DAMNA LUI KHRISTA

By: Pastor Thangdoulal Suantak

 

Pasian i kiang ua a hung kilatna Pasian Laisiangthou Laibu, Laate 42:1-2 na in, “Toupa Pasian aw, sakhital in luitui luang a lunggulh bang in, ka hinna in nang a hung lunggulh hi.

Ka hinna Pasian ngai in a dangtaak a, Pasian hing ngai in ka hinna a dangtaak hi. Bangchik chiang ka Pasian kiang tung in a mai ka mu ta diai?”  a chi hi.

Sakhite ahihleh, a taangpi a ana kigenna ah, ama’uhte thah sawm a, bangchiktan a zong ama’uhte taangpan tawntungte a kipan a, a taai-taai na lam in, a dang a taak thei mahmah hi, a kichi hi. Tuachiin a lungsim-mitkha in, a dangtaak phatna diing lui tui luangte a mu a, tuachiang in hua a lungsim a, a lui muhna lam zuan in bahtak kawm in a hung taai vengveng hi, zong a kichi hi.

Hih Sakhi in, a singtaang lui tui, a dangtaak theusakna diing a, a lunggulh mahmah pen kiang a tun masang in, lamkal ah sil amhuaite, nek diing a limchi mahmahte mu nanlezong, huate’n a dangtaak na beisak theilou ahi, chih theihna a neih ziak in, a paisan zeel a, hua lui lam mah a hung delh vengveng hi.

Hichibang mah in, eite’n zong, natna chi-tuamtuamte leh gensiatna, muhsitna, gentheihna leh khelhna tampite’n a hung um chimih taktak chiang un, bah mahmah in i nak huthut mai uh hi. Hichibang lauhnate leh hung gentheisakte ziak in, luita tui Jesu Khrist in, haatna a hung pia a, a hung lamhilh zingzaw hi.

Luita tui luang pen lunggulh a Sakhi a taai vengveng mahbang in, eite zong, hua luita tui Jesu Khrist kiang lam zuan in i taai diing ua, hichibang a i taai-lai ua, lamkaal a banghiam limchi leh amhuaite i muhna  ziak un i tha-nem tuamkei diing ua, hilezong eite a diing a, i luita tui uh Jesu Khrist kiang delh in i hahpan semsem zaw diing uh hi.

Aw ka hinna in, luita tuivot Tou Jesu, dangtaak phatna pen, a ngai mahmah hi.

Tuni in a thak in, dangtaak phatna diing lam i zuanthak diing uh hi; leitung in hung na sam lezong, suul-hei mai lou diing i hi uh hi. Aziak pen leitung tuikulte ahihleh eite a diing in sihna khuuk ahi hi.

 

@GOSPEL MESSENGER@