KUAMAH NA MEELMA DIING A OMKEI

~ Pastor Thangdoulal Suantak

 

Tuni a meelma nei dan a ki-ngaihsutna neite, Khrist in eite a hung itbang a mi dangte it sam diing a, a hung deihlai a it theiloute, i lungsim ua mi khentuamna tawh kipumdim, kuamah in ei hung langpan kei lezong, ei hung langpan gige om a ngaihsutna nei Christian, i gamsung ua a dimtaak man in, i innsungte uah haksatna leh buaina tuamtuamte i thuak ua, i Pasian thu zuihdan uh a tanlouh ziak leh a sawi-a-vaai a apaitaak man in, thu haksa tuamtuamte i neihlawh ua, innsung bek a thubuai-labuai nei hilou in, gamsung dong chiang ah, thubuai-labuai i nei ua, natna kilawmloute leh, khoi a dam mawklou diing lungsim natna tawh, i guuk om chiat ua, a poi mahmah mai hi.

Hichibang ahihziak in, tuni in, eima innsung damna i gam leh i mi nam in zong a dampih sam na diing in, hih thute limtak in ngaihsun thak ni.

 

Mi kua-hiam in a hung thangpaihsuah a, na hehna diing bek bawl a na theih a, a omdante, a kampaute leh, a khohei dan zousiah, a kalsuandan na-ngawn a, na hehna diing na muh leh, hichibang in ngaihsun thak in, Amah pen, ngaihdamna leh mi dangte khotuahtak a na ompih theihna diing a, zillai poimohtak hung sinsak diing a, Pasian a pan a hung kipan ahizaw hi. Hichibang sil a Pasian na muhtheih kei a, a sia-lam vive ngaihna na neih leh, na mailam a zing mahmah kha-diing hi.

 

Mi kua-hiam in a hung nusiat a, nanglam a hung ngat nawnlouh a, a limsakna tanglou a na kitheih leh, khasiat sawm pai mawk kenla, hichibang in ngaihsun thak in, Amah pen nang hong ngailou leh hung mudah hi pai mawk lou a, hilezong nangmah keeng a dindan na kisin thak na diing a, Pasian hung sawl ahizaw hi. Hichibang sil a Pasian na muhtheih kei a, a sia-lam vive ngaihna na neih leh, na mailam a zing mahmah kha-diing hi.

 

Mi kua-hiam in a hung sukbuai tawntung a, na kihei na lam zousiah a na buaina diing bekbek a koih a, na hinkhua na-ngawn, nuamtak a zangtheilou khop a na buaina tuntu hi a na theih a om leh, hichibang in ngaihsun thak in, Amah pen nang hong challenge hi mawk lou in, nun neemdan kisin a, siptak a thuakdan na kisin thak na diing a, amah pen Pasian in na kiang a ahong sawl ahizaw hi. Hichibang sil a Pasian na muhtheih kei leh, na mailam a zing mahmah kha-diing hi.

 

Mi kua-hiam in a hung muhdah a na theih a, innsung hi henla, kholai hitalezong, a hung houpihlouh a, nang a hung gensiatna thute bekbek na zaak a ahihleh, muhdahna mah tawh thuk sawm kenla, hichibang in ngaihsun thak in, Amah pen nang hung mudah mawngmawng hi masalou in, mi dangte condition neilou a na it theih na diing a, Pasian in a hung sawl ahizaw hi. Pasian in nang hung mudah a na theihte tungtawn a zillai poimawh a hung sinsak nuam pen na muhtheih keileh, na mailam diing pen, a zing mahmah kha-diing hi.

 

Na hinkhua a huphulh leh laau mahmah na neih a, na huphulh leh laau mahmah pen mai a om ngamna neilou khop a na om leh, hichibang in ngaihsun in, meiphuahna nusia a, haangsan dan na kisin thak na diing a, Pasian in na huphulh leh laau mahmah pen na mai a akoih ahizaw hi. Hichibang sil ah Pasian mawhsak sawm ken, haangsantak a om diing a, a hong deihna om ahihdan pomsiam sawmzaw in.

