GOOD FRIDAY Sermon.

 

~ Pastor Thangdoulal Suantak

Thupi: Singlamteh Tunga Jesu Thugen Sagihte

Bible Tangtel: Mt. 27:46; Lk. 23:34,43,46; Jn. 19:26-30.

Thupatna: Good Fridayni tawh kisai a thugenna pen singlamteh tung a Jesu kammal sagihte, a pan in i en ding ua, kammal khat sermon khat dan a bawl theih hilezong i bawlkei diing ua, a unpi in, tamlou-lou in i taklang zaw diing uh hi.

 

Singlamteh tung a Jesu thugente:

 

KHATNA AHIHLEH: ‘Pa aw, amauhte ngaidam in,’ chih ahi a, Lk. 23:34-na muhtheih in a om hi.

Hih pen LAINATNA aw ahi. I toupa Jesu’n amah bawlsia a, a tung a hiam-ngamtak leh, gumtak a gamtaangte a ngaihsut chiang in, a lainat mahmah hi, chih baihlamtak a theih in a om hi. Hitalezong Amah bawlsiate’n a bawlsiatpa uh itna mulou ua, thei zong theilou ua, a tanchin kigenna na zakha pawl na oimta le-uh zong, thusimloutak in a bawl uh hi. Leitung chi-le-saa a hinlai diing in zaw, thuakzoh diing gual hilou phial ahi. Himahleh Ama’n a thuakzou a, amah bawlsia a, a tung a hiam-ngamtak a gamtate thuklou hi.

Tuni a i zuihpa uh Jesu Khrist thuakzohna leh a tung a tatsiate a thuk louhnate etton a, Amah bangbang a thuakzou leh i tung ua tatsia mite thuklou diing a, Khrist sisan lamkhiat Khristiante i hihna uh mangngilh lou diing in i ki-ngen uh hi. Khrist sisan a lamkhiat mi khat in Khrist omdante a zuihtheih kei leh, zuau gen chihna ahi a, Khrist sisan a lamkhiat hilou chihna ahi.

 

NIHNA AHIHLEH: ‘Tuni’n ka kiang ah, Paradise ah na om ding hi’ chih ahi a, Lk. 23:43 ah muhtheih in a om hi.

Hih Bible taang pan a baihlamtak a i muhtheih uh ahihleh, THUNEIHNA AHI. I Toupa Jesu’n vaangam kotkhaak hontheihna thuneihna leh Dikna a nei chih a kichian mahmah hi.

Jesu’n lei a a leenlai in, a thugenna khat ah, “Keimah lampi leh, thutak leh, hinna ka hi; keimah a pailou kuamah Pa kiang a tungthei kei,” chi in John 14:6-ah a na gen hi. Khristiante pen vaangam tun sawn chiat i hi ua, Khristian zu nete hi in, khamtheih tuamtuam zongsangte hita lehang, i kinepna uh pen, Vaangam ahi a, tuachia’h Toupa Pasian lak ah zong, kinepna saangtak i nei chiat uh hi. Khristian chiat chiat hile-hang zong, i omdaante uh a kibangkei thei mahmah a, i Khrist nungzuihna hinkhua uh zong a kibangkei thei mahmah hi. A Jesu, i zuihpa uh lah a kibang ngal ei a zuite kibanglou, innkuan khat sung ah zong, Jesu a i ki-ngak zohna uh a kibangkei hi. I gen nuam uh ahihleh, ei utdan in Jesu i belh bawl uh, chi nuam ka hi. Tuni a Vaangam kotkhaak hontheihna thuneipa’n a thuneihna leh a sil bawltheihnate eite muhtheih in a tak in kilangsak kei lezong, khat vei chiang in a langsak diing a, hua hun chiang a Ama mite i hih theihna diing in tuni in Amah ah kipia-khia in, ki-pum aap ni.

 

A THUMNA AHIHLEH: ‘Numei en in na tapa!... En in na nu’ chih ahi a, Jn. 19:26-27 ah, muhtheih in a om hi.

Hih Jesu kammal thuman pan a baihlamtak a i muhtheih uh ahihleh, i Toupa Jesu’n leitung mizia bang mizia nei ahihman in, a nu a itna leh a mailam hun diing tawh kisai a, a lunghihmawhnate,  a nungzuipa Johan kiang ah a laan/pia sawn hi.

Amah a damlai diing hileh zaw, a pesawn kei maithei diing a, Amah mah in hoihtak in a keem kha diing hi. Hilezong a keph theihna diing dinmun a om a, a kitheih nawnlouh ziak in Johan kiang ah mawhpuakna guan hi. Nu leh Pa kichite pen, Tate’n theihtawp suah a i kep diing uh ahi a, a lungnopna diing uh ngaihtuah a, a kipahna diing ua, i hinkhuate uh i zakh diing pen ei tate tung a ki-nga in ka thei hi. Hilezong tulai khangthak tamtakte pen, Nu leh Pa tung a ki-nga a, Nu leh Pa kep haat ngai pawl omtheita hileh kilawmta hi. I neulai ua kipan a, i Nu leh Pate’n i mavaang diing khualna a, a hinkhua uh, a haatna teng uh a na zakhbei bang ua, i haatna tengteng, i pil i siamna tengteng tawh i Nu leh Pate uh i khual theih mahmah diing ahi. Jesu Khrist etton mi khat in a Nu leh a Pa mavaang diing ngaihsun teitei diing hi.

 

A LINA AHIHLEH: ‘Ka dang a taak’ chih ahi a, Jn. 19:28 ah muhtheih in a om hi.

