GAALDOU HUNLAITAK A BIAKPIAKNA

 

~ Pastor Thangdoulal Suantak

Taanglai in Pasian nam teel, Israel mi namte lak ah, tulai a eite mahbang in kikhenna a na om a, tuachiin a teenna gam un zong min tuam a neisak ua, tua pen, Judah kumpigam leh Israel kumpigam chi a theih in a om hi. Hichibang a Pasian nam teelte a omlai un, Judah kumpigam tung ah Kumpipa in Jehosaphat a pang hi. Tuachi a Jehosaphat in Judah kumpigam a uklaitak in, lam-et louh in gaal lian a maituah a ngai a, hih pen i Meitei gaal maituahna ah saang in a thupizaw mahmah diing in ka ngaihsun hi.

Jehosaphat in amah dou diing a kisa namte, gaalhaat leh haangsante ahih ziak un, a laau mahmah hi. Tuachiin Jehosaphat in an ngawl a Pasian huhna zong diing in gam pumpi ah thusuah a bawlta hi. Tuachiin Judah kumpigam sung a khopi om zousiah a kipan in mite Jerusalem ah a hung paikhawm ua, Pasian a sam ua, tuachiin Jahaziel tung ah KHA  hung tungta hi.

Tuachiin Jahaziel tungtawn in Pasian in a mite a houpihna thu, 2Kro. 20:15 na ah, hibang in a kigelh hi; “Judah mi zousiah leh Jerusalem a teengte tengteng leh Kumpi Jehoshaphat aw na ngai un: Toupa'n na kiang uah hibang in a chi hi: ‘Hih mi honpite ziak in, laukei unla, lung zong lungneu kei un; aziak pen kidouna nou a a hikei a, Pasian a a hizaw hi” a chi a, tualeh 2Kro. 20:17 ah, “Judah leh Jerusalem aw, hih kidouna pen noute dou diing ahikei hi; panmun khawh unla, kiptak in ding unla, noute a diing a Toupa gualzawhna mu un.’ Lau kei unla, lungneu kei un; ziing chiang kuan unla, ama'uhte vadou un, Toupa'n noute a hung ompih diing hi,” a chi hi.

A zing ni in gaal-phual ah a kuan ua, lampi a a pailai un Jehosaphat in mipite a haanthawn a, Pasian in ama’uhte a diing a sil thupitak a bawl diing dante a gen hi.

2Kro. 20:21-24 na ah, “Ama'n mipite thu a kikuppih khit in, Toupa siangthouna leh thupina phat a laa sa diing mi a sep a, ama'un gaalkaap honte mai a a paikawm un, Toupa phat un, a itna tullou taangtawn dong in om hi,” a chi uh hi. Huabang a laa sa a, phatna a pattak un, Judah mite sim diing a hung kuan, Ammon mite, Moab mite, leh Seir Mual mite buk a dou diing Toupa'n a koih a, tuachiin ama'uhte zawh in a om uh hi. Aziak pen Ammonte leh Moabte'n Seir Mual a teengte sim in, ama'uhte a phiatmang ua, tuabang a Seir Mual a teengte tawpna a bawl zawh un, ama- 'uhte kisuksiatna diing in a kihuhtuah uh hi. Gamdaai a gaalkaapte sanchili dinna tau a Judahte a hung tuntak un, mi honte a gaal-et uh hi; ama'uhte siluang leilak ah a lum ziazua a, a peng khat beek a omkei uh hi,” chi in a kigelh hi.

Tuachiin Jehosaphat leh a mite’n gaalsuh vanh hoihte ni li sung vingveng a kaikhawm uh hi.

2Kro. 20:29-30 ah, “Israelte gaal Toupa'n a dousak hi chih gamdangte'n a zaaktak un, leitung kumpigam zousiah in Pasian a lauta uh hi. Tuabang in a Pasian in a kiim-le-paam a kipan a tawlngakna a piakman in, Jehoshaphat ukna gamsung zousiah gaalmuangtak in om hi.” Chi a kigelh i muthei uh hi.

Hichibang ahihziak in tuni a i theih ngeingei diing ua poimawhte ahihleh;

Khatna ah: Pasian mite a diing in kidouna zousiah pen Pasian a ahi. Taksa a kidouna hi henla, Leitung Kidounate ahitaleh a unpi a Pasian a ahi.

2Kro. 20:15 ah, “Toupa'n na kiang uah hibang in a chi hi: ‘Hih mi honpite ziak in, laukei unla, lung zong lungneu kei un; aziak pen kidouna nou a a hikei a, Pasian a a hizaw hi” chih i mu uh hi.

