DELILA PHEITUNG

~ Pastor Thangdoulal Suantak

Eite kiang a Pasian a hung kilakna Lai Siangthou 📓 Vaihawmte 16:19 na in, “Delilah in Samson a pheipi tung ah a ihmusak hi. Amahnu'n pasal khat a sam a, a luzang a sampheek sagihte a tankhiat mangsiangsak hi. Tuachiin amahnu'n a bawl genthei a, a haatna in lah, amah a nuseta hi,” chih i muthei uh hi.

A NEEM ZOUSIAH NEEMLOU A, A HAAT MAHMAHTE ZOHNA DIING IN POIMAWH MAHMAH HI.

Tuni in, Samson leh Delila tanchin pen eite a diing in, i ki-et chianna uh limlang hoihtak hileh deih-huai i sa mahmah uh hi. Pasian in a lingkimpihna lam hikholkei lezong Samson a diing in Delila pheitung pen a na nuam mahmah ahi kha-diing hi; tuachiin Samson in a haatna zousiah zohna in a na zang hi. Nang na haatna, na theihna, na siamna lam pen, banglam ah na zang a? Samson bang a nangma nopsakna lam a zakbei mai diing lungsim a, a nei na hihleh, Pasian dong masa in aw!

Saomson zong, a lawmnu pheitung a ihmu in, a haatna thuguuk zousiah a zuakbei/ a khawngbei hi, chih theizing in! Haat nalai dan a, a ki-koihlai in, a haatna in amah a nusia a, haatna kichi a nei nawnta kei hi. Tuachiin Filitia mite’n a sawisa ua, a mit-tang zong kheikhiatsak in a om a, tualeh hua a mit-tang kheikhiatu diktak ahihleh a ittak Delila a na himawk hi!!

Hichibang in eite i deihtak uh leh i ittak uh, eima hinkhua a i Delila un i kha mit-tang uh a hung suktawtsak a, haatna kichi mawngmawng neilou in a hung bawl zaw hi!?

Samson mahbang a, i kha mit-tang uh hung kikheikhiatsak a na hih a, haatna mawngmawng nei nawnlou a hinkhua zangte i hihdap khaak diing uh a laau-huai mahmah a, huabang a dinmun a omte i hih khaak diing un, ka ngaihtuah chiang in ka dip-akua hial hi.

Bangteng hileh, eima hinkhua a i Delila uh pheitung a nuamtak a na ihmu hiithiatte i hih khaak ua ahihleh, khanloh a hun mahmahta hi.

“Toupa kam in a phuankhiat, min thak in a hung kisamta diing hi” (Is. 62:2b) chih thupha in noute hung ompih chiat henla, Ama lamkaihna tawh hinkhua a milohching hung hita un. Thupia Toupa a ahi.

 

         🙏📓🙏