Hih pen ahihleh GIMGENTHEIHNA/ THUAKGIMNA aw ahi.

I Toupa Jesu thuakgimna pen, thuakna mulkin-huaitak ahi a, a thuaknate a gen siam diing dan omlou chi lehang i genkhial kei diing uh hi. Ama’n matsak a, a om diing zaan in, Getsemani huan ah zaan khawvaak in a thuum a, hua zaan in a khosa-ul pen sisan ahi, chih zong i thei uh hi. Matsak ahih a kipan in vuakna leh zeepna chihte a thuak a, chilphih leh kousiat, haamsiat a om in, simmawh chihtak in a na simmawh bawl uh hi. Tualeh hih i Toupa thuakna leh chihmohnate tawh kisai huamzou diing in, JESU DANGTAAKNA chih thupi, i na gensa uh ahihziak in saau i genkei diing uh hi.

 

A NGA-NA AHIHLEH: ‘Ka Pasian, Ka Pasian, bang diing a n’ung taisan e? chih ahi a, Mt, 27:46 na ah muhtheih in a om hi.

“Mikhialte puak diing puakgik, i Toupa Jesu’n a puak lai in, Pa’n zong en ngamlou ahihman in, Pa sam in Jesu a kikou hi,” chi a a kigenna i zaak ngai diing uh ka gingta hi. Pa in mi khialte mawhna puak a om, a Tapa a et ngam leh ngamlouh tawh kisai, a dik leh diklouh pen i theichian kei hi. Tualeh mi khenkhatte gendan ahihleh, “Pa aw, mi khialte mawhna zousiah ka puata hung en in, achih nuamna ziak a, Pa sam a Jesu kikou ahizaw hi,” a chi uh hi. Bangteng hitaleh, hilaitak a i Toupa jesu kikouna pen LUNGGULHNA ahi.

Tualeh i muhbang ua, bang diing a Pasian in Jesu Khrist a taisan ahia? Chih pen dokna poimawhtak ahi. Hibang Pasian in Jesu Khrist a taisanna pen ahihleh, a it luatman ahi. Eite’n zong i tate uh i thuhilhna hiam i sawina uh hiam in i lehngatsan zel hi. Hih tawh kibang chet in Pasian in a Tapa tung ah bawl hi. Hebrew 12:8 na a, Ta taktak in sawina a thuak diing mawng ahi, chi a na kigelh bang chet ahizaw hi.

 

A GUKNA AHIHLEH: ‘Zoh ahita’ chih ahi a, Jn. 19:30 na ah muhtheih in a om hi.

Hih LST taang pan a baihlamtak a i muhtheih uh ahihleh TATKHIATNA ahi.

I Toupa Jesu hunlai in SINGLAMTEH tung a sihna pen Guallelna chi khat a ngaih ahi a, tualeh hih (pagan practice) kichi, dawi leh kau bia mite sil chiin khat zong ana hi khinthamta hi. Tualeh LST Deut. 21:23 na ah, Sing a khailipte pen Hamsia thuakte ahi, a na chi a, Gal. 3:13 ah zong hamsia thuak a na chi hi. David Lawm ittak Jonathan leh apa Saul zong, gaalte khut a, a sih nung un, a gaalte un vantaang omna mun Beth-shan a a khai uh na chi hi. Hibang a Saul leh Jonathan thatte pen Pasian hing bia mite ahikei uh hi. Thukhun Lui hunlai hi henla, Thukhun Thak hunlai hitaleh, Singlamteh a khailup ahihkeileh khaikang a om mite pen, a guallelte, hamsiat thuakte chi in a na kichiamteh hi. Hibangteng hitalezong, i Toupa Pasian in leitung mit a muhtheih guallelna pen Kha gualzohna diing in a teelzaw hi. Leitung mit a muhtheih gualzohnate gualzohna a simlou a, Guallelna tawh a Gualzoupa, i Toupa Jesu etton a nei in, guallelnate tawh gualzoute hi diing in i hinkhua bulpat thak ni, chi in i ki-ngen uh hi.

 

7. AP-KHIATNA:  A SAGIHNA AHIHLEH: ‘Pa aw, na khut ah ka kha k’ung  kemsak hi’ chih ahi a, Lk. 23:46 na ah muhtheih in a om hi.

Hih Bible taang pan a i muhtheih uh ahihleh ki-piakna hiam, ki-aapna hiam, ahihke’n aap-khiatna ahi.

I Toupa Jesu’n a muan penpa Pa Pasian kiang ah a hinna a aap-khia hi. Hichibang a Pa khut a i Toupa ki-aapna pen etton a, eite zong Amah i Toupa leh Pasian khut sung a ki-aap diingte i hi uh hi, chih pen i zuithei in i zuithei kei zong in, i theih chiat diing uh ka gingta hi.

Ei mite lak ah, Pasian kiang a ki-aapkhiatna tawh Amah bia mi saang in, Pasian khutzak a neih utna ziak a, Amah bia kitam mahmahta hileh kilawm mawk hi. I Hinna uh Amah a ahi a, Ama utdan leh deihdan a, nna sem diing leh gamtaang diingte i hihdante uh theisiam in, Amah ah ki-aap thak ni, chi in i ki-ngen ut uh hi.

             

 

Thutopna: Tuni pen Singlamteh tunga Toupa gualzawhni ahi a, hutdam i tanna uh ni thupitak ahi hi. Eite a diing a vaangam kotkhaak kihonna ni leh Khrist Jesu a diing a i lamdanna ni uh, hisak diing in i ki-ngen sawn-sawn uh hi. Toupa’n thupha hung piata hen…