I POIMAWH PEN UH JESU KHRIST AHI

 

~ Pastor Thangdoulal Suantak 

MARK 10:26-27

Tuachiin ama'un a thugen lamdang asa mahmah ua, “A tuachihleh kua Hundam in a omzou dia?” chiin akihou uh hi.

Hinanleh Jesu'n ama'uh a en a a kiang uah, “Huapen mihing a diing in sil hitheilou ahi a, hinanleh Pasian a diing in ahi kei; Pasian a diing in sil zousiah ahithei hi,” achi hi.

 

Pasian tawh i kaal uh khelhna ziak a i na suksiat khittaak ziak in, eite’n Pasian lam ah bawltheih bangmah i neikei uh hi. Sil thupi taktakte sem a bawlkhia in ki-ngaihsun lehang zong, Khrist tungtawn a sepsuah leh bawlkhiat ahihkei leh, i nna septe uh leh bawl khiat uh thupi mahmah a i ngaihsutte uh hitaleh, Pasian lam ah khat zong pom in a omthei kei hi. Tou Jesu, i khelhnate uh sawpsiang, i siamtanna uh GINNA lou in Pasian kipahna lam nna leh sil bawltheih bangmah i neikei uh hi.

Hichibang ahihziak in, bangdangteng saang in, Pasian in Amah tawh i kilemna diing ua a hong piak Tou Jesu mah i tuulmoh ua, i poimawh penpen uh hi.

 

Tou Jesu Khrist pen taksa lam ah a na theita lehang zong, hua a i theihna un bangmah tan a hong tutkei diing hi.

Hilezong Amah gingtute’n theihna diktak a na nei ua, hua pen Pasian a hong kipan Kha Siangthou vaang ahi hi.

Aziak pen, Amah tawh Kha a kizop in i om ua, Kha in Amah i na theizaw uh hi. Hih pen Pasian lam a i dikna uh leh sil hoih i na bawlna uh zong ahi hi.

 

Eima utthu a Pasian kipaksak thei hilehang, hih leitung a Jesu Khrist a hong pai a poimawh kei kha-diing hi. Hilezong, eima utthu a bangmah bawltheih neilou leh Pasian zong lungdamsuah theiloute, siamlouh tang a taangtawn gawtmun zuan a si ngeingei diing a guatte a diing in Pasian in a it mahmah, a tapa tangh neihsun, hinna thak i neihtheih na diing un a hong pia hi. Hichibang ahihziak in GINNA a nna sep leh seplouh kikaal a na kilamdangta mahmah hi.

 

Jesu Khrist tawh lou in, bangbang bawl in sem lehang zong Pasian lungdam suah zoh diing gual ahilouh bang in, amah sung a ginna a om mite’n, Pasian vaang in bangkim ginna tungtawn in i bawlthei ua, taangtawn hinna a lutna dong i ngah uh hi. Jesu Khrist neilou a mahni a dik leh feltak a i na ki-ngaihsutna uh taangtawn hinna a lut theihna diing a chinna a ching theikei hi.

Hih i theihchian sawmthak uh aw: Jesu Khrist panglou in dikna i neithei kei ua, Pasian lungdamna diing zong, bangmah bawltheih i neikei uh hi.

 

Kinepna vaak i neihtheihna uh ahihleh Amah vaang bek ahi.

Tou Jesu bek ahi, lampi, thutak leh hinna omsun, Pasian lungdamna omsun Amah ahi hi.

Thildang buaipih nawnkei hihang aw, Jesu Khris tungtawn a eite a Pasian a lungdam naak a ahihleh thildang bangmah i poimawh nawnkei uh hi.

Hileh kilawm, hoih leh kilawmtak a kilangte’n Pasian i biakna diing uh “HUN” a hong guukmangsak zeel a, himahleh eite pen, eimah leh eimah i kilungdamsuah tawm zeel mawk uh hi. Hilezong i kha hinna uh dong a kikheelna hinkhua hong pia-thei thildang bangmah a omkei hi.

 

Thil kichinsa hoihtak a osmate ah i ginna uh nga ni hang aw; huachibang mah in Toupa i bia diing uh hi. Pasian ahihleh Kha ahihziak in, chibai buk na-ngawn a zong, Kha leh Thutak Amah i buk-theih na uh ahihleh THUTAK THU i theih na uh ginna a pan in ahizaw hi.

Lampi tuamtuam a Siangthouna leh dikna zongtute’n, siamlouh tanna, guukmangna leh khelhna a muzaw uh hi; lampi dik diing hileh kilawmtak a kilang himahleh a tawpna pen sihna ahi diing hi. Lam diklou pen “Dik” chi ngam gingtute lak a mi khat na hih sam leh tawpsan in, diklou pen diklou ca chi ngam gingtute Toupa mi pil a chizaw hi.

 

JOHN 15:4-5

Keimah ah om gige un, kei zong noumah ah ka om gige diing, abaa grepgui a a om gige keileh amah bek a agah theihlouh mahbang in, nou zong keimah a na om gige kei uh leh na gahthei kei diing uh hi.

Kei grepgui ka hi a, nou abate na hi uh, kuahileh keimah a a om gige uh leh kei ama'uh a ka om gige nate tampi in agah zel hi; aziak keilou in bangmah a bawlthei kei uh hi.

 

TOUPA’N THUPHA HONG PIA HEN.

 

                           🙏🙏🙏