a na chi hi. Leitung ah bangmah lutpih theilou leh bangmah pawtkhiatpih theilou i hihna un foreigner, gamtuammi i hihna uh a kichiansak mahmah a, tualeh khovel pen, neitu hihna eite’n i neihphaak louhna uh gam ahi ahi chih a kichian mahmah hi.

Tualeh LST in, Khovel pen giloupa thuneihna gam, setan lalgam a na hih ngaidan zong a hung sinsak hi. Hichibang leitung ah GINGTUTE i teeng ua, vaan-gam hinkhua diing a kisingsakna hun i zangh ua, a hun a hong tun chiang in, taangtawn dong a tul ngai nawnlou diing, i khua uah i pai chiat sam diing uh hi. Tuaxiak in hih silte ban ah, i theihsiam diing uh thu bangzah hiam a omlai a, tuate ahihleh

Leitung/ Khovel mite tawh tohpawi in omken.

Rom 12: 2 ah, “Hih leitung daanbang in om kei unla, (do not be conformed to this world)” chih thu in a gennop pen ahihleh ‘hih Leitung ngainate, omdante copy kei un,’ chih a hi a, Pasian deihbang, Pasian hoihsak daan leh a kipahna lamte a hinkhua zakh diing ahihna ahi. Hih a tomlam a gen in, ‘Lungsim Thak’ nei a hinkhua zakhna ahi pen hi. Hichibang ahihziak in leitung/ khovel tawh lungkhat pua a hinkhua i zakh khawmlouh diing uh ahi hi.

2Tim. 4:10 a i muhbang in Dema kichipa in tulai khovel/ leitung a ngaihnat ziak in, a Pasian nna sepnate a tawpsan hi, chih i mu uh hi. A omdan pen, a khualzinna gam a mite tawh a na kilungtuak manta uh chihna ahi a, a poi mahmah mai hi. Jakob 4:4 na a i muhbang un, khovel lawm or leitung tawh a na kilungtuak mantaak ziak in amah pen Pasian meelma a kisuahta hi. Mikhual leh khualzin i hihna uh gam a om a, na teengsam mite hinkhua zakdan bang zeel a hinkhua zakhna pen a na hoihkim lou hi. Khovel mi, taksa a hing, lei-mihingte’n leitung ngainate leh omdante deih in, khovel tawh kituak in hinkhua a na zangh uh zong ahi khathei a, ama’uh a diing in a buai omlou hi. Hilezong ei Pasian tate, Vaan khua-le-tui hihna neite a diing in, hih leitung mite bawlbang i bawl uh a lemkei a, zong a siangkei hi.

Israelte, Egipt gam ah kum zali sila in sal in a om ua, Babulon ah kum sawm-sagih sal in a om uh hi; tuachiin a saltaanna ua kipan a pawtsak ahihlai un, Jerusalem a kileh utlou tampi a na om manta hi. Aziak diktak ahihleh a saltaanna uh mite tawh a na kizop manta ua, sungh-le-pu a kinei in, thuuktak in a na kichimat or a na kizopmattaak ziak un, a saltaanna ua kipan a pawtsak ahihlai un zong mi tampite a pawt nuamkei uh hi.

Huachibang in eite zong, mikhual leh khualzin i hihna uh hih leitung tawh i na kizop khaak ua ahihleh, i taangtawn khopi uh vaantung khopi ah i vaitung theikei khadiing uh chih a lauh-huai mahmah mai hi.

Hichibang ahihziak in, tuni in ngaihsun chiat ni hang in, Pasian thu in, “Ama’uhte lak a kipan in hung pawtkhia unla, a tuam in hung om un, sil kihdak-huai zousiah khoikha kei un” a chihbang in, i khualzinna gam, hih leitung mite a kipan a a tuam a om a, eimah leh eimah i kisiansuah uh a poimawh mahmah hi. Tua ahihkeileh leitung mite neksiat in i omkha diing uh hi.

Gingtute pen, hih leitung a khualzin lamzawtlai i hihziak un, zangkhaitak a lamzawtdan i siam mahmah diing uh ahi.

Khualzinna a kisuk-zangkhai-dan siamte’n buaina ahihleh a buaina diing uh a tawm deuh teitei hi. Hilezong duh-amtak a om a, duh-amna hinkhua a neite ahihleh a puak uh a gik deuh teitei hi. Tualeh hih leitung pen i taangtawn muh diing uh ahikei a, i neih-le-lam zousiah zong, i neihdenna diing mun ahikei hi. 1Tim 6:7 a i muhbang un, hih leitung a bangmah i lutpihlouh bang un, bangmah zong i pawtkhiatpih tuamkei diing uh hi.

Thuhilhna laibu in, “A nu sung a kipan a guaktang a a hung piankhiat bang in guaktang mah in a kileh diing a, sepgim gah bangmah a keng kei diing” a na chih pen thu dik mahmah ahihna pomsiam a ngai hi. Building inn thupitak a i bawlte uh, i gari mantam leh hoih neite uh, i sum-le-paaite uh, eimah leh eimah ki-khamuanna a i na zakh khaak diing uh a lauhuai mahmah mai hi. Hibangte vaan ah i lutpih theikei diing uh hi. Pasian hung piak hinna bek, Vaangam ah i lutpih diing uh ahihziak in Pasian phatdan kisinthak zaw ni.

Tualeh Sawltaak Paul in, hih leitung silte leh Vaangam tawh kisaite a na muchian mahmah ahihman in, Nas. 28:30na dungzui in, amah pen mi innluah a khosa leh hinkhua zang hi a, a sih kuan a a goumanpha neih sun ahihleh, 2Tim 4:13 na dungzui in, a puantualpi leh a savun laibute (Pasian thu/ Scroll) bek ahi. Eite tawh i kikhia mahmah uh hi. Eite’n leitung a sil om zousiah neih diing i utu a, hih i sil neih utna un, Toupa lak a kipan a, a hung gammansuah khaak diing sil lauhuai mahmah khat ahi hi.

Bangteng hileh, i khualzinna gam a i poimawh teng i neih uh a dikkei i chihna uh ahikei a, hilezong hih silte ziak a Toupa kianglam zot utna i neihlouh khaak diing uh leh, i taangtawn teenna diing uh vaan khopi, khut a lamlouh Pasian in eite a diing a, a bawl khopi nuam a, i tunlouh lawhna uh ahih khaak diing a lauhuai mahmah mai hi.

1Pet 2:11 na in, “Ittakte aw, mikhual leh khualzin bang na hihziak un, kha doudal zing, taksa utnate tawpsan diing in k’ung ngen hi” a chihbang in, leitung a mikhual leh khualzin i hihziak un Toupa tawh i khualzinna uah kalsuan khawm ni, chi in i ki-ngenzaw uh hi.

Toupa’n thupha hung pia chiatta hen!🙏