BANG MEEL PUA IN MITE’N A HONG MU UA?

 

~ Pastor Thangdoulal Suantak

 

Eite kiang a Pasian a hung kilaakna Lai Siangthou bu, Nasepte 6:15 na ah, “Tualeh vaihawmna a toute'n Stephen a en geelguul chiat ua, a meel vaantungmite meel bang in a mu uh hi,” chih thu i muhna ua pan a, i ngaihsut diing uh ahihleh, “Bang meel pua in mi dangte’n nang a hung mu aua?” chih ahi.

Lai Siangthou a i muhbang un Stephen kichi mipa pen, Kha Siangthou a dim, Jesu Khrist ginna a det mi leh Jesu Khrist a diing a si masa/ hinna pia masa pen a chiamteh khat ahi hi. Mite’n thah diing a suang a den pialpual lai ua, Ama’n naa a saklouh na diing a Pasian in, a naa theihna pen a laksak hileh kilawm mahmah hi. Aziak pen, nasatak a suang a den ahihlai in “Nu ei naa ei, Pa ei naa ei” chi a, a kikou lam, theih in a omkei hi. Hilezong Pa ziatlam a Jesu ding amuh thu leh a sil bawl uh a theihlouh ziak ua, ngaihdam a ngetsakna thute muhtheih in a na omzaw hi. Tualeh vaihawmtute mai a adinlai in zong, a meel pen vaantungmite meel bang in a muzaw uh hi. Eite hilehang pen, suang a den tan zong tung manlou in, a hung leh-heeklai un, ama’uhte suang in i lehden zaw kha-diing uh hi.

Hichibang a Stephen Pasian mi ahihna, Pasian mi ahihna ziak a sih dong a thuak zohna hinkhua pen, i tulai Khristian hinkhua mah hithei leh a deih-huai mahmah hi.

Hichih hunlai a, a kivaihawmna un Khristianna a doudal hi chih pen a kichian mahmah hi. Pasian a diing a gin-om leh dik, mi dangte a diing a sil hoih bawl a nasemtu pen, khovel vaihawmna dan a siamlouh tangsak a thah ahihna thu i ngaihsut chiang, tulai a i gam sung ua lamkaite leh vaihawmtute ahihleh, lei-lam vaihawmtute ahi ua, a lamkaihna uh leh a vaihawmna uah gin-oma leh dikna pen, Stephen hunlai mahbang in a si mah de-aw! Dikna leh gin-omna tawh vaihawm leh lamkai mi bangzah i nei diing un na gingta a? chih thu in i lungsim uh a luah mahmah hi.

Lungsim a om mahmah dang khat ahihleh, i gam sung ua Pasian nna a semte, i sahkhua ua i siampute uh, Saptuam tungtawn a Pasian nna sem a kipiakhia mite, a meel uh i muh chiang in bangchibang in i mu ua? Vaantungmi meel leh Jesu Khrist meel in i muthei samta uh hiam? Alehlam ah, hichibang a semtute’n, i gam ua vaihawmtute uh leh lamkai kichite mitmuh ah, Vaantungmi meel leh Pasian mi, Pasian nna semtu meel i puathei sam uh hiam? Stephen in a tak in a na lahta hi, vaihawmtute’n zong a na muta uh hi.

Bang meel pua in mi dangte’n a hung mu ua? Mite muhna ah vaantungmi meel na pua hiam? Vaantungmi meel puakna diing in nang ah bang a kisam a? Saptuam a semtute hi henla, mawhpuakna tuamtuam neite hita-lehang, i mite hung muhna ah “Bang meel pua in a hung mu diing ua?” chih pen hoihtak a i ki-etchetna diing ua poimawh mahmah khat hi in a kilang hi. Chiammuihna a kigen thu khat ah, “Ni danglai in singtang khua khat ah, nupi khat a om a, ginna a kihaatsak mahmah leh a hing vaankah thei diing khop in, mi dangteng tung ah amah a kikoih hi, hilezong a khua mite’n a zaaklouhna lamlam ah, ‘Humpi ahi’ a chi uh” chi a kigen pen ah, ziltuak diing om hi. Jesu Khrist limlang a nei in, nang leh nang a na ki-enchian teitei aw….

 

BANG MEEL PUA IN MITE’N A HONG MU UA?