Gaalte pen a kheemkheemte ahikei ua, gaalthuam bukimtak a hung kuante zong ahi ua, a thu bek ahikei hi. Hitalezong, Pasian mite a diing in kidouna pen ama’uh a ahikei a, Pasian a ahizaw hi. Kumpi David in zong Goliath a thah masang a a thugen, 1Samuel 17:45-50 na ah hibang in a kigelh hi; “Temsau, teipi, leh na teikhoh tawh kei dou diing in ka kiang ah n'ung kuan hi; hilezong kei pen, gaalkaapte Toupa, na simmawh Israel gaalhangte Pasian min bek tawh k'ung kuan hi. Tuni'n Toupa'n ka khutsung ah nang a hung pe diing hi. Tuachiin ke'n nang k'ung that diing a, na lu ka tan diing hi; Filistia gaalkaapte siluang tungleng vasate leh gamlak gamsate kiang ah tuni mahmah in ka pe diing a, tuachiin leitung in Israelte lak ah Pasian a om hi chih a thei diing ua, tualeh Toupa'n temsau leh teipi zang in hutkhiatna a tunkei chih, hihmun a kikhawm mi zousiah in a thei diing uh hi; kidouna Toupa a ahi a, Ama'n noute ka khutsung uah a hung pe diing hi,” a chi hi.

David in Goliath a thahna pen a saili kaap siamna ziak hiam leh a haangsanna ziak hiam ahih diing ka gingta kei a, hilezong Pasian sil bawltheihna tungtawn a Goliath thah a om ahi, chih ka ginna dan ahi. Hichibang ahihziak in Physical war, earthly war, i chih uh, taksa tak a kidouna leh leitung kidounate Toupa a ahi, i chi ngam uh hi.

Nihna ah: Pasian mite a diing in, i gaalthuam uh pen Samitna or taksa a utna dan ahikei hi.

2Kro. 20:17 ah Pasian in, “Hih kidouna pen noute dou diing ahikei hi; panmun khawh unla, kiptak in ding unla, noute a diing a Toupa gualzawhna mu un.’ A chi a, tualeh 2Kro 20:20 ah zong, “Toupa na Pasian uh muang unla, a kamsaangte zong muang un, tua hileh Ama'n a hung phutdet diing hi,” a chi hi.

2Kor 10:4, na ah, Paul in, “Ka galdouna uh gaalvanh pen taksa ahi kei a, kulhpi dettak chipsakna diing a Pasian zaal a sil bawltheihna pen ahizaw hi,” a chi a, Kha a hing mite’n Kha gaalthuamte tawh gaal a dou zaw uh hi.

Eph. 6:2 na ah zong, “i doute pen taksa leh sisan ahikei a, mialnuai a vaihawmnate leh, vaan munte a kha gilou omte ahizaw uh hi, chih leh Pau. 21:1 na a, “Kumpipa lungtang pen Toupa khut a om lui luang bang ahi a; ama'n a utna lamlam ah a heikoi hi,” chih LST bung leh taangte pan a i theih diing ua poimawh mahmah ahihleh, Pasian mite’n leitung kidouna vanhzakte tawh kidouna a doukei ua, hilezong Pasian mite gaalthuam, kidouna a a vanhzak hoih uh ahihleh biakpiakna ahizaw hi.

Thumna ah: Biakna ahihleh Gaalvanh or gaalthuam ahi.

2Kro 20:21-22 na ah, “Ama'n or Jehosaphat in mipite thu a kikuppih khit in, Toupa siangthouna leh thupina phat a laa sa diing mi a sep a, ama'un gaalkaap honte mai a a paikawm un, “Toupa phat un, a itna tullou taangtawn dong in om hi,” a chi uh hi. Huabang a laa sa a, phatna a pattak un, Judah mite sim diing a hung kuan, Ammon mite, Moab mite, leh Seir Mual mite buk a dou diing Toupa'n a koih a, tuachiin ama'uhte zawh in a om uh hi,” achi hi.

Hih hunlai a laa sate leh tumging tumsiamte dinmun na ngaihsut ngai hiam, kidouna a pang diing a training piak a hi ngaikei ua, la asak leh tumging tum chihlouh bangmah ah kizilna hiam kisinna a neikei kha diing uh hi. Hichibang ahihlai in ama’uhte gaal-ma-tong a pang diing a sapkhiat in a om uh hi. Tulai kammal deuh a gen diing hilehang Front-line a pang diing a sapkhiat leh sehkhiatte ahi uh hi. Ama’uhte’n Pasian a phattak un a gaalte uh zoh in a om uh hi, chih i LST un kichiantak in a hung hilh hi. Hichibang ahihleh Biakna kichi bangzahta a poimawh ahia? Chih ngaihsut thak chiat ni.

Tuni a Gaaldou Hunlaitak a Biakpiakna Sil Bawltheihna tawh kisai a i kikup theih uh tua zah in i zouta diing ua, hun thak ah Topic thak tawh i kimuh kiik dong uh, Toupa Pasian maikaihna in eite hong kemta hen….. Dam ni Mangpha   !