Bangtanvei Ka Hotel An Manbei a Na Nek Sawm E??

By: Pastor Thangdoulal Suantak

 

July tarik 19 kum 2022 ni in, Thangkhal Old Testament Review Check in Translation Committee palaite, TBC (ABA) Head office a translatorpa room ah ka toukhawm uh hi. Hichibang a Review Check bawlna a kineih chiang in, sun singpi dawnna hun minute 20-30 kikaal lak a hi taangpi hi. Tuachi-a singpi dawn a ka omlai un, thu tuamtuamte ka kikum thei zel ua, hibang a ka kikup lai un, Mission Department Directorpa’n tate tung a kiseennate leh a sepna zondante uh tawh kisai ngaihdan a nei khat a hung genkha hi. Hibang a ka kikuplai un, thu pilhuai a ka theih ka genkhawm khak uh a om a, hua pen mi zousiah theih leh zuih diing a hoih a ka theih ziak in, hih a nuai a bang in ka houlimnate uh k’ung gelhkhia hi.

Khopi mite kithu-hilhna “Bangtanvei ka hotel an na mawk nek sawm e?”

Hih khopi/ Town a teengte kithu-hilhna pen ei Thangkhal gamte ah a kigen-ngam deh-o?? chih ka buaina khat a hung suakkhak laizang pen dah-huai chih diing lah hikei, kipak-huai chih diing zong lah uthuai tuanlou in ka thei hi. Aziak pen Pa khat in a tate a houna kammal ahi.

Eite lak ah hichibang kammal kizangh leh, a tate mudah, a tate nek diing thangsia, a innkuante an nek diing thangsia hi, chi a hung kigen diingdante ka ngaihtuah ngetngut leh, hin man zong omkei leh kilawm phialphial in ka mu hi.

Eite a hung kithu-hilh chiang in, ei hung thuhilhte mi gilou in ki-ngaihsun a, a thugente uh leh a hung thuhilhnate uh zong zuih diing in ki-ngaihsun lou hi. Tualeh nam dangte’n thuhoih, khanpih theih diing a zong ua, eite’n thusia gen diing i zong tamzaw uh hi; chih diing in hoih kasa hi.

“Bangtanvei ka hotel an na mawk nek sawm e?”

Hih “Bangtanvei ka hotel an na mawk nek sawm e?” chih thu pen hibang ahi; Khopi/Town a teeng Papi khat in a tate a thuhilhna ahihdan i theita ua, tualeh hih Papipa lungsim pen hibang hi diing in ka ngaihsun hi;

Ka Hotel a chih chiang in a innsung a ki-huan nek-le-dawn zousiah a genna ahi a, tualeh na mawk nek sawm e? a chih chiang in, bangchik chiang a sepna (service) nei a, khasum na saan diing uh e? a chihna ahi. Hih tawh kisai a ka kihoulimlai un, Memberte lak a khat in, “I tate i hichi hou lezong khoksa omkei uh, sawtpi a kipan a ka chih hita,” a hung chi hi. Tuachiang in ken, “Kadei-o! a tate nek diing thangsia hung kichi lou maw? Na zi mahmah in zong hung chi ut phiallou amaw?” ka chi hi.

Hitalezong, a taktak a chih in, hih pen thudik leh hoih, mi chinteng kiang a pong-gen louh diing chi ahizaw hi. Aziak pen hih Papipa kammal pen, ei tate tengteng a diing in challenging mahmah hi. Bangtanvei i pate sepsa ne a om-om diing ihi ua? Ei zong sep khat bawl khat beek neihsawmta samlou diing ima? Bangtanvei i Pate uh khut a ki-ngak sawm ihi ua? I pate ei khut a i ki-ngaksak hun hitalou ama? Nu-le-pate (Parents) a diing in puakgik hihdah sam lehang zaw hoih mahmah leh kilawm napi’n eite’n i theihlouh kaal un i Nu-le-pate uh puakgik na kiguankha zel hi. Tu a kipan in Nu-le-pate lungmuanna, khamuanna tate i hihsawmta aw! Hit ani aw…. Toupa in theihsiamna thupha hung pia hen..