 

Na thu-nuai a na koih theihlouh a om a, theihtawp na suah hang a, na control theih tuanlouh nna-le-sil a om leh, heh sawm kenla, na thu-nun theihlouh ziak in zong, amah mawhsak ken, huate pen, ama’uh daan-daan a na paisak theih na diing a, Pasian in na kiang a ahung sawl ahizaw hi. Nna leh sil zousiah Pasian ngawh paipai teh, mawk chih ken, eite pen, Pasian batpih a siamte leh Pasian khutsuakte i hihziak un, Pasian in hung nusia ngailou a, sil omdante i theih siam theih na diing un, i deihlouh lamte a kipan in a hung thuhilh zaw hi.

 

Mi khat pouhpouh a kipan a, ih (NO) chih na muh leh, tua pen Independent-tak a na omna diing a zillai poimawh ahi, chih mangngilh ken.

 

Mi’n a hung simmawh ua, a hung nuai-et ua ahihleh, tua pen, daktou a Pasian diing a poimawh dan na sinkhiat theihna diing zillai poimawhtak ahizaw hi.

 

 

REFLECTIONS

Nang hung kilepsan diing, hung su-naa diing, hung dahsak mahmah diing, hung gensia leh demsia diing, hung subuai diing leh hung thangpaihsuah diing, kua-mah leh bangmah a omkei leh, phattuamna diing nna bangmah na sem in na bawl naikei chihna ahizaw hi.

Hinkhua kilawm leh etlawmtak hung kipatna pen, i kineppih mahmah mite a kipan a, kilepsanna, gensiatna, muhdahna, thangpaihna i tuahkhak leh sinkhakte uh tungtawn in ahizaw hi.

 

LST Simna Lk. 6:27-36

27 “Hinanleh nou ka thu ngaikhiate kiang ah k'ung hilh ahi: Na melmate uh it unla, a hung mudahte limbawl un. 28A hung hamsiatte vaangbuak unla, a hung simmohte thumsak un. 29 Na pheta hung beksakte kiang ah alang khat zong doh in, tualeh na puantual uh hung laksakte kiang ah na puan-ak uh zong it kei un. 30 Na kiang a hung ngen zousiah kiang ah pia unla, na vanh hung laksakpa kiang ah ngenkik nawn kei un. 31 Tualeh mi'n na tung ua sil hoih abawl diing na deih bang un, nou zong ama'uh tung ah bawl un. 32 “Hinanleh nou hung itte bek na it uh leh, pahtakna bang na lawh diing ua? Mikhialte'n zong ama'uh itte a it uh hi! 33 Tualeh na tung ua hoihte tung bek a na hoih uh leh pahtakna bang na lawh diing ua? Mikhial ten zong huachi bang in abawl uh hi. 34 Tualeh muhkik na kinepna kiang bek a na batlaksak uh leh pahtakna bang na lawh diing ua? Mikhialte'n zong a zahmah mukik diing in mikhialte kiang ah a batlaksak uh hi! 35 Hinanleh nou na melmate uh it unla, hoih bawl un, bangmah muhkik kinem lou in batlaksak un. Tuachiin na nuamman uh a thupi diing a, Tungnungpen Tate na hi diing uh hi; aman mi kipakdan theiloute leh mikhialte ahehpih hi. 36 Huaziak in na pa uh mihehpih a siam mah bang in nou zong mihehpih siam un. Midangte tungtang vaihawmna thu (Mat. 7.1-5) 37 “Thu khen kei un, tuachiin thu khensak in na omkei diing uh, mohpaih kei un, tuachiin mohpaih in na omkei diing uh. Tualeh ngaihdam un tuachiin ngaihdam in na om diing uh hi.