BANGKIM AH KIPAHTHU I GEN THEI TEI DI UAM.
✍🏼 Pastor Rawna
Kopsiam
Mi dik leh dikloute tunga vuah zusak tuak pan mi
gilouten a thuak lai un mihoihte thuak di leng a phal thou kei dia hia. Habakuk
in leng hiai thu theih siam lou hi. Juda
mite gawtna chiang dia Pathian in Kaldaite van zata aneih mawk kha lamdang sa hi. Pathian nam telte
ahihziak ua hoih vek di khonga kingaihtuah kha sek uh chu hi dan ahi uh.
Jawlnei Habakuk buainate:- Kihou theihlouhna leh kinakna tam semsem.
Dika thukhenna vualzou ngeilou in dika thukhenna kikaikawi chihte ahi. Sam
gelhtu in leng theihsiam haksa chu sa mahmah dan hihtuak.
[Sam:73:3 - 5] Mi gilou-saloute vangphatdan ka muh in
mi mangte ka eng ngal a. A sih lai un thuakna himhim a nei kei ua: a hatna u
tuh a kip zosop ngal a. Mi dang bang a gimthuak in a om kei uhi. Midang bang a
gawt in leng a om sam kei uhi.
Tulai in leng,
bang chi i hi uh i chichi tamai du chu. Noah damlai nite bang in tuichim
hong tun tan in i ne in i dawn ding ua..... topna chu hong tung guih mai ding
dan ahi.
Hiai bang khovel buaina kar ah bangchik hun chia kipak
ding. Hun nuam sanga hun haksa hong tung tam zawta. Sawltak Paul in chu bangkim
ah kipah thugen di chi veh maw.
Daniel in chu
amah tunga haksatna hong tung ding suai kaih ahita chih a theih in a
pindan sunga lut in Pathian kiangah kipahthu a gen chi. Bang kipahthu gen di
nei a mah diam maw hiai huntaka, Toupa hon panpih in chih hunlai taka kipah
thugen chih zenzen le.
Habakuk in leng kingaihtuah tuah chu ahi di, a top in hichi in hon gen khia thei khong hi.
Habakuk:3:17- 18. Theipi kung pak pha kei in, grep
guite ah a gah omlou in; oliv sepgimna vuaksuak in, loute'n nekding piangsak
lou in; a huang a kipan ganhonte satkhiak a om in, huangsung ah ganta omta kei
mahleh;
Huchi'n leng TOUPA ah ka kipak ding, ka hotdamna
Pathian ah ka nuam ding chi hi.
Thil hi i zawn lamlam kimu sek thou ahi. Haksat hun in
leng kipah thugen di zong leng kimu zel thou hi. Vuivai nang i zawn leh chu
tampi kimu pah mai.
June kha 1993 kum in Bible zir ding in inn nusia in ka
kuan khia hi. Hiai hun a ka thupi paipih ahihleh Toupa kianga kipah thugen gige
di chih ahi mai hi.
Kalyan Railway station apat in, ka tuan louh na dipi train ah ka tuang kha
guih hi. Tun chu kipah thugen gige di chih hong haksa mahmahta hi. Toupa hon
panpih in chihchih mai ut huaita hi. Train lah ei ut hunhun a kham aw kham aw
chih theih maite lah hilou. A hilou lampi ah dakkar khat khong khawllou in hon
taipih vengveng mai hi.
Toupa kianga kipah thugen di ka thupi lah hingal buai
huai sim. Toupa hon panpih in chi a thum utlou himhim. Kipahthu gendi zong
teitei mai. Ka tuan louh nangpi train a tuang kha ka hih hon hilhthei vaite
khat om hi. Huaipa leng ka kinakpih nekpa hi zomah. Atop a chu lungsim a hiai
hong lang theisam.
Eh ! Toupa
lamdiklou zui kha ka hi chih hon hilhtupa kha, ka kiselpih nekpa hi a, ka melma
hilou in lawm hoihtak a na hi ei vele. Kei sang in a lungsim a hoih zaw. Kei
amah din mun a ding hileng lam diklou zui kha ahi chih hilh utlou mai thei ka
hi, a ziak chu ka kinakpihpa hi moka ka lungsim in ka chi hi.
Toupa ka
lamhaihna apat lamdik hon hilh thei di mi non piak ka kipaklua chi in kipahthu
ka gen di ka musuah thei nawn khong hi. Hiai ka thiltuah kon gen zenzen na
ahihleh i lungkham top in leng kipahthu gendi zong leng a na om thou dan ahi, i
zawn louhziak maimai ahi zaw.
Vuina thu gen di i lungsim a ahong lat hun chiang in
minit khat bek kidek zek in huai sung in Toupa tungah kipah thugen di bang ka
neia chih ngaihtuah phot leng kipahthu gendi nei hetlou a zaw a na ki-omlou
ahi.
Huaiziakin nopni dahni, lungkham mangbatni, ahun ah
bang, a hunlou ah bang leng kipahthu gen zel sawmta ni uh. A ziak chu bangkimah
chimok ahih chia.Bangkim in chu a nuam, anuamlou, nopni dahni chihte uapkha vek
himai lou di hia maw.
A hunlou a bang ka chihna ahihleh dahni, lungkham ni
khong chu kah hun vuivai hun hitangpi mahleh hiai huntan in leng Habakuk bang
in Ka Toupa ah ka kipak dinga, ka hotdamna Pathian ah ka nuam ding hi chi
teitei ni chi a hon chial ka hi ve.
Kuateng in hiai chialna i pom thei di uale.
Comments
Post a Comment